Read Medumba Neto'te 11 Bible Online

Neto'te 11 - Medumba bible

Neto'te 11

¹Njoṅ nsitsha' fa lo ghù à ntshob ntshù', nke ntshob à ta' ntshob ntshù'.

²Mba benntùn lo bag ntumnyam nà, bo fon mo' tômbo' ntùm ngô Shinear, ndùlala ntete bwe.

³Bo tshob bo bo ndù: Be bom tsha'a, nton i ntùm mbwôge! Bo lo' tsha' nebom mba ndoṅ nà, ndo' zin mba netob neyabte ba' yi là.

⁴Bo tshob ndù: Be nène, be kut ta' ngô bo ta' nesà ba' ze tu i nèn tà nkum mfe kamànyam nà, be ghù lén be ju'ni, mba ndù kà be sate num njoṅ nsitsha' fa!

⁵Tshùaben swe' nse' yen ngô bo nesà ba' ze bon benntùn tshwèt nkut là.

⁶Ndùlala Tshùaben tshob ndù: Njoṅ yub fa tamte mb'a ta' nzwit ntshù', mbèn ngù à ntshob ntshù'. A be ze bo to' neghù ndùlala là, mba sàm ju ke nsi sag yube, a be ze bo nabte neghù ju là.

⁷Be swe'e, ma' fagte netèt ntshob mub be nsen ni, ndù kà bo bèn netshob nju' netèt bo.

⁸Ndùlala Tshùaben sate yub num njoṅ nsitsha' fa, bo tsin ke bèn nekut ngô.

⁹A b'a ndùlala ze bo be ntsiaṅ lén se ndù Babél là. A b'a bwe là ze Tshùaben na' ma' fagte netèt ntshob num njoṅ nsitsha' fa là. Tshùaben to' nesate yub num njoṅ nsitsha' f'a mà bwe.

¹⁰Tshù nzwit Sém ni: Sém lo tswe ngu'njù nkù, mbwe Arpakshad. Yen nu li lo be be ndù a tôg ngu'njù bàa mba dibambaṅ be là.

¹¹Sém lo bwe Arpakshad mbèn ntswe ngu'njù nkù tàn. A bèn mbwe bon bandum boa tse bènnzwi.

¹²Arpakshad tswe ngu'njù ntshob tàn ṅam ntat, mbwe Shélak.

¹³Arpakshad lo bwe Shélak mbèn ntswe ngu'njù nkù kuà ngù tat. A bèn mbwe bon bandum boa tse bènnzwi.

¹⁴Shélak tswe ngu'njù ṅam ntat, mbwe Héber.

¹⁵Shélak bwe Héber mbèn ntswe ngu'njù nkù kuà ngù tat. A bèn mbwe bon bandum boa tse bènnzwi.

¹⁶Héber tswe ngu'njù ntshob kuà ṅam ntat mbwe Pélég.

¹⁷Héber bwe Pélég mbèn ntswe ngu'njù bon tat nkù kuà. A bèn mbwe bon bandum boa tse bènnzwi.

¹⁸Pélég tswe ngu'njù ṅam ntat, mbwe Réu.

¹⁹Pélég bwe Réu mbèn ntswe ngu'njù nkù bàa ngù bwe'e. A bèn mbwe bon bandum boa tse bènnzwi.

²⁰Réu tswe ngu'njù ntshob bàa ṅam ntat mbwe Sérug.

²¹Réu bwe Sérug mbèn ntswe ngu'njù nkù bàa ngù sammbàa. A bèn mbwe bon bandum boa tse bènnzwi.

²²Sérug tswe ngu'njù ṅam ntat, mbwe Nakor.

²³Sérug bwe Nakor mbèn ntswe ngu'njù nkù bàa. A bèn mbwe bon bandum boa tse bènnzwi.

²⁴Nakor tswe ngu'njù ntshob bwe'e ṅam mbàa, mbwe Térak.

²⁵Nakor bwe Térak mbèn ntswe ngu'njù ntshob bwe'e mén bùm nkù. A bèn mbwe bon bandum boa tse bènnzwi.

²⁶Térak tswe ngu'njù ṅam sammbàa mbwe Abram, Nakor bo Haran.

²⁷Tshù nzwit Térak li: Térak bwe Abram, Nakor bo Haran. Haran bwe Lot.

²⁸Haran kwù mbwe tàab Térak, mum ko' ngô i, Ur mà Kaldéa.

²⁹Abram bo Nakor so bènnzwi: Lén nzwi Abram be Saraï, lén nzwi Nakor be Milka, ngon Haran z'a be tàa Milka bo Yisha là.

³⁰Tshù, Saraï na' mb'a kebwe, ndùlala ke ghù mén.

³¹Térak lo' mén i Abram, Lot, mén mén i Haran bo Saraï nzwi mén i, nzwi nshum i Abram boa bo tum Ur mà Kaldéa nèn ntùm ngô Kanaan. Bo zin nkum Karan, ntete bwe.

³²Térak lo tswe ngu'njù nkù bàa ngù tàn. Térak kwù à mà Karan.