Read Mayangna 1 Samuel 30 Bible Online

1 Samuel 30 - Mayangna bible

1 Samuel 30

¹Ma bas yakat, Devid witing ahalni balna karak Siclag yakat ui'kakana dai, dawak amalecitas balna laih Néguev kidika kawiyaklalana dawak Siclag yakat kalbauwi daukalmukwi dawak bik bubusna kat tatalna dai.

²Dawak bik muih yayal balna, walabis balna kidika bitik dawak muihbararak balna kauna kidika yakat bangdai kidika laihwi silak muihni duwi uinadai, muih as bik ihiwasdai karangbik.

³Devid witing ahalni balna karak tawan nuhni yakat ui'kakana mani kat bus'lana pakkat tatalna dai dawak yalnina balna, walaninabis ahal balna dawi walaninabis yayal balna kauna laihwi silak muihni duwi uinadai,

⁴parasni sarahwi kakaidana dai parasnina dis dana kat.

⁵Devid yalni balna bu dai kidika bik laihwi silak muihni yayamna dai: Jezreel kaupak Ahinoam kidika, dawak Carmel kaupak Nabal tingnimak Abigail kidika kauna.

⁶Devid laih uba palni kulnin bukna dai kat kalbauyang muihni balna kidika yaklau kipala kau bahrdang atwadai kidika yulni, bahang witingna bitik kulninna daukakalna dai witingna walaninabis balna yakat kidika dini dikalahna dai kidika yulni. Kaput bik, witing Papangni Dawan yakat yamni kalkulna dai,

⁷dawak Ahimelec walanibis al sumalyang Abiatar yakat kalyulna: —Plisma palni, prak tingni kakalhni minitkau kawa kidika duaiyatah. Abiatar laih sumalyang prakni nuhni kawa kidika Devid yakat uiwi kalana dai,

⁸Devid laih Dawan yakat aput kalyulwi dakana dai: —¿Kidika dimalyang balna uinik karangyah? ¿Uitik kuihkipah? Dawak Dawan yaklau nangnitlana: —Uitayawah, bahang uita laihmaki dawak dakyakma ki, silak muihni balna kidika.

⁹Kidika minitni yakat Devid laih ta yakat kalahwi lapakna dai kalbauyang muihni balna 600 karak kalpakna bangdai kidika karak, dawak Besor wasni yakat ui'kakana dai. Kidika yakat wawatna dai

¹⁰muih ahal 200 kidika balna laih dilunglakna dai was kidika dakyaklana atnin, dawak Devid laih muih ahal 400 kidika balna karak tanityakat uiwi kiunadai.

¹¹Kidika usnit kat sau langni yakat Egipto muihni as karak kalpapakna dai, dawak Devid muhni yakat duwi uinadai, kidika tanitkauh di kalalawakat kasna dai dawak bik kalalawakat dina dai:

¹²ani damni minik kuruhwi busna ihrna as dawak wain pasas karak kuruhwi busna bu kalalana dai. Kasna usnit kat, Egipto muihni kidika parasni duna kaldakana dai, kat madah bas dawi pukta bas di as bik kaswas dawak bik diwasdai.

¹³Bahang Devid yaklau kalyulwi dakana: —¿Wais kidika man damawanyah? ¿Angkaupak aiwamahn? Egipto muihni kidika yaklau nangnitlana: —Yang laih Egipto muihniyang, amalecita muihni as diniyamyang, kaunah ma bas dawi dakiwan yaklau yaruhmwi yadana siknis alahwanayang dai kidika yulni,

¹⁴bahang cereteo muihni balna, Judá muihni balna dawak Caleb, kidika balna saunina kaupak wadah niningkauh muihni balna kidika dinina bitik malna yawanayangna dai. Siclag kidika yakat bik kuh kau busnayangna dai.

