Read Mayangna 1 Samuel 22 Bible Online

1 Samuel 22 - Mayangna bible

1 Samuel 22

¹Kidika pāni kaupak Devid kalahwi kiuna dawi Adulam pāni sulihni yakat kiunadai. Wirahni ahal balna dawi wanaihni balna bitik amanglalana mani kat, uiwi witing karak kalududuhna dai.

²Ditaihwi duduna muihni balna bitik, tras duduwa balna dai kidika bitikkau dawak kulninna bukna muihni balna bitikkau kidika, Devid yaklau taninatuna kanadai. Devid karak kalpakna bangdai kidika balna laih muih ahal 400 dai.

³Kidika kaupak, Devid laih Mizpa sauni Moab yakat kiunadai, dawi Moab kingni yakat kalyulna: —Kalmadinit buktayang yang papangki dawi nanangki kauna manna karak wawatwang Papang yaklau yang akat ais yamwarang kidika amanglaki kat.

⁴Dawak kaput laih Devid witing muihnibararak balna kidika duwi kiunadai Moab kingni muhnit yakat, dawak witingna laih king karak yalalahna dai Devid witing ma balna bitik yakat kalbaunin ūni parasni yakat sakdai mani.

⁵Bahang prapit Gad yaklau Devid yakat yul kalyulna: —Man kalbaunin ūni parasni yakat watwinih. Ta yakat alahwa lapaktah dawak Judá sauni yakat yawah. Kaput bahang, Devid witing kiwi Haret asangnipas yakat kiu'kana dai.

⁶Kaput bik Saúl witing Gabaa sauni yakat sakdai mani, tamarisco panani dinit holi pāni[35] yakat yalahna sakkat, tingni yakat langnisa karuk dawak yaihnitkau kalbauyang muihni balna duwadai kidika awaihdak dadana kat. Dawak amanglawakat Devid dawi kalbauyang muihni balna duwadai kidika kauna pa duduna mani kat,

⁷kalbauyang muihni balna awaihdak duduwa balna dai yakat diyulna: —Benjamín ahalni balna yadakanauh: ¿Ais Isaí walanibis yaklauwi bik manna bitik mana yakat sau dawi wain yamak kauna manawarang kultamanakat pah, dawak manna bitik bik kalbauyang muihni balna taninatuna nunuhni manaāwarangkat pah?

⁸Manna bitik kau yang nikingkauh malnikau yainin yamnamana, kat muih as bik yayulwaski yang walakibis kidika Isaí walanibis kidika karak pramis as yayamna kidika; manna kaupak as bik yang yulki kulwi kalbauwaski; muih as bik yayulwaski yang walakibis yaklau yang tingkisut laihyang yakat yang nikingkauh ana kidika, isingkattasyang kat takipas yakat kalahwi yakalbauna atnin yulni, sihm waradika yamwa kaput.

⁹Bahang edomita muihni, Doeg, Saúl yaihnitkau kalbauyang muihni balna paskau likdai kidika yaklau adika yulni balna karak nangnitlana dai: —Yang talnayang Isaí walanibis kidika Nob yakat kiuna mani, Ahitob walanibis al Ahimelec karak yulbauna atnin.

¹⁰Ahimelec yaklau Dawan yakat kalyulwi dakana dai Devid yulni kidika, dawak Devid yakat kalana dai kasnin dini balna dawak filisteo muihni Goliat isniparah dai kidika kauna.

¹¹Bahang king yaklau sumalyang Ahimelec yakat kalyulwakat kiuna dawak Nob sauni yakat witing wanaihni balna sumalyang balna dai kidika bitik yakat bik diyulwakat uinadai. Dawak king muhni yakat bitik uina mani kat,

¹²Saúl yaklau Ahimelec yakat kalyulna: —Yamni yadakah, Ahitob walanibis. Ahimelec yaklau nangnitlana: —King man ais yayulma kidika yakat yamnik sakyang.

¹³Dawak Saúl yaklau kalyulwi dakana: —¿Ais yulni man dawi Isaí walanibis al kidika karak malnikau yainin yamnamanah? Man lawa kasnin dini kalanaman dawak isparah bik as kalanaman, dawak bik Papang yakat kalyulta dakanaman Devid yulni kidika, yang nikingkauh yaklauna atnin dawak bik isingkattasyang kat takipas yakat kalahwi yakalbauna atnin yulni, sihm waradika yamwa kaput.

¹⁴Bahang Ahimelec yaklau king yakat nangnitlana: —¿King man yaihmatkau kalbauyang muihni balna dutaman kidika kaupak wais kidika barangniyah sihm Devid kapat, dawak kidika minityakat king man umasah yah dawak kalbauyang muihni balna ūma yakat dutaman kidika taninatuna yah, dawak bik witing kidika man rismapik palni mawih king man ūma yakat?

¹⁵¿Ais warmani kat witing yulni Papang yakat kalyultik dakanayang kat pah? ¡Kaput awaski! Kaput bahang, king man lawa dima yamyang niningyakat dawak walanibis balna niningna yakat bik yulnina as bik yakwinih, kat man dimayamyang adika dibin dawak mahni bik amanglawaski adika yulni.

¹⁶Kaunah king yaklau wat wat kalyulwi dakana dai: —¡Yamni amanglatah, Ahimelec man dawi wanaihma balna bitikkau dautanama ki!

¹⁷Dawak usnit kat king witing yaihnitkau kalbauyang muihni duwa yakat yamnin diyulna dai: —¡Dawan sumalniyang balna yakat itanauh! Witingna bik sihm Devid ilpni yakat bangki, kat witingna Devid kira kidika amanglana bik yayulwas dadanadai bahang. Kaunah king yaihnit palni kau kalbauyang muihni balna duwa kidika laih witingna tingnina dulauwas dadanadai Dawan sumalniyang balna niningna yakat.

¹⁸Kaput bahang, king yaklau yamnin kalyulna dai edomita muihni Doeg yakat: —¡Man lawa imuktah! Bahang Doeg laih sumalyang balna niningna yakat ka'kiuna dai, dawak kidika mani yakat muih ahal 85 imukna dai kidika balna laih linin prakni tingni kakalhni minitkau kawa dini kidika kana bangdai.

¹⁹Usnit kat Nob sauni yakat kiwi kana dai, sumalyang balna tawannina nuhni yakat, dawak isparah baini kau ina dai muih ahal balna yakat, yayal balna, walabis balna dawak muihbinina wisamni batahndadana kidika balna yakat bik. Dawak turuh ahalmuk wark kalahyang balna, biriku ahalmuk balna dawak sīp balna yakat bik imukna dai.

²⁰Kaunah Ahimelec walanibis ahal balna kaupak as, ayangni laih Abiatar, ihiwa yakaupak kiri yaklana dai dawi Devid sakyakat kiunadai.

²¹Kidika yakat kalyulna dai Saúl yaklau Dawan sumalniyang balna yakat imukna dai kidika,

²²dawak Devid yaklau nangnitlana: —Yang uman amanglanayang dai, kidika mani Doeg yakat sakkauna, Saúl yakat kalyulwarang dai kidika. Yang pātki man walamabis balna kaupak tunan muihni balna bitik dadauna kidika.

²³Kaunah yang karak wattah dawak bik yamaduwinih, wais yaklau manyakat mainin kulwa kidika laih yang akat bik yainin yamwi. Kaunah yang karak laih yamni awamaki.