Read Mayangna Ribilisan 8 Bible Online

Ribilisan 8 - Mayangna bible

Ribilisan 8

¹Sīp kidika yaklau tamp tiaskaubu kidika bisna mani kat, awas papusdak kapat ap dana dai.

²Usnit kat insal balna tiaskaubu kidika laih Papang muhni yakat bangkat talnayang dai, kidika balna yakat trumpit tiaskaubu bu diayana dai.

³Usnit kat insal ūk kaina dai, walapni yamni busnin dini gol kau yamna kat duwi kaina dai, dawak sakripais busnin pāni kidika muhnityakat kasakni yaklauna dai; dawak walapni yamni busnin dini mahni kalana dai, sakripais busnin pāni gol kau yamna kidika minityakat sakripais yamna atnin yulni trun muhnityakat dawak Papang tawanni muihni balna minitna yulnin balna yaihnit yakat pakdai kidika.

⁴Walapni yamni busnin wayauni kidika laih insal tingni munah kilwi kiuna dai Papang muhni yakat, Papang tawanni muihni balna minitna yulnin kidika karak aslah.

⁵Bahang insal kidika laih walapni yamni busnin dini kidika duwi sakripais kuhni tuturni kidika puwi bahngna dai, dawak sau minityakat ruhmlakna dai; dawak alwana, yul balna,[3] alwana lapna balna dawak sau isihna as kalahna dai.

⁶Insal balna tiaskaubu trumpit duwabangdai kidika laih ridi kalalahna dai puhna atnin.

⁷Insal tatuna kidika trumnipit puhna dai, dawak sau minityakat was dadasni dawak ā kuhpau karak bahana kapat bubukna dai. Sau sahyakna bās kidika busyamna dai, pan balna sahyakna bās dawak dibasta sasangni balna bitik karak aslah.

⁸Insal bu kidika trumnipit puhna dai, dawak kuma yakat di as asang nuhni dahlwa kapat as kawi kiuna dai; dawak kuma sahyakna bās kidika laih ā kalna dai.

⁹Kuma yakat di balna sangka dai kidika sahyakna bās kidika bitik dadauna dai, dawak kuring nunuhni balna sahyakna bās kidika bik daukakalna dai.

¹⁰Insal bās kidika trumnipit puhna dai, dawak yala nuhni as, sihm kuhpau kapat dahlwi, kisang kaupak was balna sahyakna bās dawak wastuna balna bitik minitna yakat bukna dai.

¹¹Yalani kidika ayangni laih Tapahlni palni dai; dawak was balna sahyakna bās kidika laih tapahlni kakalna dai, dawak kidika wasni balna tapahlni yulni muih mahni palni dadauna dai.

¹²Insal arungka kidika trumnipit puhna dai, dawak ma, waiku dawak yala balna sahyakna bās kidika daukakalna dai. Kidika balna kaupak sahyakna as kidika laih puksani watna dai, dawak yaringni disdai ma bās kidika yakat madah dawak pukta yakat bik.

¹³Usnit kat talnayang dai, dawak dakanayang dai kisang walsah yakat yakal as yaklauwakat dawak parasni sarahwi aput yulwa dai: “¡Alakaih, alakaih, alakaih, sau yakat yalalahwa muihni balna kidika, insal ūk balna bās kidika trumpit pupuhwarang mani kat!”