Read Mayangna 1 Samuel 5 Bible Online

1 Samuel 5 - Mayangna bible

1 Samuel 5

¹Papang lani baksni kidika filisteo muihni balna yaklau duduna mani kat, Eben-ezer kaupak Asdod yakat duwi uinadai;

²kidika usnit kat duwi dawan dauh Dagón ūni yakat ahana dawi dawan dauh yaihnit yakat lalakna dai.

³Kidika payahwakat mapiris kat, Asdod muihni balna uiwi kakana mani kat, Dagón kidika Dawan lani baksni muhnityakat bukna tuskat tatalna dai. Bahang Dagón kidika dulauwi watwi pāni dai yakat laksasakna dai.

⁴Kaunah payahwakat mapiris kat Asdod muihni balna kidika watwi uina dai dawak watwi Dagón kidika Dawan lani baksni muhnit yakat bukna tuskat tatalna dai. Tunani kidika dawak tingni balna bupak laih bahyamna dai dawak dūr kung minit yakat bangdai. Kaput laih muihni nuhni kidika manah watna dai.

⁵Kidika bahang warmani kat bik, Dagón sumalniyang balna kidika Asdod yakat makat yulnin ūni yakat kakawa mani kat, dūr kung kidika yakat atatakwaski.

⁶Kidika usnit kat Dawan yaklau Asdod muihni balna yakat parasni palni wah diana dai, dawak bik yamadangni kaldakakana dai dawak sauni kidika bik kasak palni daukalpamna dai.

⁷Dawak Asdod muihni balna kidika di kalahwa kidika tatalna kat yuyulna: “Israel Papangni lani baksni kidika mayang mapasking akat watwas karang, kat kidika dawan yaklau wah parasni mayawa kidika yulni, mayang akat dawak madakiwan dauh Dagón yakat bik.”

⁸Kidika bahang, filisteo muihni balna yakat yul sisihna dai witingna karak kaluduhna atninna, dawak diyulwi dakakana: —¿Israel Papangni lani baksni kidika karak ais yamdabangmayang? Witingna yaklau nangnitlalana: —Gat tawanni nuhni yakat duyawanauh. Dawak filisteos muihni balna yaklau kidika pani yakat duwi uina.

⁹Kaunah kidika yakat duwi uina usnit kat, Papang yaklau muihsakdaunin kidika, kidika tawanni nuhni yakat dahwi dana dai, dawak kidika tawanni muihni balna kidika muihnina pasyakat suru kau parasni palni dalani diana dai muihbararak balna yakat dawak walabis balna yakat bik.

¹⁰Kaput dawak filisteos muihni balna yaklau Papang lani baksni kidika Ecrón sauni yakat duwi uina dai; kaunah la baksni kidika, kidika pani yakat kiuna mani kat, Ecrón sauni muihni balna kidika sararahna dai: “¡Israel Papangni lani baksni kidika mayang akat duahaina bitik palni maiimukna atnin yulni!”

¹¹Dawak tawan nuhni kidika bitik yakat muihsakdaunin as kawi yaklana bahang wah dalani as Papang yaklau sihna dai kidika yulni, filisteos muini balna taninatuna bitik yakat diyuyulwakat uiwakat diyuyulna: “Israel Papangni lani baksni kidika akaupak duta yawanauh. Angkat pani dai kat yakat uipamtanauh, yangna bitik kau palni yana inin awas yulni.”

¹²Tawan nuhni muihni balna sararahwa kidika kisang kat kilwi kawadai, dawak dadauwas muihni balna kidika laih muihnina kidika bitik suru manah dilaihna dai.