Read Mayangna 1 Samuel 8 Bible Online

1 Samuel 8 - Mayangna bible

1 Samuel 8

¹Samuel muihbarak kalna mani kat, walanibis balna yakat Israel muihni balna kidika taninatuna āna dai.

²Walanibis tatuna Joel kidika dawak, Abdías kidika bik, witingna Beerseba sauni yakat king kakana dai.

³Kaunah walanibis balna laih papangnina kapat laih awasdai, kaunah witingna manah kapat di kidika bitik dukih diawadai, kaput bik dadawak tanina duduna dai, kaput laih la kat yayamwas dai.

⁴Kaput dawak Israel muihnibararak balna bitik kalududuhna dai dawak Ramá yakat uina dai Samuel yakat yulwi dakana atnin,

⁵kalyulna atnin yulni: “Man laih uman muihbarak kalnaman, dawak walamabis balna laih man yamtaman kapat yayamwaski; kaput bahang, king as yaktangkat yangna kingkina kawang, nisan balna bitik yakat witingna kaput yalalahwa bahang.”

⁶Samuel witing kulnin daukalna dai, kat king ūk yakwakat witingna kingnina kana atnin yulni kalyuyulwa kidika yulni, bahang Dawan yakat minit yulna dai;

⁷kaunah Dawan yaklau nangnitlana: “Tawan yaklau ais mayulwarang kidika dakah, kat witingna wantawas kidika laih man yakat awaski, kaunah kidika laih yang akatki, kat yang lawik witingna minitna yakat king awinik awas yulni.

⁸Egipto sauni kaupak diyaknayang mani kaupak warmani kat, warmani man yakat mayayamwa kapat yang akat bik yayamna, kat witingna kulninna kaupak yayakpapamna dawak dawan dauh balna yakat prinias yamna atnin yulni.

⁹Kaput bahang, witingna mayuyulwa kidika didakah; kaunah baisa kau diyultah witingna kingnina kawarang kidika witingna minitna yakat tanit yamni kalkulna dini balna kidika king duna karangki.”

¹⁰Bahang Samuel witing Dawan yaklau yul kalyulna yulni kidika wirlawi tawan muihni balna king as dukih diawakat kalyuyulwa dai kidika balna yakat diyulna dai.

¹¹Aput diyulna dai: —King as manna tamanatuna kawarang kidika laih adika dini tahawi manna kaupak: Manna walamanabis balna kidika kalbaunin pasyakat kana atnin diyulwarang, dawak buas balna kidika yakat laih kalbaunin kārni balna kau disihwarang, dawak ūk balna yakat laih aras kau disihwarang dawak ūk balna kidika laih witing yaihnit yakat kalbauna atnin diduwarang.

¹²As as balna yakat laih kalbauyang muihni 1,000 kidika balna taninatuna ana karang, dawak ūk balna yakat laih kalbauyang muihni 50 kidika balna taninatuna ana karang. Manna kaupak as as mana kidika yakat laih sauni balna kidika tuknin manapakwarang dawak di minik balna kidika dulauna atnamna, kidik awaskat kalbaunin dini balna kidika yamnamna dawak bik kalbaunin kārni dini balna kidika bik yamna atnamna.

¹³Dawak manna walamanabis yayal balna kidika bik witing dini yamna atninna diduna karang, di walapni balna kidika kahwi kalayang balna atnin, kasnin dini balna kidika lahyang balna atnin dawak plawar laihwi busyang balna atnin bik.

¹⁴Saumana yayamni balna kidika, wainmana yamak yayamni balna kidika dawak olibmana panan balna kidika bik laihwi duna karang dawak bik kabamint warkni yamyang balna tingnina yakat ana karang.

¹⁵Plamanawar minik balna kidika dawak wainmana yamak balna kidika 100 kaupak salap dakyakwa kidika manadakyakna karang, dawak kabamint warkni yamyang balna yakat dawak yaihnitkau kalbauyang[7] balna duwa yakat bik tingnina yakat āna karang.

¹⁶Dawak manna dimana yamyang ahal kidika dawak yayal kidika bik manadakyayakna karang, dawak tumanaruh ahalmuk yayamni kidika balna dawak birimanaku ahalmuk kidika bik manadakyakwi witing warkni balna yakat dipakwakat wark kalalahna karang.

¹⁷Kidika minitni yakat, sīpmana balna pāni kidika kaupak 100 kaupak salap dakyakwa kidika manadakyakna karang, dawak manna kat bik witing dini yamnamna karangki.

¹⁸Dawak king walyakta dunamana kidika dutni yamwakat yultanama manikat, Dawan laih yulmana dakawas karangki.

¹⁹Kaunah Samuel yaklau dutni kidika yulni isningpakwakat, tawan laih dakawas dawi nangnitlana dai: —Isingna kultasyangna. King as dukih yanawi,

²⁰sihm nisan ūk balna kapat atnikna dawak yangna mikitna yakat king kana atnin yulni dawak kalbaunin pasyakat bik takinatuna kana atnin.

²¹Tawan muihni balna yulnina kidika Samuel dakana usnit kat, Dawan yakat wirlawi kalyulna dai,

²²dawak Dawan yaklau nangnitlana dai: —Yulnina kidika dakah dawak king as āta diatah. Kaput laih Samuel yaklau Israel muihni balna yakat diyulna dai, angdika tawanni nuhni kaupak aiwa kat watwi nawatwi uina atnin.