Read Mayangna Ribilisan 7 Bible Online

Ribilisan 7 - Mayangna bible

Ribilisan 7

¹Adika usnit kat, insal balna arungka sau sutni arungka yakat yaklauna raukat talnayang dai, wing balna arungka kidika laihwatwi duwaraudai sau minityakat, kuma minityakat dawak pan as yakat bik wauhnin awas yulni.

²Insal as ma kilwa niningkaupak bik kaiwakat talnayang dai, dawak Papang sangka tampni kidika duwalikdai. Adika insal yaklau insal balna ūk sau dawak kuma yakat bik daukalnin parasni duduna dai kidika balna yakat parasni sarahwi diyulna dai:

³“¡Sau, kuma dawak pan balna yakat bik daukakalwinih, Mapapangki dini yamyang balna muhnitna yakat baisa tamp as bik taihna taldas kat!”

⁴Dawak aput kulwi yakna balna kidika dakanayang dai: 144,000 Israel sulani balna bitik kaupak.

⁵Judá sulani kaupak 12,000 walwi yakna dai, Rubén sulani kaupak 12,000, Gad sulani kaupak 12,000,

⁶Aser sulani kaupak 12,000, Neftalí sulani kaupak 12,000, Manasés sulani kaupak 12,000,

⁷Simeón sulani kaupak 12,000, Leví sulani kaupak 12,000, Isacar sulani kaupak 12,000,

⁸Zabulón sulani kaupak 12,000, José sulani kaupak 12,000 dawak Benjamín sulani kaupak 12,000.

⁹Adika usnit kat, nisan, muih satni balna, tuni sat sat yulyang balna dawak tawan balna kaupak bik muih mahni talnayang dai. Kasakni yaklauna bangdai trun kidika muhnityakat dawak Sīp kidika tanityakat bik, dawak muih mahni palni dai muih as bik kulwi talnin sipawas dai.

¹⁰Bitik kau parasni sarahwi aput yuyulwa dai: “¡Laihwi yaknin lani kidika laihPapang dini trun yakat yalahna sakkidika, dawak Sīp kidika bik dini!”

¹¹Dawak insal balna bitik kidika laih trun, muihbararak balna dawak di sangninaka duduwa balna kidika yaihnitna yakat bik kasakni bangdai; dawak trun muhnityakat abukwi muhnina kidika sau kat susukna dai, dawak Papang yakat ayangni tanit nuhni yayamna dai

¹²aput yulwinah: “¡Kaput karang! Ayangni nuhni yamnin, alasnina yaksihni, sins lani, tingkih lani, rispik dawak parasni mayang Mapapangki dini karangban kaput atnin yakat. ¡Kaput karang!”

¹³Bahang muihbararak balna kidika kaupak as yaklau aput yayulna dai: “¿Wais balnayah adika prak pihni kana bang adika, dawak angkaupak ainayah?”

¹⁴“Dawan, man amanglataman”, kaput nangnitlanayang dai. Dawak witing yaklau aput yayulna dai: “Adika balna kuduh kulwi kalbauna nuhni munah bayayakna kidika, praknina balna suhwi pihni yayamna kidika Sīp āni yakat.

¹⁵“Kidika yulni Papang tronnimuhnityakat bangki, dawak madah pukta dini yayamwiwiting ūni yakat. Trun yakat yalahna sakkidika yaklau tanitnadakna karang witing muhni yakat.

¹⁶Wat laih yuh dadauwas karang dawak bik was dikih diawas karang, ma kat bik manabuswas karang, daihni kidika kat bik dutni diyamwaskarang;

¹⁷kat Sīp, trun walsah yakatsakkidika, sihm sīp balna yakat kapat maintalnakarang dawak witing yaklau kalduwi kiuna karang sangka atnin wasni tuna balna yakat, dawak Papang yaklau minikpa balna kaupak makwas balna kidika bitik uswi buhna karang.”