Read Mayangna 1 Samuel 18 Bible Online

1 Samuel 18 - Mayangna bible

1 Samuel 18

¹Devid dawi Saúl karak yulbauwi dadana usnit kat, Jonatán laih Devid karak kaltalyang yamni kalahna dai, dawak witni kat dalani kaltalna dai sihm witing muihni kapat.

²Saúl niningkauh laih, sihm kidika mani yakat witing dini yamnin duna dai dawak bik kaldawakat papangni ūni yakat nawatwi kiwasdai.

³Dawak Jonatán dawi Devid karak pramis yayamna dai kaltalyang yamni kidika ban kaput atnin, kat Jonatán yaklau Devid yakat dalani sihm witing muihni kapat kaltalwadai kidika yulni.

⁴Kidika minit yakat, Jonatán yaklau kalmukwa dini kidika dawak prakni nuhni kidika bik yakwi dawi isniparah, lasni dawak banimak kau sitwa dini yakauna libitwi Devid yakat kalanadai.

⁵Devid witing parasni duwa kidika niningkana dai Saúl yaklau yamnin kalyulna dai kidika yakat yamna atnin yulni, Saúl yaklau kalbauyang muihni balna taninatuna āna dai. Saúl kaput yamna kidika kalbauyang muihni balna bitik kau dawak Saúl yaihnit kau kalbauyang muihni duwa kidika bik yamni tatalna dai.

⁶Kaput bik, kalbauyang muihni balna kidika nawawatna mani kat Devid yaklau filisteo muihni kidika yakat ina usnit kat, Israel tawanni nunuhni balna kidika bitik yakat muih yayal balna kidika kalahwi king Saúl yakat yulkalbabauna dai unbauwinah dawak bik ubuwi alasna manah wisnin plitni balna karuk.[28]

⁷Dawak unbauwi ubuwi yakisdabangkat, muih yayal balna kidika aput lamwi yuyulwadai: “Saúl laih muih ahal tausin as īna, dawak Devid laih tausin salap ina dai.”

⁸Adika dini Saúl witing uba palni dutni kaldakana dai dawak bik uba palni kulnin daukalwi aput yulna: —Muih ahal 10,000 dadauna kidika laih Devid ina dawak yang laih 1,000 kidika manah. ¡Baisa king āninna kidika manahki!

⁹Bahang kidika kaupak, Saúl laih Devid yakat minit annin lani kalduwadai.

¹⁰Kidika payahwakat, spirit dutni Papang kaupak sihna kidika Saúl yakat laihwi duna dai, dawak Saúl laih sihm tunani dutni kapat kallaihwadai ūni nuhni kidika pasyakat. Devid laih paswi yakisdinin dini kidika yakisdasakdai witing niningh yakisdadai kaput, dawak Saúl laih tingni yakat langnisa kidika duwasakdai.

¹¹Saúl witing sirihni palni langsa kidika dulauwi Devid kidika tat karak libittik pakuhti ruhmna, kaunah Devid witing Saúl yakat watbu ihrwi yaklana dai.

¹²Saúl witing Devid yakat yamaniduwadai, kat Dawan yaklau Devid yakat ilp kalawadai kidika yulni kaunah witing yakat laih uman ilp kalawas danadai.

¹³Kidika yulni witing yaihnit kaupak yakpamna dai dawi kalbauyang balna taninatuna āna dai, kidika balna taninatuna kawi ū labanni yakat kiwi nawatwi kaiwadai.

¹⁴Dawak Dawan yaklau ilp kalawadai bahang, Devid laih di yamwa balna bitik yakat yamni manah kalkalahwadai.

¹⁵Kidika yulni Saúl yaklau Devid yakat yamaniduwadai, talwakat baraknin lani kidika duwakat.

¹⁶Kaunah Israel muihni balna bitik dawak Judá muihni balna bik witingna Devid yakat dukih diawadai, kat witing kuduh taninatuna duwadai kidika kalahwi awawaihwa mani kat dawak nawatwi aiwa yakat bik.

