Read Mayangna 1 Samuel 25 Bible Online

1 Samuel 25 - Mayangna bible

1 Samuel 25

¹Samuel laih dauna dawak Israel muihni balna bitik kalududuhna dai dauna kidika yulni kaidana atnin. Witing ūni yakat nununadai, Ramá sauni yakat. Usnit kat Devid laih Parán kauhnimak walang yakat kiunadai.

²Maón yakat muih al di duyang as sakdai, sīp manah 3,000 dawak kuts 1,000 dinidawan, witing Carmel tawanni nuhni yakat lalah warkni balna kidika duwadai, kidika pāni yakat witing niningh sīpni balna butunina kidika kahrwādai.

³Adika alni ayangni laih Nabal, dawak witing kidika laih Caleb sulani dai; witinglaih muih al as sinsni yamni awasdai dawak kulnin lani yamwa kidika bik dutni dai. Wirlawakat yalni Abigail laih, nuhni yaksihni dai dawak sinsni bik yamnidai.

⁴Devid witing kauhmak wanilang yakat sakdai mani, witing amanglana dai Nabal kidika Carmel tawanni nuhni yakat sīpni balna butunina kahrwasakdai kidika, witing dini yamyang balna kidika kaupak salap yakwi sihna dai, witing kaupak parasnin sihwa kidika Nabal yakat uiwi kalana atnin yulni

⁵

⁶dawak usnit kat adika yulni kalyulna atnin: “Yang wirahki[37] dutah, man, walamabis balna dawak dima balna bitikkau yamni atnam dukih yawa kidika.

⁷Yang dakanayang, man sīpma balna butunina kahrtasakman kidika. Sihm man dakanaman karang man sīpma maintalyang muihni balna yangna karak Carmel tawanni yakat bangdai kidika, dawak yangna karak bangdai mani wat as bik uhuswasdai dawak di as bik didakyayakwasdai.

⁸Adika yulni man dima yamyang balna yakat diyulta dakana atnam sipki, dawak witingna yaklau barangni mayuyulwarang. Waralaih adika yulni man kalama dinit buktayang adika wawahma binina yulnina bik kultah, ma yamni as kat aiwi, dawak yanatah, witingna yakat dawak yangna akat bik, tingma yakat ais dutasak awama kidika, kat yang laih man walamabis kapatyang.”

⁹Devid dini yamyang balna uiwi dawi adika yulni Nabal yakat kalyuyulna dai, dawak biriwi diyulwarang yulni kidika watwi tahahana dai.

¹⁰Kaunah Nabal yaklau nangnitnalana: —¿Devid adika waisyah? ¿Isaí walanibis kidika waisyah? ¡Warmani mani adika muih dinina yamyang balna mahni palni kidika daninawan kaupak kalahwi kira tulutuluki!

¹¹¿Ais kasnin dini kidika, dinin dini kidika dawak sīpki butuni dakyang balna dinina dimuihni lahnayang kidika dutik angkaupak pa amanglatasyang muihni yakat kalaki yah?

¹²Devid dini yamyang balna witingna ta kidika duwi nawatwi uinadai, dawak Devid muhni yakat uina mani kat Nabal ais yulna dai kidika bitik kalyuyulna dai.

¹³Bahang Devid yaklau kalbauyang muihni balna duwa yakat yamnin diyulna dai: —¡Manna bitik kalbaunin dini balna kidika dutanauh! Bahang kalbauyang muihni balna isninaparah kidika baninamak yakat sisitnadai, sihm Devid yamna kaput, kaput manah muih ahal 400 witing karak uinadai, dawak ūk balna 200 kidika laih watwi di maintatalna dai.

¹⁴Kaunah Nabal dini yamyang as kiwi Nabal yalni Abigail yakat kalyulna dai: —Kauhmak wanilang kaupak Devid yaklau yul duwi uiyang balna buas sihna dai dakinawan yakat parasna atnin, kaunah witing laih uba dutni yamna dai.

