Read Mayangna Rut 3 Bible Online

Rut 3 - Mayangna bible

Rut 3

¹Mani as kat Noemí yaklauwi Rut yakat kalyulna: —Walakibis yal, yang alma as walnik ki, kulnam alasna mayamnin.

²Talah, mawanaihki Booz yakat, witing dini yamyang balna karak wark alahwa lik-atnaman kidika, adika puknita yamak yakat yawah di minik balna kidika wisma.

³Aput yamma: Kalsuhta, di walapni kalkahma, dawak asmana tanit yamni kidika āwa yawama yakat. Kaunah datangkat Booz matalnin-awaski, di kasta datasman tanitkauh.

⁴Yamni talma angkat witing kalangwi kamarang kidika. Kaput dawak yawa kalni yakat kurahta alangwama. Usnitkat witing silp mayulwarang ais yamnam kidika.

⁵Rut yaklauwi nangnitlana: —Yamki, yayultada kaput.

⁶Rut yamak kau kiuna, dawak yamna unisah yal kalyulna dai kidika bitik.

⁷Booz dikasna, dina, dawak isninglak dai. Usnitkat kalangwi kamana, di minik balna yaihnit yakat. Nai dawakat, Rut witing dis kiwi kalni yakat kurahwi kalangna.

⁸Pukpapus kat Booz sahmuhna sirihni, dawak witing kalpiramwak kalning yakat yal as kalangna tuskat amanglana.

⁹Booz yulwi dakana: —¿Waismahn man? Dawak Rut yaklauwi nangnitlana: —Yang laih man dima yamyang yang. Man laih wanaihki man, bahang takit daknam ki. Dukih yawi man karak kaldunin.[5]

¹⁰Dawak Booz yaklauwi kalyulna: —¡Dawan yaklau blisin mawarang! Warmani laih lāih nikingkanaman ki, alma dauna kidika yakat barangniman. Sip man dai ūk walnam, baisa wahma kat, yangkarak dawakat, di duyang, dawak minikunni karang bik, kaunah yamtasman.

¹¹Yamaduwinih, walakibis yal, yang tawanki muihni balna bitik amanglalawi, man laih yal yamni as man. Kaput bahang, yang yamna awaki ais yayulma kidika.

¹²Kaput kaunah, yang man wanaihma as yang, kaput kaunah man wanaihma ūk as dutaman kidika laih wanaihma ulis palni mana, yang karak dawakat.

¹³Adika pukta laih wattah akat. Yahan mani witing wanaihniman kidika yulni ilpma yamnin kulwa kat yamna karang, kaunah yamwas kat, Dawan muhni tani kat yultayang, yang yamki. Waralaih amah payahlawarang kat.

¹⁴Kidika pukta Rut kamana dai Booz kalning yakat. Baisa payahlawas puktakau yaklauna dai, kat Booz yulna dai bahang: “Muih as bik amanglanin-awaski adika yalni yamak akat kaina kidika.”

¹⁵Kaput laih Booz yaklauwi kalyulna: —Kalsuruhmtaman dini kidika yakta yamni laihtah. Rut witing suruhmnin dini duwa kidika yakwi yamni laihna sakkat, Booz yaklauwi plawar minik kidika paun muihasluih arungka uhawi kalana. Usnitkat salahni yakat ilwi kalana, dawak yal kidika mahka tawan nuhni yakat kiuna.

¹⁶Rut, witing unisah yal yakat kiwakat kalyulwi dakana: —¿Ampat alahwadah walakibis yal? Rut yaklauwi kalyulna, Booz yaklauwi amput kalyamna kidika bitik witing yakat,

¹⁷kaput laih baisa minit yakat yulna: —Plawar minik adika yana dawak aput yulna: ‘Tingma pāni manah yawanam awaski umasah yakat.’

¹⁸Kaput laih Noemí yulna: —Waralaih walakibis yal, tahatah ais kalahwarangpa. Adika alni laih yak-urupdas karang, barangni yamwi kat dawarang adika dini.