Read Mayangna Rut 4 Bible Online

Rut 4 - Mayangna bible

Rut 4

¹Ma ūk kat, Booz kiwi yalahna dai tawan kiwi kawa yakat, kidika pāni yakat muih kalududuhwadai. Kidika minitni yakat kiwi bayakna dai wanaihni dai kidika. Dawak Booz yaklauwi kalyulna: —Akat aiwa yalahda. Kaput laih wanaihni dai kidika kiwi yalahna.

²Usnit kat Booz yaklauwi muihbararak salap yulwi dukiuna, dawak diyulna witingna karak yalahna atnin. Kaput laih witingna yalah dadawakat,

³Booz yaklauwi wanaihni yakat kalyulna: —Noemí, Moab kaupak nawatwi kaina, bahang mayang mawanaihki Elimelec sauni dai kidika bakanpamnin kulwi.

⁴Dukih yawi amanglanam, kaput man bakannin kultaman kat, waradika yamtah witnis balna muhnina yakat. Kat man laih Elimelec wanaihni ulis man bahang, rahmma dutaman sauni kidika bakannin. Kaunah man bakantasman kat isingpaktah, kat man kaupak usnit yakat laih yang rahmki dutayang bakannik. Wanaihni kidika yaklauwi nangnitlana: —Bakanki ki.

⁵Booz yaklauwi adika lāih kalyulna: —Amanglanamki, Noemí sauni kidika bakannam kat, Rut karak kaldunamna ki, Moab kaupak yal tingmak kidika, kaput laih sau kidika muih dauna ayangni yak ban dunin.

⁶Kidika dakawi wanaihni dai kidika yulna: —Kaput kat sip awasyang bakanna atnik, kat diki pahni kidika sip dutni alahwinik. Man bakannin kultaman kat bakantah; yang rahmki kidika man yakat matayang.

⁷Kidika mani balna yakat lā as duduwadai Israel balna: witing rahmni kidika wanaihni yakat tilahwakat, kidika awaskat di bakanin as barangni putwakat, rahmni kalawa muih kidika, kidika awaskat wauhwi bakanwa muihni kidika susni as dakyakwadai, dawi asyakat kalawadai. Kidika lani duduwa yakarak

⁸Booz wanaihni kidika susni as yakwi Booz yakat kalawi aput kalyulna: —Man bakantah.

⁹Kaput dawak Booz yaklauwi diyulna muihbararak balna dawak yaihnit kau muih balna bangyakat bik: —Manna bitik witnis mana, Noemí kaupak bakantayang, Elimelec, Quelión dawak Mahlón balna dinina dai kidika.

¹⁰Dawak bik witnis mana, Rut adika yang yalki dutayang, Moab yal as tingmak adika, kaput laih, adika di balna Mahlón ayangni yakat atnin, witing alni dauna kidika. Kaput laih Mahlón ayangni kidika uswiyakna awaskarang, dawak bik dinitkahwas karang adika tawanni kaupak. Warmani manna witnis.

¹¹Muihbararak balna dawak, yakat muih bangkidika bitik yuyulna: —Witnis mayang. ¡Dawan yaklauwi yamwarang, yal ūma yakat kawarang kidika laih Raquel dawak Lea kapat karang, Israel balna bitik kidika sulani mayang! Dawak man al as ayangma nuhni karang, Efrata yakat, Betlehem yakat al as yamni.

¹²Dawan yaklauwi walamabis mahni manakarang adika yalni kaupak. Wanaihma mahni duma Fares dai kapat Tamar walanibis, dawak Judá.

¹³Kaput laih Booz kidika Rut karak kalduduna dai. Dawak yal kidika karak kalpapakna dai, dawak Dawan yaklau kalawakat muih karuk dawi walabis as dunin dai.

¹⁴Kaput laih yayal balna kidika Noemí yakat kalyuyulwadai: —¡Dawan ayangni nuhni yamna karang, warmani māma as mana mainmatalna atnin! ¡Māma kidika Israel pasyakat ayangni nuhni karang!

¹⁵Witing yaklauwi kulnam dulauwarang, muihbarak kaltang witing malaihna karang, dawak man namang yakat walamabis tiaskaubu minitkau kaput ki.

¹⁶Noemí muihbin kidika duwi barahnimak minit yakat ilna; witing duna muhna atnin.

¹⁷Uni yaihnitkau yayal balna kidika talwi kalyuyulwadai: —¡Noemí walanibis as batahnna! Ayangni papakna Obed. Adika laih Isaí papangni kalna, dawak Devid kukungni.

¹⁸Fares sulani balna laih adika balna: Fares laih Hezrón papangni,

¹⁹Hezrón laih Ram papangni, dawak Ram laih Aminadab papangni,

²⁰Aminadab laih Naasón papangni, dawak Naasón laih Salmón papangni.

²¹Salmón laih Booz papangni, dawak Booz laih Obed papangni,

²²Obed laih Isaí papangni, dawak Isaí laih Devid papangni.