¹⁵Kaput kaunah, kidika ahalni balna laih yangna karak yamni palni yayamna dai. Ma balna bitik yakat di dahnin pāni yakat witingna karak bangyangna dai kaunah wat as bik yanauhuswasdai dawak di as bik yanadakyayakwasdai.

¹⁶Nawatkauh laih madah yakat dawak pukta yakat takitna kakawadai, yangna yakat dawak sīpkina balna yakat bik.

¹⁷Kaunah man alma kidika laih kulnin dutni yulkalbaunin bik sipawas bahang, man kulta talah dawak ais yamnam kidika talah, kat rahm palni witing dawi walanibis balna minitna yakat di as dutni kaiwarangki.

¹⁸Abigail laih sirihni palni plawar busna 200 duna, di unitak bina bu wain puna, sīp busna manah singka, di minik bukulna batal 40, wain minik dawi pasas karak kuruhwi busna kidika 100 dawak ani damni buhna kau kuruhwi busna kidika laih 200; usnit kat biriku ahalmuk kau ilwi,

¹⁹dawi dini yamyang balna yakat diyulna: —Tatuna maitanauh, usmatna kaupak naikau aiwaki ki. Adika dini alni yakat di as bik kalyulwas,

²⁰Abigail laih biriku almuk as kau kilwi dawi yakmaldi yaklak'kiuna dai asang yakaupak. Sirihni palni talwakat Devid dawi kalbauyang muihni balna kidika karak niningkauh aiwabangdai, dawak kiwi diparasna dai.

²¹Devid laih kulwīnah kaiwalikdai witing dauh tanitdakna kulwi Nabal dini balna bitik duwadai kidika kauhmak wanilang yakat, witing dini kidika kaupak di as bik dakyakwas, bahang witing yaklau dutni pāni yakat yamni kau minitlauwi kalanadai.

²²Kaput bahang pramis yamna: “¡Papang yaklau parasni palni wah yawang[38] adika kaupak yahan mani kat man wanaihma ahal balna kidika bitik dahn yamtasyang kat!”

²³Abigail niningkauh laih Devid yakat talwi, biriku makaupak yaklakwi dawi sau kat abukna dai rispik sainni kau.

²⁴Usnit kat kalnidinit yakat bukna dawi kalyulna dai: —¡Yang dakiwan pāt kidika yang mikityakat bukwang! Yang man kalmadinit buktayang yadatangkat yulmabauna atnik, dawak yang rahmki balna kidika bik mayultingkat dakana atnam.

²⁵Man Nabal yulni dakawinih, kidika alni dutni kidika, kat witing man ayangma yakat rispik yamwīnah,[39] witing laih rahm sins diski. Witing laih sins dis ban kaput di yamwi. Adika man dima yamyang yal adika man dima yamyang balna sihnaman kidika talwasdai.

²⁶Kaput kaunah, rahm palni Dawan yaklau man yakat madawakat aiwasman ā utuhna atnam dawak man palni tingma kau bik laihta la kat kidika yamna atnam. ¡Dawan yaklau dukih kalawarang man namangkauh yaklalauwa balna kidika bitik, dawak manyakat dutni mayamnin kukulwa balna kidika bitik kau, Nabal dutni yakat kiuna kaput witingna bik dutni yakat uina atnin!

²⁷Dawak waralaih man kalmadinit buktayang adika dini balna dauh duaitik manayang adika man dima yamyang balna man karak bang adika pasyakat wayahyayakna atnin,

²⁸dawak man lawa dutni datangkat diswang man dima yamyang yal adika akat. Rahm palni Dawan yaklau kingma lani kidika man sulama balna pasyakat manah kalana karang, kat man laih Dawan yulni trabil alahwanaman bahang, dawak man sangmaka bitik yakat watta dutni as bik wauhtas awama.

²⁹Muih as yaklau man yakat mauiwi mainin yamwarang kat, man sangmaka kidika laih yamni sakkarang man Papangma Dawan tingni dinityakat. Kaunah man namangkauh yaklalauwa muihni balna kidika laih, Dawan yaklau diruhmna karang sihm muih as kat kiwah kau kipala ruhmwa kapat.

