Read Mayangna 1 Samuel 26 Bible Online

1 Samuel 26 - Mayangna bible

1 Samuel 26

¹Zif muihni balna laih Gabaa yakat uinadai Saúl yakat kaltalna, dawi kalyuyulna: “Devid laih yakmaldana sakki Haquila asangni ubulni yakat, kauhmak wanilang muhnitkau yakat.”

²Bahang Saúl laih Israel muihni kalbauyang balna yayamni manah 3,000 karak kalpakwi lapakna, dawi kiunadai Zif kauhnimak walang yakat Devid walna.

³Haquila asangni ubulni yakat watwi pa dudunadai, ta yaihnit yakat sakkidika dawak bik kauhmak wanilang muhnityakat sakkidika. Kaunah Devid witing kauhmak wanilang yakat sakdai kidika, witing dakana dai Saúl yaklau kidika pāni yakat uiwi kiuna kidika,

⁴kaput laih muih sihna dai yakpakwi talna atnin angdika pāni yakat Saúl kiwi watnadai kidika amanglanin yulni.

⁵Usnit kat kiuna dai Saúl watwi pa duna dai kidika pāni yakat, dawi lakwi talna dai angdika pāni yakat payayahwa dai pa Saúl dawi Ner walanibis Abner karak, kalbauyang muihni balna Saúl duwadai kidika taninatuna dai kidika. Amanglana kat Saúl laih ū labanni kidika pasyakat kamadai, kalbauyang muihni balna awaihdak pasyakat.

⁶Bahang Devid laih hitita muihni Ahimelec dawi Sarvia walanibis al Joab wirahni al Abisai karak yuldibauna dawi diyulwi dakana dai: —¿Wais dukihyah yang karak yaklakna atnin ū labanni kau Saúl sakkidika kat kiuna atnin? Abisai yaklau nangnitlana: —Yang man karak lakyawaki ki.

⁷Sihm kidika puknita yakat, Devid dawi Abisai karak uinadai ū labanni yakat. Saúl laih ū labanni pasyakat kamatusdai dawak langnisa kidika laih tunning sau yakat dulauna sakdai. Abner dawi kalbauyang muihni balna kidika laih witing yaihnit yakat kalangna bangdai.

⁸Bahang Abisai yaklau Devid yakat kalyulna: —Papang yaklau warmani man tingma yakat ana man namangkauh yaklauwa muihni kidika. Waradika yadatangkat ipamkuh dawak witing silp langnisa yakau sau yakat libittik pakuh. Dalani aslah kidika manah aitani karangki.

⁹Kaunah Devid yaklau nangnitlana: —Iwinih, kat muih as bik wah duwas laih awas karangki Dawan yaklau king as walwi yakna kidika yakat iwarang kidika.

¹⁰Dawan kau pramis alahwayang witing yaklau sangnika kidika dakyakwarang, daunin mani kiwi kawarang yakat pa, kidik awaskat kalbaunin pasyakat kawi dauwarang yakat pa.

¹¹Dawan yaklau yalaihwi yakwang king as witing walwi yakna kidika yakat inik traitalayang kidika kaupak. Kaput bahang tunningkau langsa sakkidika dawak was dinin dini kidika kauna dutang kat mawang.

¹²Aput laih Devid witing duna dai Saúl tunningkau langsa dawi was dinin dini kauna raudai kidika, dawi mahka uinadai. Muih as bik ditalwasdai dawak bik dakakawasdai; muih as bik sahmuhwasdai, kat bitik kamanabangdai bahang, bang Dawan yaklau yamwakat yamni palni kakamana dai.

¹³Usnit kat Devid laih asangsar ūk nakas yakat dakyaklana dawi asang as maluihni minityakat kilna dai, asang sar kaupak naikau. Witingna walsah yakat pa panuhni watwadai.

¹⁴Bahang Devid yaklau Abner yakat dawak kalbauyang muihni balna yakat bik parasni sarahwi diyulna: —¡Abner nangkitlatah! Abner yaklau nangnitlana: —¿Man adika waismahn king yakat kalsarahna atnam?

¹⁵Devid yaklau kalyulna: —¿Man alniman kidika awasyah Israel yakat muih as karak bik malibitnin sipawas kidika? ¿Ampadawakat man damawan king kidika tingma dinityakat āta datasmahn? Tawan kaupak muih as kana ina atnin yulni.

¹⁶Yamnaman dini kidika laih yamni awaski. Yang lawik Dawan ayangni kau pramis yamtayang manna laih daunamnaki, kat manna damanawan king Dawan yaklau walwi yakna kidika manna tingmana dinityakat āta dutasmana bahang. ¡King langnisa dawi was dinin dini tunningkau bangdai kidika walta talah, yakma pa!

¹⁷Saúl witing Devid dinit kidika amanglana mani kat, parasni yulwi sarahna: —¡Kaunah yulyabauwa kidika laih Devid man, yang walakibis! Dawak Devid yaklau nangnitlana: —Agha, king, yang.

¹⁸Kaunah, ¿ais yulni king man dima yamyang adika akat uitamahn? ¿Ais as yamnayang? ¿Ais as dutni yamnayang?

¹⁹Yang lawik king manyakat kalmadinit buktayang man lawa kaldakah man dima yamyang adika akat: Dawan yaklau man kingman kidika yang nikingkauh ana karangkat, minitdis kalanin dini kidika duwarang; kaunah muih ahal balna kulninna lani karanglaih, Dawan yaklau la dituhna karang. Kat Dawan sauni adika kaupak yayakpapamna kidika yulni, kaput karak dawan dauh balna yakat dinina yamna atnik yāyayamwi.

²⁰Yang dukih yāwaski yang āki kidika Dawan muhni kaupak naikau utuhna atnin, ¡kaunah king man laih pisa as walta alahwana likman, dawak man laih asang balna yakat yauitaman sihm wamba as yang kapat!

²¹Bahang Saúl yaklau yulna: —¡Yang walakibis, Devid, yang amanglatayang dutni yamnayang kidika! ¡Sihm tapdadas as kapat yang dai, dawak dutni nuhni as yamnayang! Kaunah nawatta aiwah, yang wattik man dutma waltas awakiki, kat adika mani man lawa yang sangkika yakat rispik kalyamnaman kidika nikingkataman bahang.

²²Devid yaklau nangnitlana: —King akat langmasa sakki. Dima yamyang balna kaupak as kaiwi dulauwang,

²³dawak Dawan yaklau kulninna nuhni dawak alas bik dis kaput minitlauwi diana karang. Man kingman kidika Dawan yaklau warmani yang tingki yakat ana kaunah, witing king walwi yakna kidika niningyakat tingki dulaunik kidika dukih yāwasdai.

²⁴Dawak warmani king man sangmaka yakat rispik yamtikda kaput, kaput Dawan dukih kalawarang yang sangkika kidika rispik yamna atnin dawak kaidinin bitik kaupak bik yalaihwi yakwarang.

²⁵Bahang Saúl yaklau parasni sarahwi yulna: —¡Yang walakibis al, Devid, ayangma nuhni yamnakarang! ¡Man laih di nunuhni yamnaman karang, dawak di bitik yakat yamni awama! Adika usnit kat Saúl laih ūni yakat nawatwi kiunadai, dawak Devid laih tanityakat kiunadai.