Read Medumba Neto'te 15 Bible Online

Neto'te 15 - Medumba bible

Neto'te 15

¹Tshen nu li lo be tshùa, Tshùaben tshob Abram mum njem ndù: Kà bwôg me Abram! Me b'a yu tshètntsho, nda' o nsi b'a ze ndùb.

²Abram bùnte ndù: Tshùaben Nsi, ke z'o nsi fà m'à? Tshù me li me tshwèt nèn ke ghù mén nà; njùndà àm ke b'a Eliézer ze Damas ké?

³Abram bèn ntshob ndù: Tshù, o ke' fà kua' nzwit me, nkuan àm nsi bèn jù ndà àm.

⁴Ndùlala Tshùaben tshob yi ndù: A ke' b'a yen mén nà bèn jù ndà o, là kua' mén z'a tum zwe' o là nsi bèn jù ndà o.

⁵A tshob ndùlala, ndo' Abram ntum yi njù, ntshob yi ndù: Bù' miag mu mfe kamànyam nsiaṅ nsa, a be ze b'o ku'ni nesiaṅ nà. Tshùaben tshob Abram ndù a b'a mba nzwil i nsi be là.

⁶Abram bam mba Tshùaben tshob là; Tshùaben lo' Abram mba mèn netsin nà num yen nu là.

⁷A tshob ndù: Me b'a Tshùaben z'a ghù o tum Ur mà Kaldéa, num nefà yen ngô li wù là.

⁸Abram tshob ndù: Tshùaben Nsi, me lèn à ndùke ndù me nsi ghù yen ngô l'à?

⁹A tshob yi ndù: Lo' mén mfô z'a ghù ngu'njù tat là, mbwe mba komnjù tse bo ghù ngu'njù tat là, bwoṅtambia' bo mén ngon saṅe.

¹⁰Abram lo' tshen nyàm nà, nkeb yub ndaṅndaṅ netèt bwe, njabte yub bag bag, là ke fagte nsaṅe.

¹¹Nsaṅ mi a be ngom nyàm nà tsho' ngwù num fe tshobe, Abram ta' yube.

¹²Lagnyam be bi mo' neta miaglo ghom Abram, bwôg bo mo' njam ndùb se' ngwù num i.

¹³Tshùaben tshob Abram ndù: Lèn ndù nzwil o nsi be ghùn ntùm ngô z'a ke' b'a yub là. Bo nsi lo' yub ghù kuan yi, ghùtni yub num ngu'njù nkù kuà.

¹⁴Me nsi naṅ ntsha tu ngô tse bo nsi be kuan bwe là, bo tum ntùm tshen ngô là boa mfu' yàme.

¹⁵Tu wul o, o nsi nèn tèt tà tsho à ntùm fite. O nsi ywèn kua' ntùm mebwô kà kwù.

¹⁶A nsi be tôg zwiaṅ benntùn kuà nzwil o bèn mbèn njam nsen ni; nummbe mfànnu ba Amor ke' yoṅ ndun me lo nsi num bo.

¹⁷Ngelaṅ lagnyam bi là, mo' neta njam vù, mo' mbwôg nke nkag nzembwôge, tsemo' lambwôg tôg netèt mbàb nyàm tse bo keb nkam mbàa njabte nsi là.

¹⁸Num sen lé'njù là, Tshùaben wat kàn bo Abram ntshob ndù: Me nsi fà yen ngô li nzwil o, neto' fe num ta'ntse z'a Egipto là tà nèn nkum ta'ntse ndùb, ta'ntse Efrat,

¹⁹boa ngô ba Kénita, ngô ba Kénizia, ngô ba Kadmonia,

²⁰ngô ba Hétia, ngô ba Férésia, ngô ba Refaït,

²¹ngô ba Amor, ngô ba Kanaan, ngô ba Guirgahia bo ngô ba Jébusia.