Read Mayangna 1 Samuel 20 Bible Online

1 Samuel 20 - Mayangna bible

1 Samuel 20

¹Devid laih Ramá sauni Naiot kaupak kalahwi kiunadai, dawak Jonatán sakdai yakat kiunadai, kalyulna atnin: —¿Yang adika ais yamnayang? ¿Angdika yang pātki yah? ¿Ais dutni yamnayang papangma niningyakat, witing yaklau yainin yulni yawalna atnin?

²Dawak Jonatán yaklau nangnitlana: —¡Papang kulnin lani awaski! ¡Maīwas karangki! Man rahm kultah papangki laih di as yamwaski, di nuhni karangpa kidika awaskat di dauh karangpa bik, yang akat isingpakwas laih. ¿Ais yulni papangki yaklau adika yulni yayulwas atnin daih? ¡Sip kaput awaski!

³Kaunah Devid laih wat wat kalyulna dai: —Man papangma laih yamni palni nuki man lawa dalani yatalaman kidika, dawak witing dukih kalawas karang man amanglanam kidika kaput karak man wāk kaldakanam awas yulni. ¡Kaunah Dawan ayangnikau pramis alahwik mayultayang dawak man ayangma kau bik daunin kidika asahna aslah yakat sakyang!

⁴Bahang Jonatán yaklau kalyulwi dakana: —¿Ais yamnik kidika dukih mawih man yulma?

⁵Devid yaklau nangnitlana: —Talah, yahan mani kidika waiku wisam alasnina mani, dawak king karak yalahtik di kasnik ki. Kaunah yadatangkat di dadahwa pāni yakat maldakuh yahan mani pukwak ma ulah kat,

⁶dawak yang yulki papangma mayulwi dakawarangkat, kalyulma sirihni palni man yakat ismangpaktik yawanayang tawanki Belén yakat, kat sulaki balna bitik kidika yakat kurih as pasyakat sakripais yamwi alasna yayamwa kidika yulni.

⁷Bahang nangmatlawi mayulwarang yamniki, yang kulnik alasna atnik sip karangki; kaunah kulnin daukalwarang laih, man amanglama witing kulnin barangni kulna yadaukalpamna atnin.

⁸Kaput bahang adika ilpki yamtah, kat man dima yamyang yang adika dawak bik Dawan muhni yakat kaltalyang yamni atnin pramis malahwana kidika. Waralaih yamni, yang pātki karangkat, man lawa yaītah. Papangma muhni yakat yaduyawanam kidika yamni awaski.

⁹Kaunah Jonatán yaklau nangnitlana: —¡Man di kapat balna kidika kulwinih! Papangki yaklau dutni mayamnin kulwa kidika yang amanglaki kat, yang lawik ismangpaknayang karang.

¹⁰Bahang Devid yaklau kalyulwi dakana: —¿Wais yayulwarangyah papangma yaklau dutni nangmatlawarang kat?

¹¹Jonatán yaklau nangnitlana: —Aiwang yang karak mawang. Di dadahwa pāni yakat malahwang. Witingna albupak di dadahwa pāni yakat kalalahna dai,

¹²dawak kidika yakat Jonatán yaklau Devid yakat kalyulna dai: —Israel Daniwan dawak Papangni ayangni kau pramis mayamtayang yahan mani dawak yahan mani pukwak, sihm adika mani aput kat, papangki kulnin lani balna kidika amanglana awaki. Witing di yamwa balna kidika man namangyakat yamni karangkat, ismangpakna awaki;

¹³kaunah papangki yaklau dutni mayamkuhti traitalwarang kat, Dawan yaklau wah parasni yawarang ismangpaktas awaki kat dawak bik ilp mating kat ismanglak ira lawas awamakat. ¡Dawak Dawan yaklau ilp manawarang sihm papangki yakat ilp kalanadai kapat!

¹⁴Waralaih yamni, kidika mani yakat baisa sangka awaki kat, Dawan yaklau dalani matalna kapat dalani yatalma. Dawak dauki kat,

¹⁵walakibis balna karak dalani lani kidika ban diduma. ¡Dawan yaklau man namangkauh yaklauwi dutni yayamwa balna kidika yakat dilaihna karang, dawak bitik yakat bik didaukalmukna karang! Aput karak, Jonatán yaklau Devid karak kalpakwi la yayamna dai,[29]

¹⁶

¹⁷dawak Jonatán yaklau dalani kaltalwadai kidika yulni, watwi pramis kalyamna dai, bahang dalani kaltalwadai sihm witing muihni kapat.

¹⁸Usnit kat kalyulna: —Yahan mani laih waiku wisam alasnina mani, dawak sinima kidika laih muih as bik yalahwas karang bahang man laih dis awama.

¹⁹Kaunah ma bas yakat baisa lāih karang man disman kidika.[30] Kidika bahang muhnilau kau maldanaman dai kidika pāni yakat yawah, dawak kipala mahni uduhna sakkidika[31] yaihnit yakat yalahdama.

²⁰Yang lawik kidika niningyakat sibang bās ruhmki ki, sihm di ruhmtik talayang kapat,

²¹dawak diki yamyang yakat kalyulki: ‘Yawa sibang balna kidika waltah.’ Kaunah kalyulki kat: ‘Sibang balna kidika man sakman kaupak tamat akauh bangki, bahang aiwa dutah kaltiki kat’, man laih kulnam alasna alahwanam sip karang, kat di as bik makalahwas karang bahang. Dawan kau pramis mayamtayang.