¹⁵Devid yaklau kalyulwi dakana: —¿Kidika muihni dimalyang balna kat yadutik yawakuhtimahn? Egipto muihni kidika yaklau nangnitlana: —Papang ayangnikau pramis yayamta yaītas dawak bik dakiwan tingni yakat yahatas awamalaih, witingna bangkat maduyawaki.

¹⁶Dawak kaput laih kidika dimalyang balna bangyakat duwi kiuna dai, witingna bitik laih didahnin pāni yakat rani yalahwi di kaswi, diwi dawak alasna yamwabangdai filisteo sauni yakat dawak Judá sauni yakat bik dimamalna kidika yulni.

¹⁷Bahang Devid niningna yakat kalbauna dai mapiris kaupak maulah kat, dawak bitik kau daukalmukna dai, kaunah muih ahal wawahma binina 400 kiamil kau kilwi kiri yaklalana kidika balna laih iwasdana dai.

¹⁸Devid yaklau amalecitas muihni balna dimamalna dai kidika bitik dakyakna dai, dawak yalni balna bu dai kidika bik dakyakna dai.

¹⁹Dinina bitik didakyayakna kidika pasyakat di dibindauh kat bik diswasdai, muihbin dawak muihbarak as kat bik diswasdai, bahang Devid yaklau bitik dakyakna dai.

²⁰Sīpnina balna dawak tuninaruh balna kidika bik laihwi duna dai, dawak turuh kakangwa muihni balna kidika laih yuyulwadai, adika kuduh Devid minitna bayakna kidika.

²¹Devid witing muih ahal 200 uba palni dilunglakwas bik Besor wasni yakat watwi witing karak uiwas dadanadai kidika balna bangkat kiukana mani kat, kalahwi witing yakat dawak witing karak bangdai kidika muihni balna yakat bik dipararasna dai. Devid laih witingna yaihnitna yakat kiwi diparasna dai.

²²Kaunah witing ahalni balna kidika kaupak muih dudutni balna kidika yaklau witingna niningnayakat yuyulna dai angdika muihni balna witingna karak uiwasdai kidika witingna ais duduna kidika kaupak di as bik diawas atnin, kaunah yalnina balna dawi walaninabis balna kidika laih awaski, usnit kat duwi uiwarang.

²³Kaput kaunah, Devid yaklau yulna: —Yang karak kaltalyang muihni yayamni balna, kidika yayamwinih, Dawan yaklau di bitik mayana kidika balna karak, dawak mayang masangkika maintalna dawak mayang matingki yakat ana, kidika dimalyang balna yaklau manikingkauh kalbabauna dai kidika.

²⁴Adika niningkauh laih muih as bik rahmmana manawaskarang ki, kat di wayahnin kidika laih, watwi di maintatalwa muihni balna dawak kalbaunin pasyakat uiwa balna karak sihm kapapat duninna ki.

²⁵(Kidika mani kaupak, warmani kat kidika, adika lani duduwadai Israel yakat.)

²⁶Devid witing Siclag yakat kiukana kat, Judá muihnibararak balna witing karak kaltalyang yayamni kidika yakat disihna dai, witing niningkauh yaklalauwa muihni balna yakat dakyakna dini balna kidika kaupak buas, adika yulni karak: “Manna dutanauh adika dini dauh manatayang kidika, kidika laih Dawan niningkauh yaklalauwa balna yakat dakyaknayang dini kaupak ki.”

²⁷Dawak Betel yakat, Néguev sauni Ramot yakat, Jatir yakat,

²⁸Aroer yakat, Sifmot yakat, Estemoa yakat

²⁹dawak Racal yakat, Jerameel tawanni nunuhni balna yakat, quenita muihni balna tawanni nunuhni balna yakat,

³⁰Horma yakat, Corasán yakat, Atac yakat,

³¹Hebrón yakat dawak pa balna bitik kau witing dawi ahalni balna karak bang atna dai kidika yakat muih balna bangdai kidika yakat minit dikulwas dini disihna dai.