¹⁷Ma as kat Saúl yaklau Devid yakat kalyulna: —Yang walakibis yal barakni Merab kidika makiki man yalma atnin, kaunah la as karak, man kidika yang wārki kalbauyang as kulnam dadasni dawak bik Dawan wārni balna kidika kalbauna atnam. Saúl laih kulna dai witing palni laihwi inin awas, kaunah filisteo muihni balna laihwi ina atninna.

¹⁸Kaunah Devid yaklau nangnitlana: —Yang laih muih as dauhyang king unisah atnik dawak sulaki balna bik muih dauhki Israel sauni yakat.

¹⁹Kaput bik, Saúl witing walanibis yal Merab kidika Devid yakat kalana atnin ma āna dai kidika mani kiwi kanakat, Devid yakat kalana atnin pāni yakat Adriel yakauh kalanadai, Mehola kaupakdai kidika yakat.

²⁰Kaunah Mical, Saúl walanibis yal ūk kidika, Devid yakat yamni kaltalna dai. Dawakat Saúl yakat kalyuyulna mani kat, yamni kaldakana dai amanglana atnin,

²¹bahang Devid yakat kalana atnin kulna dai witing yalni atnin kaput laih yal kidika yaklau yamwakat filisteo muihni balna tingnina yakat bukna atnin yulni. Bahang wat bu yakat Devid yakat kalyulna dai: —Waralaihtakat yang ukisah awamaki.

²²Usnit kat Saúl yaklau dini yamyang balna yakat yamnin diyulna dai: —Manna Devid karak manah yakta yulkalbautanauh dawak kalyultanauh, yang king yang adika lawik witing yakat dukih yawi dawak diki yamyang balna bitikkau bik dalani kaltatalwi dawak witing kidika yang ukisah atninki.

²³Saúl dini yamyang balna witingna Devid yakat uiwi adika dini bitik kalyuyulna dai, kaunah Devid yaklau nangnitnalana dai: —¿Dawakat manna laih dadasni awas kultamanah king unisah atnin kidika muih as minikunni dawak muih as dauh sihm yang apat adika?

²⁴Kaput laih Saúl dini yamyang balna witingna uiwi Saúl yakat kalyuyulna dai Devid ais yulna dai kidika.

²⁵Bahang Saúl witing kulnin lani laih Devid kidika filisteo muihni balna tingnina yakat bukwakat talnin yulni, aput nangnitnalana dai: —Devid yakat kalyultanauh, yalni yulni nining minitlauna kidika, yang king yang kat yultayang, filisteo ahalni balna muihnina uninatak 100 duaiwi yana atnin, yang nikingkauh yaklalauwa balna yakat biritik diyamna atnik yulni.

²⁶Saúl dini yamyang balna yaklau adika yulni balna adika Devid yakat kalyuyulna dai, dawak Devid laih kulna witing kidika rahm palni king unisah kalna atnin. Baisa mani kidika kiwi kawas tanitkauh,

²⁷Devid witing kalbauyang muihni balna kidika duwi dawi filisteo muihni balna 200 ina dai; usnit kat muih ahal uninatak kidika king yakat duwi kiunadai, dawak tingni yakat kalana dai kaput karak witing unisah atnin yulni.

²⁸Kaunah Saúl witing talwakat Dawan yaklau ilp kalawadai Devid yakat dawak walanibis yal Mical kidika yaklau bik dalani kaltalwadai,

²⁹baisa yamaniduwadai muhnilau dai kidika karak dawakat, dawak witing niningkauh yaklauwa muihni ban kaput atnin yakat wiryaklana dai.

³⁰Pis ūk yakat, filisteo muihni taninatuna balna kidika awaihna kalalahwakat, Devid kauh yamni kalkalahwadai Saúl yaihnitkau kalbauyang balna duwa kidika karak dawakat, kidika yulni risnipik nuhni palni duna dai.