Read Mayangna Rut 2 Bible Online

Rut 2 - Mayangna bible

Rut 2

¹Noemí wanaihni as duwadai, kidika laih witing alni dai kidika wanaihni, ayangni laih Booz, bahang witing laih di manas duwadai.

²Mani as kat Rut yaklauwi Noemí yakat kalyulna: —Yadatangkat yamak yakat yawik talkuh, sipkarang kat di minik bahyang balna as yadawak witing dangnit yakat yawik di minik balna sau yakat bubukwa kidika anaki. Dawak unisah yakat kalyulna: —Yawah walakibis yal.

³Rut, yamak kau kiwi, di minik balna anana dai, di minik bahyang balna dadawak bubukwa kidika. Witing suerte duna dai, kidika yanimak laih Booz yanimak dai, Elimelec wanaihni as dai.

⁴Kidika yakat Booz, Betlehem kaupak kiwi di minik bahyang balna yakat diparaswi aput yulna: —¡Dawan manna karak karang! —¡Dawan manna yakat yamni manayamna karang! —witingna yaklauwi nangnitlalana.

⁵Usnit dawak Booz yulwi dakana dai di minik bahyang balna taninatuna yakat: —¿Sirau kidika wais wanaihni yah?

⁶Taninatuna yaklauwi nangnitlana: —Sirau kidika laih Moab kaupak ki, Noemí karak aina.

⁷Yayulna, datingkat di bahyang balna dangnitna yakat kiwi ananin; kaput laih mapiris kaupak wark kalahna, waralaih kaiwi, apis yakurupdana atnin.[4]

⁸Kaput laih Booz yaklauwi kalyulna Rut yakat: —Yadakah, walakibis yal, yamak ūk yakat kiwi di minik anawinih. Akat wattah, yayal diki yamyang balna karak,

⁹dawak talangkat di minik bahyang balna kidika angkat uiwakat yakat yawah. Diki yamyang balna yakat uman diyulnayang muih as bik mausnin awaski. Was dikih mawakat, was punin dini bangyakat yawah, dawak witingna yayakwa yakaupak ditah.

¹⁰Rut saukat abukna rispik lani kau, dawak Booz yakat kalyulwi dakana: —¿Amput dawak yang akat kulnam yamni kau yatalnaman man, yang adika sau ūk kaupak yang bik?

¹¹Booz yaklauwi nangnitlana: —Yamni amanglatayang, umasah yal kau kaput kalyamnaman kidika man alma dauna kaupak, dawak bik amanglanayang muihma bararak balna danaman, sauma danaman, akat aiwa yalahdanam yulni, yangna kidika man namang yakat muih satatuk yangna dai kaunah.

¹²¡Papang yaklauwi minit lauwi mawang! ¡Israel Daniwan dawak Papangni yaklauwi minit mana karang, namatdaknam witing yakat kalwalnaman kidika, dawak yamnaman balna bitik kidika minit mawang!

¹³Yal kidika yaklauwi nangnitlana: —Man laih kulnam uba dalani dutaman yang niking yakat, yulma balna kidika paraski yawi. Man dalani duta yang kau yulyabautada, yang laih man dima yamyang yayal balna kapat-awasyang bik.

¹⁴Di kasnin awarni kat, Booz yaklauwi Rut yakat kalyulwak kiwak kalyulna: —Akat aiwa plawar busna apis duta wasni sapahni yakat suihta kastah. Rut laih di minik bahyang balna karak kalpakwi yalalahna, dawak Booz yaklauwi Rut yakat di minik bukulna kalana. Witing kaswi isninglak danadai, dawak baisa sutni bayakna.

¹⁵Usnit kat, watwi di minik anana kiuna kat, Booz yaklauwi dini yamyang balna yakat diyulna: —Datanangkat plawar minik banimak sitwak bubukna kidika anawang. Kallaihwawatwinih.

¹⁶Baisa bik datanang kat bubukwak banimak sitna balna kidika kaupak, kaput laih witing ananin. ¡Muih as bik usnin awaski!

¹⁷Rut laih Booz yanimak yakat di minik anana pukta kat. Witing anana kidika laih kalana dai kuna atnin, bahang kaput laih kuwak kalahna dai paun 40 minityakat.

¹⁸Tawan nuhni yakat nawatwi kiuna, di minik mahni trukwi; dawak dukiwi niningkana unisah yal yakat. Usnit kat di kaswak sutni bayakna dai kidika bik yakwi kalanadai Noemí yakat.

¹⁹—¿Angkat wark alahwadah warmani? —Noemí yulwi dakana—. ¿Angkat kaput di minik ananamahn? ¡Papang yamni kalyamna karang, wais aput di mana muihni yakat! Rut yaklauwi unisah yal yakat kalyulna, wais karak wark kalalahna kidika. Kalyulna: —Al as karak wark alahwana yangna kidika laih ayangni Booz.

²⁰Dawak Noemí yaklauwi nangnitlana: —¡Dawan yaklauwi blismayamwarang! Waralaih witing kidika mayang akat mamikun maitalwi. Sara mani muihni balna dai kaput, witingna bitik dadauna kidika. Kidika alni laih yangna wanaihkina, kidika bahang mayang matakitdaknin ki.

²¹Rut, witing baisa minitlakwi kalyulna: —Dawak bik yayulna, yang ban wark alahwinik, witing dini yamyang balna karak kalpaktik, dini minik bahwa kidika dahn kalwarang kat.

²²Kaput laih Noemí yaklauwi Rut yakat kalyulna: —Walakibis yal, yamni kapat talayang, dini yamyang yayal balna karak ban atnin kalpakta, dawak bik yamak ūk kau yawanam-awas, muih mausnin awas yulni.

²³Rut ban yakat di minik anawadai, Booz dini yamyang balna karak kalpakwi, plawar minik bahwa kidika dahn kalna kat. Bahang witing laih yalahwadai unisah yal yakarak.