Read Mayangna 1 Samuel 12 Bible Online

1 Samuel 12 - Mayangna bible

1 Samuel 12

¹Usnit kat Samuel yaklau Israel muihni balna bitik yakat aput diyulna: —Manna talnamana yang lawik manadakanayang ais yayulnamana bitik yakat, dawak bik king as atik mananayang.

²Kingmana akat sakki, witing yaklau tamatna kawarang kidika. Yang nikingkauh laih, yang uman muihbarak kalnayang dawak baski bik pihlana, dawak walakibis balna bik manna pasmangna yakat bangki. Yang kuduh manna tamanatuna āwanayang kidika wahmabin yang kaupak adika mani kat,

³dawak akat sakyang: Yang lawik turuh almuk kidik awaskat biriku almuk muih dini kat dunayang kat, kidik awaskat muih as kau taihnayangpa kidik awaskat dutni kalyamnayangpa, kidik awaskat kulnik dutni yang manah kapat kaldakanayang kat, manna sipmana Dawan muhni yakat dawak king as witing walwi yakna kidika muhni yakat bik yulki yakna atnamna, dawak yang lawik minit launa awaki ampus minit launik dutayang kat.

⁴Witingna yaklau yuyulna: —Wat as bik yanataihtasman dawak dutni bik yanayamtasman dai, dawak kulnam dutni man manah kapat bik kaldakasman dai.

⁵Samuel yaklau yulna: —Dawan dawi king as witing walwi yakna kidika bik witingna nuki manna lawa yang dutki as bik talasmana dai kidika. —Rahm kaputki —atwi yuyulna.

⁶Kidika minit yakat, Samuel yaklau tawan muihni balna yakat diyulna: —Dawan yaklau kuduh Moses dawi Aarón munah warkni yamwi, manna muihmanabararak balna yakat Egipto sauni kaupak diyakna dai kidika.

⁷Kidika bahang manna ridi alahwanauh, Dawan muhni yakat manna karak kalbilkiki witing yaklau di yayamni yamwi manna yakat dawak muihmanabararak balna yakat bik diana kidika yulni.

⁸Jacob witing sulani balna kauna Egipto yakat uina mani kat Egipto muihni balna yaklau ditataihna dai,[11] dawak muihmanabararak balna laih dutni dakawi Dawan yakat kalyuyulna dai, dawak witing yaklau Moses dawi Aarón karak disihna dai, bahang witingna yaklau Egipto sauni kaupak diyakwi adika pāni akat duaiwi pa diayana.

⁹Kaunah witingna laih Papangnina Dawan yakat dinitnakahna, dawak witing yaklau Sísara, tingni yakat -awi dana, Hazor kingni Jabín[12] kalbauyang muihni duwa kidika taninatuna, dawak filisteo balna tingnina yakat dawak Moab kingni tingni yakat bik -awi dana, bahang kidika balna laih bitik yaklau witing niningyakat kalbabauna dai.

¹⁰Kaunah kidika usnit kat witingna Dawan muhni yakat laih kalalahna dai witingna dinitnakahwi dawan dauh Baal, dawak Astarté yakat ayangni tanit nuhni yayamna kidika, dawak kalni dinit yakat bukwi yuyulna witingna niningnakauh yaklalauwa balna kidika tingnina dinit kaupak dilaihwi yakna atnin, dawak bik pramis kalalahna witing yakat prinias yamna atnin.

¹¹“Usnit kat, Dawan yaklau sihna dai Jerobaal, Barac,[13], Jefté dawi Samuel kauna manna namangnakauh yaklalauwa balna tingnina dinit kaupak manalaihwi yakna atnin yulni, kaput laihtakat manna kulnamna aslah lani karak yalahnamana dai.

¹²Kaunah manna laih amonita kingni Nahas yaklau manakalbauwarang kidika talnamana mani kat, king as yayulnamana dai tamanatuna kana atnin, manna kingmana laih Papangmana Dawan kidika bik amanglatanauh.

¹³Kaunah manna king as walyakta dunamna kidika akat sakki. Dawan yakat king as kalyulnamana kidika manana.

¹⁴Waralaih manna Dawan yakat rispik kalyamta dawak prinias bik yamnamnaki, witing yulni kidika daka dawak lani balna kidika bayaknin awaski, dawak manna dawi kingmana tamanatuna kawa kidika karak yalahdanama Papangmana Dawan kulnin lani kat. Kaput laih tamatna yakat yamni yawanama.

¹⁵Kat yulni dakas data, dukih manawasdai kat, witing yaklau wah manawarang manna yakat dawak kingmana yakat bik.[14]

¹⁶“Kaput bahang bangmana kidika kaupak kalititikwinih, dawak Dawan sainni nuhni manna mamaknapa walsah yakat yamwarang kidika talnama.

¹⁷Waradika plawar minik bahnin mani adika, was lauwas ki, ¿rahm awasyah? Bahang yang lawik Dawan kalni dinit yakat buktik kalyulki dawak witing yaklau alwana dawi was karak sihna karang, manna amanglata tanka dunamna yulni, kat Dawan talwi manna king as yulnamana kidika uba palni dutni yamnamana.”

¹⁸Kidika usnit kat Samuel yaklau Dawan yakat kalni dinit bukwi yulna, dawak kidika minitni yakat witing yaklau alwana dawi was sihna; bahang tawan muihni balna bitik laih uba palni Dawan yakat dawak Samuel yakat bik yamaninaduduna.

¹⁹Kidika yulni, bitik yaklau Samuel yakat kalyuyulna: —Papangma Dawan yakat kalni dinit buktah man dima yamyang balna adika yulni, daudas atnin yulni; kat bitik dutkina yulni king as yulnayangna.

²⁰Samuel yaklau nangnitnalana: —Manna yamaduduwinih. Rahmki manna uba palni dutni yamnamana; kaunah waralaih Dawan kaupak naikau kalalahwinih, kaunah ismangna bitik palni prinias yamtanauh.

²¹Dawan dauh balna yakat usnitna uhuiwinih, ilp mananawas dawak bik manalaihwi yayakwas balna yakat kat, witingna laih dawan dauh balna bahang.

²²Bahang Dawan laih, witing ayangni yakat risnipik yamwi, manaruhmwi manadawas karang; kat witing dukih kalawi manna kidika witing tawanni atnamna.

²³Yang nikingkauh laih, Dawan yaklau yalaihwi yakwang witing nining yakat dutni yamtayang kidika kaupak, manna yulmana witing kalni dinit buktayang kidika kaupak datayang kidika. Tanit yamniki, yang lawik manasumalna awaki amput yamni dawak barangni atnamna kidika.

²⁴Manna laih Dawan yakat manah rispik kalyamnamnaki, rahm karak dawak sangmanaka bitik palni karak bik prinias yamnamnaki, witing yaklau manna yulmana di mahni palni yamna kidika kultinah.

²⁵Kaunah manna dawi kingmana kidika bik dutni yamnamna kultanama laih manadaukalmukna karang.