Read Medumba Neto'te 13 Bible Online

Neto'te 13 - Medumba bible

Neto'te 13

¹Abram ko' mà Egipto bo nzwi i, njoṅ tshu fa ts'a ghù là, nèn nze bag Négéb. Lot nèn bo yi.

²Abram lo b'a ngafu' num nyàm, nkàb bo gol.

³Mb'a ke nte ntsho' là, a lo Négéb nèn tà nkum Bétél, dù' z'a bwôgmbwe nte ntàb i bwe, netèt Bétél bo Aï là.

⁴Kua' dù' ze tômbwôg le'te Tshùaben se Abram bwôgmbwe mbome, mbèn ntsiaṅ lén Tshùaben bwe be là.

⁵Lot ze bo Abram ke nzinte là lo ghù njùmbwe bo na', boa ba ntàb.

⁶Ngô fét bo nete bwe ntu tshob bàa, nummbe tshu lo yàm bo neshu mb'a be bo tam dù' kà ntswe là.

⁷Ntanta lo ke ntum netèt ghabéb mbwe Abram boa tse Lot. Ba Kanaan boa ba Férésia na' mbèn nke ntswe mum ngô yen ngelaṅ nà.

⁸Ndùlala Abram tshob Lot ndù: Me le't'o, a ke' bwô ndù ntanta be netèt be, ke netèt tshàm ghabéb mbwe boa tsho lo; nummbe be b'a fèle.

⁹Njoṅ ngô fa ke là mbw'o ké? Ndùlala be fagte: A be z'o nèn bu kwéb là, mba m'a' nèn bu zwim, nèn bu zwim mba m'a' nèn bu kwéb.

¹⁰Lot bù' miag mi, njen njoṅ tômbo' Yordan mb'a tshwèt mfite njoṅ dù' fa là! Tshùaben lo be sate Sodom bo Gomora, a nke ntswe à mba nka' Tshùaben nà, mba ngô Egipto ngelaṅ mèn ke mfe à nze Tsoar là.

¹¹Ndùlala Lot tsho' tômbo' Yordan ndo' ngù ze dù' yi. Lot nèn bag ntumnyam, ndùlala bo fagte.

¹²Abram tù' ntùm ngô Kanaan; Lot tswe ntùm ngô ts'a be tômbo' là, ntete tse ntàb tà nèn nkum mà Sodom.

¹³Là, ba Sodom na' mb'a tshùagkèt ben kebwô num miag Tshùaben.

¹⁴Ngelaṅ ze Lot fagte bo Abram nà, Tshùaben tshob Abram ndù: Bù' miag mu ndôte fe nsen ni nèn nkum nze bag tu mba mà ntèn, bag ntumnyam mba bag mbinyam,

¹⁵nummbe me nsi fà njoṅ yen ngô là z'o tshwèt njen nà wù mba nzwil o matmat;

¹⁶me nsi ghù nzwil o yàm mba mbab mi a nsitsha' là; be mèn ku'ni nesiaṅ nzwil o à ngelaṅ z'a ku'ni nesiaṅ mbab mi a nsitsha' là.

¹⁷Lo nsi nzinte ntùm yen ngô li, num bag i ze nesà mba ze nevôge, nummbe me nsi fà i wù.

¹⁸Abram tsho' ntàb i bwe nèn ntswe mbaṅ ntù mbwe' mi a be Mamré nze bag Hébron nà. A bom tômbwôg le'te Tshùaben yi bwe.