Read Mayangna 1 Samuel 15 Bible Online

1 Samuel 15 - Mayangna bible

1 Samuel 15

¹Ma as kat, Samuel yaklau Saúl yakat kalyulna: —Dawan yaklau yasihwakat aiwayang, witing tawanni Israel kingni mayakna atnik yulni. Kidika bahang, Dawan yaklau mayulnin dukih kalawa kidika yakat tapama lakta dakah.

²Dawan parasni bitik duwa kidika yaklau aput yulwi: ‘Amalecitas muihni balna yakat wah diakiki Israel muihni balna yakat dutni diyayamna kidika yulni, kat Egipto kaupak aiwadai mani tanina bamak yakat kalahwi tanitna dadakna dai kidika yulni.

³Kidika bahang, yawa dikalbautah; panina balna karak libitta didaukalmuktah, dawak miniknakun bik didakawinih. Muih ahal, yayal, walabis dawak waralaih batahndadana kidika balna bitik imuktah, dawak turuh ahalmuk balna bik, sīp yayal balna, kiamil balna dawak biriku ahalmuk balna bik imukma.’

⁴Saúl yaklau muih sihwakat tawan muihni balna yakat diyulwak aina dai dawak Telaim pāni yakat kulwi talna dai. Kalkau lapapakwa kidika balna manah muih 200,000 dai dawak Judá kaupak laih muih 10,000 dai.

⁵Usnit kat Saúl laih Amalec tawanni nuhni niningyakat kiuna dai dawak was kung yakat pa duna dai,

⁶dawak quenita muihni balna yakat diyulna: —¡Lawanauh! ¡Amalecitas muihni balna pasningna kaupak alahwanauh, witingna karak manalibitwi manadaukalnin awas yulni; kat manna laih Israel muihni balna Egipto kaupak aiwakat dutni yamtas mana dai kidika yulni! Quenita muihni balna laih Amalecitas muihni balna kaupak naikau kalalahna dai.

⁷Bahang Saúl yaklau Amalecitas muihni balna yakat dikalbauna dai Havila pāni kaupak Shur pāni kiukawa kat, kidika laih Egipto sauni kiwi watwa yakat ki, dawak kalbauwi minitna bayakna dai;

⁸king Agag kidika yakat silak muihni duna dai, dawak kalbauyang muihni balna duwadai kidika yakat laih isparah baini kau manah imukna dai.

⁹Kaput kaunah, Saúl dawi kalbauyang muihni balna duwalik dai kidika witingna king Agag yakat ihiwas sangka dadana dai, dawak sīp yayal yayamni kidika balna bik ihiwasdai, turuh ahalmuk balna kidika bik, turuh ahalmuk wawahma salalani balna kidika bik, sīp kurih as duduwa balna kidika bik dawak di minit nunuhni duduwa kidika balna bik daukakalwas dai, kaunah dunin dini awas balna dawak di minit nunuhni awas balna kidika bitik laih daukakalna dai.

¹⁰Usnit kat Dawan yaklau Samuel yakat yulkalbauna, dawi kalyulna:

¹¹—Tikini yataihwi Saúl yakat king kalyamnayang kidika yulni, kat yang kaupak naikau kalahwi kiuna dawak yamnin kalyulnayang dini balna kidika yakat yamwas dana bahang. Samuel laih uba palni kulnin bukna dai, dawak masan kaupak payahwak mapiris kat Dawan yakat kalni dinit bukwi kalyulna dai.

¹²Payahwakat mapiris kat kiuna dai Saúl karak kalpakna atnin, kaunah muih kalyuyulna dai Saúl laih Carmel yakat kiuna, kidika pāni yakat kipala kau di wayani yayamna sakkidika yakat, usnit kat awaihwa likkauna Gilgal niningyakauh kiunadai.

¹³Bahang Samuel witing kiunadai Saúl sakdai kidika pāni yakat, bahang kalyulna: —Dawan yaklau blis mayamna karang. Dawan yaklau yamnin yayulna kidika uman yamnayang.

¹⁴—¿Bahang ais tanka yah sīp yayal memekwak dawak turuh ahalmuk mamahwak bik dakayang kidika? —Samuel yaklau kalyulwi dakana.

¹⁵Saúl yaklau nangnitlana: —Amalec pāni kaupak duahaina, kat muih balna kidika yaklau sīp yayal yayamni balna kidika dawak turuh ahalmuk yayamni balna kidika bik laihwawatna Papangma Dawan yakat sakripais yamwi kalana atnin yulni. Kaunah di ūk balna kidika laih bitik daukalmuknayangna.

¹⁶Samuel yaklau yulni dakwi kalyulna: —¡Apdatah, pukta Dawan yaklau yayulna yulni kidika mayulkiki! Saúl yaklau nangnitlana: —Yulbautah.

¹⁷Dawak Samuel yaklau kalyulna: —¿Man kidika kuihwas kaldakaman dai awasyah? Kaput kaunah, Israel sulani balna taninatuna awanaman, dawak bik Dawan yaklau witing dini Israel kingni mayakna.

