Read Mayangna 1 Samuel 27 Bible Online

1 Samuel 27 - Mayangna bible

1 Samuel 27

¹Kaput bik, Devid laih kulwadai: “Nai kidik awaskat sirihni, Saúl laih yaīwarangki. Kidika bahang, di yamni as yamnik sipyang kidika laih filisteo sauni yakat yawana atnik kaput karak Saúl witing kulnik alasna yadana atnin dawak Israel sauni bitik yakat bik yawalwas atnin. Kaput karak witingna tingnina kaupak irik lawaki.”

²Dawak kaput laih Devid dawi kalbauyang muihni balna 600 witing karak bangdai kidika ta yakat kalahwi uinadai Gat kingni Maoc walanibis Aquis dini yamna atnin.

³Devid dawi kalbauyang muihni balna witing karak bangdai kidika laih Gat sauni yakat Aquis karak yalalahna dai, witingna walaninabis karuk. Devid laih yalni balna bupak duwi kiuna dai: Jezreel kaupak Ahinoam kidika, dawak Carmel kaupak Nabal tingnimak Abigail kidika kauna.

⁴Saúl witing amanglawakat Devid laih Gat sauni yakat kiuna mani kat, baisa bik uiwas danadai.

⁵Dawak Devid yaklau Aquis yakat kalyulna dai: —King man yang akat yamni yakalahnin dini dutaman kat, kalmadinit buktayang adika sauni akat tawan nunuhni balna kidika kaupak as yatangkat yalahdana atnik, bahang yamni awaski king man dima yamyang adika man karak yalahnin king āwaman sauni tawanni nuhni akat.

⁶Sihm kidika mani, Aquis yaklau Siclag tawanni nuhni kidika kalanadai. Kidika yulni, warmani kat bik, Siclag laih Judá sauni kalkulna ki.

⁷Devid laih filisteo sauni yakat kurih as minitkau waiku arungka yalahna dai.

⁸Dawak kalbauyang muihni duwadai kidika balna karak kalahwi dinina dakyayakwadai Gesur, Gezer dawi Amalec muihni balna yakat, kidika sauni yakat yalalahwadai kidika, Telaim kaupak,[40] wadah niningkauh yakat, dawak Egipto kat.

⁹Kidika sauni yakat kalbauwadai dawak muih al dawi muih yal bik sangka dawasdai. Kidika minityakat sīp balna kidika, turuh yayal balna, biriku ahalmuk balna, kiamil balna dawak asna balna kat bik duwi kiwadai. Usnit kat Aquis sakdai pāni yakat nawatwi kiwadai,

¹⁰dawak Aquis yaklau kalyulwi dakawadai: “¿Warmani angdika tawanni dinibalna bitik malnamanh?” Dawak Devid yaklau nangnitlawadai: “Judá kaupak wadah niningyakat”, kidik awasbik “Jerameel kaupak wadah niningyakat”, kidik awasbik “Quenita muihni balna saunina kaupak wadah niningyakat.”

¹¹Devid laih muih al dawi muih yal bik sangka didawasdai, Gat sauni yakat uiwi witing ais yamwa kidika yulninna awas yulni. Ma balna bitik filisteo sauni yakat yalahna kidika kaput manah yamna dai.

¹²Dawak Aquis laih Devid yakat yamni kaltalwadai, dawak bik kulwadai: “Devid laih Israel niningyakat wiryaklawi dutni kalyamwi, dawak yang diki yamyang kidika ban kaput karang.”