Read Mayangna 1 Samuel 16 Bible Online

1 Samuel 16 - Mayangna bible

1 Samuel 16

¹Dawan yaklau Samuel yakat kalyulna: —¿Mampat mani kat Saúl yulni kulnam bukna sakawamayah? Yang uman dukih yāwaski Saúl kidika Israel kingni atnin. Yawa turuh tamni yakau dia bangta duaitah, Belén muihni Isaí ūni yakat yawana atnam kidika dukihyawi, kat uman waltik yaknayang king as witing walanibis balna paskaupak as.

²Samuel yaklau nangnitlana: —¿Dawak amput yamkiyah yawana atnik kat? ¡Saúl dakawarangkat, yaīwarangki! Dawan yaklau nangnitlana: —Turuh yal as duta dawak kalyultah yang yakat sakripais yamta yana yawaman.

³Usnit kat Isaí yakat yultangkat kiwarang sakripais yamtaman yakat, dawak yang lawik mayulna awaki ais yamna atnam kidika. Yang lawik angdika muihni mayulki kidika tunani yakat salani kidika utuhta king yakma.

⁴Samuel yaklau yamna dai Dawan yaklau ais kalyulna dai kidika. Dawak Belén yakat kiwi kana mani kat, tawan nuhni muihnibararak balna kidika yamaduwinih kalahwi yulkalbabauna dai, dawak kalyulwi dakakana: —¿Kulnin aslah lani duaitamahn?

⁵Samuel yaklau nangnitnalana: —Kaputki. Dawan yakat sakripais as yamtik kalana aiwayang. Maisihni dis alahwanauh dawak yang karak kalpakdi mawanang sakripais yamnin kidika yakat. Usnit kat Samuel yaklau Isaí yakat dawak walanibis balna yakat bik maisihni dis diyamna dai, dawak sakripais yamnin kidika yakat diyulwakat uinadai.

⁶Witingna uina mani kat, Samuel laih Eliab yakat kaltalna dai dawak kulna: “Rahm palni adika alni kapatki Dawan yaklau king as walwi yakna kidika.”

⁷Kaunah Dawan yaklau kalyulna: “Witing muihni amput kidika yakat laih talwinih dawak muihni naini yakat bik talnam awaski, kat kidika laih yang yamni talasyang. Muih al talwa kidika laih yuldaski; kat muih al kidika laih muih muihni yakat manah talwi kaunah yang laih muih isning yakat talayang.”

⁸Bahang Isaí yaklau Abinadab yakat yulwakat kiuna, dawak Samuel muhni yakat duwi kiunadai; kaunah Samuel yaklau kalyulna: —Adika bik Dawan walwi yakwaski.

⁹Usnit kat Isaí yaklau Sama kidika yakat duwi kiuna; kaunah Samuel yaklau yulna: —Adika bik walwi yakwaski.

¹⁰Isaí witing walanibis balna tiaskaubu kidika bitik Samuel yakat duwi kiuna, kaunah Samuel yaklau kalyulna witingna paskaupak as bik Dawan walwi yakwaski.

¹¹Witni kat kalyulwi dakana: —¿Baisa walabis ūk dismanh? Isaí yaklau nangnitlana: —Baisa dibindauh kidika laih kaiwaski, sīp balna maintalwa kidika. Samuel yaklau kalyulna: —Sihtangkat uiwi wawalwang, kat prinias adika tunan bahdas karangki witing kaiwarangkat.

¹²Isaí yaklau yul sihna dai kaina atnin. Dawak wahma unitak kidika laih pihni dai dawak bik pīsni yamni dai. Bahang Dawan yaklau Samuel yakat kalyulna: —Adika ki. Kaput bahang lauwa data king yaktah Papang dini.

¹³Usnit kat Samuel yaklau dia banital kidika duwi dawi wirahni balna muhnitna yakat wahma kidika yakat king yakna dai Papang dini, ayangni laih Devid kaltadai. Kidika mani kaupak, Dawan spiritni kidika witingyakat kawi laihwi duna dai. Usnit kat Samuel laih witingna kaupak mahka kalahwi Ramá yakat kiuna dai.

¹⁴Kaput bahang, Dawan spiritni dai kidika Saúl kaupak naikau kalahwi kiunadai, dawak spirit dutni as, Dawan kaupak sihna kat, dalani kalawadai.

¹⁵Kidika yulni, dini yamyang balna bangdai kidika yaklau kalyuyulna: —Man talaman kapat, yangna dakinawan, spirit dutni as Papang kaupak sihwakat man yakat dalani mawi.

¹⁶Kidika bahang, man dima yamyang balna akat dipaktangkat muih as paswi yakisdinin dini amanglalawa kat wawalwang, kaput karak spirit dutni kidika man yakat malaihwa mani kat, witing yaklau paswi yakisdinin dini yakau yakisdana atnin dawak man laih yamni kaldakana atnam.

¹⁷Saúl yaklau nangnitnalana: —Bahang muih as waltanauh paswi yakisdinin dini yamni amanglalawa kat, dawak duaita yatanauh.

¹⁸Bahang, witingna kaupak as yaklauwi yulna: —Yang talnayang Isaí Belén kaupak kidika, witing walanibis balna as yamni yakisdakat; kidika minit yakat, witing laih kalbauyang as kulnin dadasniki, dawak yulbaunin bik sins lani kat yulbauwi; pīsni bik yamni palniki dawak Dawan yaklau bik ilp kalawi.

¹⁹Bahang Saúl yaklau yul duwi uiyang muihni balna sihna dai Isaí yakat, witing yakat kalyulna atninna: “Man walamabis al Devid kidika yasihtah, sīp balna maintalwa kidika”,

²⁰dawak Isaí yaklau walanibis Devid kidika Saúl yakat kalsihna dai. Devid tingni munah Saúl yakat kalsihna dai biriku almuk as kau plawar busna dawak di utak bina as kau wain utuhwi ilwi kalsihna dawak kuts bin bik as kalsihna dai.

²¹Kaput Devid witing Saúl muhni yakat kiunadai dawi dini yamwi watnadai, dawak Saúl witing uba palni dalani kaltalna dai dawi witing tingnisut laihyang kalduna dai.

²²Dawak Saúl yaklau Isaí yakat yul kalsihna, kalnidinit bukwi kalyulna Devid kidika witing karak dana atnin, kat uba palni yamni kaltalna kidika yulni.

²³Kaput laih, spirit dutni Papang kaupak kidika Saúl yakat kallaihwadai mani kat, Devid yaklau paswi yakisdinin dini kidika duwi paswadai. Kidika karak Saúl witing kulnin dulauwadai dawak yamni kaldakawadai, dawak spirit dutni kidika bik witing kaupak naikau kalahwi kiwadai.