Read Mayangna 1 Samuel 29 Bible Online

1 Samuel 29 - Mayangna bible

1 Samuel 29

¹Filisteo muihni balna laih kalbauyang muihni balna duduwa kidika bitik ududuhna dai Afec yakat, dawak Israel muihni balna laih Jezreel yakat wastuna sakyakat watwi ūnina labanni yayamna dai.

²Dawak filisteo muihni tatuna balna kidika laih kalbauyang muihni uduhna nunuhni balna karak tanitna yakat uiwabangkat, Devid dawi kalbauyang muihni balna duwadai kidika karak laih tatuna yakat Aquis karak lapapakwadai.

³Bahang filisteo muihni tunan muihni balna kidika yaklau Aquis yakat kalyulwi dakakana: —¿Hebreo muihni balna adika akat ais yamwabangyah? Aquis yaklau nangnitnalana: —Adika laih Devid, Israel kingni Saúl yaihnitkau kalbauyang muihni duwadai kidika. Kaunah yang karak kurih buas likdai, dawak yang yaihkit yakat yaklana mani kaupak warmani kat witing dutni as bik yaktasyang.

⁴Kaunah filisteo tunan muihni balna kidika laih Aquis yakat kulninna daukakalna dai, dawak kalyuyulna: —Bahang pa kalanaman yakat kalyultangkat kiwang dawak kalbaunin pasyakat mayang karak kiunin awaski; kalbaunin pasyakat mayang manikingkauh yaklaunin awas yulni. ¡Witing kingni karak yamni atnin kidika laih di aslah ki kidika laih adika kalbauyang balna tunanina kidika king muhni yakat dukiwi niningkana atnin!

⁵¡Sihm adika Devid witing yulni ubuwi yakisdinin yakat unbabauna dai kidika: ‘Saúl laih muih ahal tausin as īna dawak Devid laih muih tausin salap īna’!

⁶Bahang Aquis yaklau Devid yakat kalyulwakat kiuna dawak kalyulna: —¡Rahm palni Dawan laih sangkaki, man laih muih al as barangniman! Dawak ū labanni yakat kulnam lani balna yamtaman dai kidika uba palni yamni talnayang. Man yakat di dutni as bik yaktasyang aiwa yatalnaman mani kaupak. Kaunah filisteo muihni tunan muihni balna kidika laih yamni matatalwaski,

⁷kaput bahang kulnam alasna nawatta yawah, di as bik yamdakat dutni talninna awas yulni.

⁸Devid yaklau nangnitlana: —¿Yang ais yamnayang? ¿King man adika mani balna bitik yakat yang yakat ais talnamanh, yadatangkat man namangkauh yaklalauwa balna yakat kalbautasyang kidika?

⁹Aquis yaklau nangnitlana: —Yang yamni amanglatayang man laih uba yamniman kidika sihm Papang innisal as kapat, kaunah filisteo muihni tunan muihni balna laih barangni kulwi lalana yangna karak kalbaunin pasyakat awas atnam kidika.

¹⁰Kaput bahang, man dawi damawan dini yamyang balna man karak kalpakwi aina kidika yahan mapiris lawanama, dawak mahka nawatta yawanama.

¹¹Kaput laih, payahwakat mapiris kat Devid witing ahalni balna karak filisteo sauni yakat nawatwi uinadai, dawak filisteo muihni balna laih Jezreel niningyakauh uinadai.