²²Kaunah kalyulki kat: ‘Sibang balna kidika laih tamat yakau bangki’, yawah, kat man yawana atnam kidika Dawan witing dukih kalawi.

²³Pramis yamnamayang kidika niningkauh laih, Dawan kidika ki mayang mawitkinis ban kaput atnin kidika.

²⁴Devid laih di dadahwa pāni yakat yakmaldana dai, dawak waiku wisam alasnina mani kiwi kana kat, king laih tibil yakat yalahna dai di kasna atnin.

²⁵Ninihng yalahwa pāni yakat yalahna dai, daklana yaihnit yakat. Jonatán laih muhnit yakat yalahna dai,[32] dawak Abner laih Saúl yaihnit yakat yalahna dai. Devid sinini dai kidika laih muih as bik yalahwasdai.

²⁶Kidika mani yakat Saúl laih di as bik yulwasdai, kat di as maisihni karuk as kalkalahwakat, witing maisihnidis awas karangti kulna dai.

²⁷Kaunah kidika payahwakat, alasna mani ma bu dai kidika, Devid sinini dai kidika laih muih as bik yalahwasdai. Bahang Saúl yaklau walanibis Jonatán yakat kalyulwi dakana dai: —¿Ais yulni Isaí walanibis kidika damai mani kaiwasdaih di kasnin yakat dawak warmani bik kaiwasyah?

²⁸Dawak Jonatán yaklau nangnitlana: —Devid laih sirihni palni isingpakna dai Belén yakat kiuna atnin.

²⁹Kalki dinit bukna dai kalatingkat kiuna atnin, kat walanibis balna sakripais as yayamwadai kidika yulni witing tawanni yakat dawak wirahni al kidika yaklau bik kiuna atnin kalyulwadai. Dawak sihm yayulnadai, kidika ilpni yamki kat, wirahni balna yakat bik kiwi talwarang ki. Kidika yulni king man karak yalahwi di kaswaski.

³⁰Bahang Saúl laih kulnin daukalna dai Jonatán karak, dawi kalyulna dai: —¡Nanang dutni walanibis al! ¿Ais amanglatasyang katpah man kidika Isaí walanibis al kidika karak kaltalyang yamniman kidika, asalmana disyah man dawi nanangma karak?

³¹Witing adika sauni akat sangka karang mani kat, man dawi king āwaman sauni kidika bik yamni awas karangki. ¡Kaput bahang sihtangkat wawalwang dawak duaita yatah, kat daunin karangki!

³²Kaunah Jonatán yaklau nangnitlana: —¿Dawak ais yulni daunin karangyah? ¿Ais as yamnayah?

³³Saúl langnisa kidika kau dulautik Jonatán yakat pakuh atnadai, bahang witing laih kidika karak amanglana dai papangni kidika kulnin barangni kulna dai kidika Devid yakat ina atnin.

³⁴Bahang Jonatán laih kulnin daukalna palni tibil kaupak yaklauna dai dawak kasnin ma bu yakat bik kawasdai, kat Devid yulni kulnin tikini kaldakawadai kidika yulni, dawak bik papangni yaklau dutni kalyamna dai bahang.

³⁵Kidika payahwakat mapiris kat, Devid karak kalpaknin awarni yakat, Jonatán laih dini yamyang wahma as karak kalpakwi di dadahwa pāni yakat kalahwi kiunadai,

³⁶kidika muihni yakat yamnin paknadai: —Sibang balna ruhmki kidika usnit kat ira yawa walma. Dini yamyang kidika kiri kiunadai dawak Jonatán laih sibang as ruhmna dai witing kaupak naikau bukna atnin.

³⁷Dawak dini yamyang kidika sibang bukna dai kidika pāni yakat kiwi kana mani kat, Jonatán yaklau dini yamyang yakat parasni sarahwi kalyulna dai: —¡Sibang kidika laih man tamat yakau tuski!

³⁸Dawak Jonatán yaklau baisa wat as sarahwi kalyulna dai dini yamyang yakat: —¡Sirihni palni ira yawah watwinih! Jonatán dini yamyang kidika sibang balna kidika dulauwi daniwan yakat duaiwi kalanadai,

³⁹kaunah di as bik amanglawas danadai kat Jonatán dawi Devid karak manah amanglalawadai sain ahana dai kidika.

⁴⁰Usnit kat Jonatán witing kalbaunin dini balna duwadai kidika dini yamyang yakat kalanadai, dawak watwi tawan nuhni yakat duwi kiunin kalyulna dai.

⁴¹Bahang dini yamyang kidika kiudawakat, Devid laih kipala mahni uduhna sakkidika dangnit kaupak[33] kalahna dai, dawak Jonatán muhni yakat wat bas abukwi sau kat sukna dai sapani kau. Usnit kat kalumwi dawi kalpakwi kakaidana dai Devid kulnin kidika apis ingni kalahna kat.

⁴²Witni kat, Jonatán yaklau Devid yakat kalyulna dai: —Kulnam alasna yawah, kat pramis yamnamayang kidika laih Dawan ayangnikau yamnamayang, dawak yulnamayang witing kidika mayang mapasking yakat atnin ban kaput atnin yakat dawak man sulama balna dawi yang sulaki balna karak bik yamni kalpakna atninna. Usnit kat Devid laih mahka ta yakat kalahwi lapakna dai, dawak Jonatán laih tawan nuhni yakat nawatwi kiunadai.