³⁰Kaput bahang, Dawan yaklau rahm yamwarang mani kat di yayamni balna bitik yamnin yulna kidika man yulma yakat, dawak Israel tanituna mahawarang kat,

³¹man kultas awamaki dawak bik kulnam dalani dutas awama muih dutni yayamwas bik ānina utuhnaman kidika, dawak man tingma kau laihta la kat yamnaman kidika yulni bik. Dawak Dawan yaklau man yakat baraknin lani mawarang mani kat, man dima yamyang yal adika yulni ismangkatma.

³²Devid yaklau nangnitlana: —Dawan Israel Papangni laih ayangni nuhni yamnakarang warmani yang nikingyakat masihna kidika,

³³dawak man ayangma nuhni yamnakarang man lama yamni kidika yulni, kat warmani man lawa yamtangkat yang ā utuhtas danayang dawak yang palni tingki kau bik la kat kidika yamtasyang dai bahang.

³⁴Kaunah Israel Dawan ayangni kau pramis mayamtayang, yang lawik manyakat dutni mayamnik kidika witing yaklau yamwasdana, man sirihni palni yang nikingkauh aiwasman katlaih, yahan manikat Nabal laih muih al sangka as bik dis kalnin dai.

³⁵Usnit kat Devid witing yal kidika tingni kaupak duna dai uiwi kalana dini kidika, dawi kalyulna dai: —Sipki ūma yakat ismanglak yawana atnam. Man talada kapat, man rahmma balna kidika dakanayang dawak ais yayulnaman dai kidika bik manayang.

³⁶Abigail nawatwi kiuna mani kat Nabal sakdai kidika pāni yakat, witing talna dai Nabal ūni yakat kasnin alasnina as yamwi king ūni kau yamwa kapat yamwasakkat. Witing laih alasna palni sakdai dawak bik wasak dauna sakdai. Kidika yulni yal kidika yaklau di as bik kalyulwasdana dai kaunah payahwak kau kalyulna dai.

³⁷Payahwak mapiris kat, Nabal witing wanisak bitik kalbuilana mani kat, Abigail yaklau lāih palni kalyulna dai ais kalahna kidika, dawak Nabal laih sirihni palni niningyakat kalbauna, dawak kalkukuslana dai.

³⁸Ma salap bayakwak usnit kat Dawan yaklau watwi dalani kalana dai, dawak Nabal laih dauna dai.

³⁹Devid amanglawakat Nabal dauna mani kat, yulna: —¡Dawan laih ayangni nuhni yamna karang, witing yaklau biriwi yamwi yana kidika Nabal yaklau dutni yayamna dai kidika kaupak! ¡Dutni yamnik dai kidika kaupak yalaihwi yakna dawak Nabal dutni kidika laih sihm Nabal minit yakauna dawak bukna! Usnit kat Devid yaklau Abigail yakat yul kalsihna dai witing karak kaldunin yulni kidika.

⁴⁰Dawak Devid dini yamyang balna kidika Carmel yakat uina mani kat yal kidika yakat yulbauna atnin, aput kalyuyulna dai: —Devid yaklau man madutik yawinikna yulni yanasihna, kat witing yalni mayamna atnin dukih kalawa kidika yulni.

⁴¹Abigail laih saukat abukna rispik sainni kau, dawi nangnitnalana: —Yang laih Devid dini yamyang yal as mikunni yang, witing dini yamyang balna ahal kalnina suhna atnik kidika dukihyang, witing yaklau kaput yamnin yayulwarang kat.

⁴²Kidika yulna usnit kat, sirihni palni ridi kalahwi dawi dini yamyang balna yayal singka karak kalpakwi, biriku as kau kilwi ta yakat kalahwi kiuna dai Devid muih sihna dai kidika balna dangnitna kaupak, dawi Devid karak kalduduna dai.

⁴³Devid laih Ahinoam Jezreel kaupak kidika karak bik kalduduna dai, dawak bupak witing yalni balna dai.

⁴⁴Saúl walanibis yal Mical, Devid yalni kidika, Galim kaupak Lais walanibis al Palti yakat kalanadai.