¹⁸Waralaih yamni, Dawan yaklau amalecitas muihni dutni yamyang balna yakat didaukalmukna atnam dawak kalbauta imukna atnam yulni masihwakat aiwanaman kat,

¹⁹¿ais yulni yamnin mayulna kidika balna yakat yamtasdanamahn dawak man namangkauh yaklalauwa muihni balna dinina dakyaknaman kidika yakat laihta dunamahn, Dawan minikpa yakat dutni yamtinah?

²⁰Saúl yaklau nangnitlana: —Yang laih Dawan yaklau yamnin yayulna yakat yamnayang, dawak ais yamnin yasihwakat aiwanayang kidika yakat yamnayang: Amalec kingni Agag kidika silak muihni duainayang, dawak amalecitas muihni balna yakat bik daukalmuknayang.

²¹Kaunah kalbauyang muihni balna kidika laih sīp yayal dawak turuh ahalmuk kidika balna karak wawatna dai, di yamni daukalnin yakat wirlana dai kidika Papangma Dawan risnipik kau sakripais yamna atnin yulni Gilgal yakat.

²²Bahang Samuel yaklau yulna: “Dawan laih baisa yamni talwi yulni kat dakanin kidika, dawak sakripais buswi kalanin dawak sakripais karauni kauna buswi kalanin kidika karak dawak; baisa yamniki yulni dakana atnin dawak yulwayakat bik kaldakana atnin sakripais buswi kalawi dawak bik sīp kurih as duwa salani kidika kalana atnin karak dawakat.

²³Angdika muihni witing niningyakat yaklauwakat kidika bik kidika bik dutni yamwi dawak di baisa kaiwi kalahwaskau yakwi yulwa kidika bik sihm dutni yamwi; sihm kapat dutni yamwi dawan dauh balna yakat ayangni tanit nuhni yamwa kidika kidika laih angdika muihni kat yulni dakawas kidika ki. Dawak man lawa witing lani balna kidika yamni talasdanaman bahang, waralaih witing yaklau man king atnam kidika yamwi talwaski.”

²⁴Bahang Saúl yaklau Samuel yakat kalyulna: —Agha, dutni yamnayang, bahang Dawan lani kidika maluih palni bayaknayang dawak man yasumalnaman dai kidika balna bik, kat muih balna kidika yamaninadunayang dai yulni laih, yuyulna kidika yakat didakanayang dai.

²⁵Kaunah yang lawik kalmadinit buktayang dutki kidika datangkat diswang dawak yang karak nawattang mawang Dawan ayangni tanit nuhni yamna atnin yulni.

²⁶Samuel yaklau nangnitlana: —Yang man karak nawattik yawas awakiki, kat man lawa Dawan lani kidika yamni talasdanaman bahang, dawak waralaih witing kidika Israel kingni kapat yaklau man yakat yamni matalwaski.

²⁷Samuel laih wiryaklana dai mahka lapakna atnin, kaunah kalmukwa dini kidika yakat Saúl yaklau laihwi bisna dai.

²⁸Bahang Samuel yaklau Saúl yakat kalyulna: —Sihm adika aput, warmani Dawan yaklau Israel kingni lani kidika bisna ki man kaupak. Madakyaknaki man wanaihma as tingni yakat ana atnin yulni, kidika laih baisa yamniki man karak dawakat.

²⁹Kat Papang Israel alasnina yaksihni kidika, alas yulwaski dawak bik kulwi kalbauwaski, kat muih as dauh awaski kilwi kalbauna atnin.

³⁰Watwi Saúl yaklau kalyulna: —Yang dutki yamnayang. Kaunah kalmadinit buktik mayultayang Israel muihnibararak balna muhnina yakat dawak tawan muihni balna muhnina yakat bik riskipik lani yata awama king yang kapat. Kaput bahang yang karak nawattangkat mawang Papangma Dawan yakat ayangni tanit nuhni yamna atnin yulni.

³¹Bahang Samuel witing Saúl karak nawatwi uinadai, dawak Saúl witing Dawan yakat ayangni tanit nuhni yamna dai.

³²Usnit kat Samuel yaklau dipakna: —Amalec kingni Agag kidika yang muhki akat duaitanauh. Agag laih isninglak palni Samuel muhni yakat kiuna dai, kulwīnah[25] daunin tapahlni yamadangni kidika bayakna kapat kulwi.

³³Kaunah Samuel yaklau kalyulna: —Ismaparah kau muih yayal mahni palni yakat walaninabis ahal dis didanaman. Bahang man nanangma bik sihm witingna kapat karang. Dawak baisa minitkau bik kalyulwas, Samuel yaklau Gilgal pāni yakat sarhwi uduhna dai, Dawan muhni yakat.

³⁴Usnit kat Ramá yakat kiunadai, dawak Saúl laih nawatwi ūnikau kiuna dai, Saúl sauni Gabaa yakat.

³⁵Dawak Samuel laih watwi bik Saúl yakat kaltalwas dana dai, dawak Samuel laih Saúl yulni kaidadai, kat Dawan yaklau Israel kingni kalyakdawi kulnin wirlana dai kidika yulni.