Read Medumba Neto'te 16 Bible Online

Neto'te 16 - Medumba bible

Neto'te 16

¹Saraï nzwi Abram lo ke bwe mén mfà yi. Saraï lo ghù mo' nkuan i ze mènnzwi, ngon Egipto, lén se Agar.

²Saraï tshob Abram ndù: Tshù, Tshùaben ghù me be kebwe; se'e, me le't'o, ndo' nkuan àm ze mènnzwi, be mo' ndù me tshùa njam i ngù mén mandum. Abram ju' ntshu nzwi i.

³Ndùlala Saraï lo' nkuan i ze mènnzwi Agar, ngon Egipto mfà Abram ndu i mba nzwi i là. A lo be be ndù Abram tswe ntùm ngô Kanaan ngu'njù gham.

⁴Abram lo' Agar, a be jùm. Ngelaṅ Agar yen ndù a be jùm nà, a to' newag màfa' i.

⁵Saraï tshob Abram ndù: Tshabte ze Agar tshwèt ntshabt'àm yi là lôt'a wù. Me lo fà nkuan àm ze mènnzwi mum mbu mu, ndonni z'a yen ndù a jùm nà, me tù' à kelo' ngù ju yi num miag mi. A bwô Tshùaben bèn mbe ngatsho'te netèt bag.

⁶Abram tshob Saraï ndù: Tshù nkuan o ze mènnzwi là, o bèn ngù ntsha num i, ghù yi mb'o bèn nkô là. Ndùlala Saraï ghùtni Agar, k'a kù nèn ngùanesà.

⁷Angél Tshùaben yen Agar mbaṅ mo' tumnsi ntse num kônkwa, mbaṅ tumnsi ntse z'a be num manze Shur là,

⁸ntshob yi ndù: Agar nkuan Saraï ze mènnzwi, o fe à yà, nke nèn yà? A bùnte ndù: Me ke nkù à màfa' àm Saraï.

⁹Angél Tshùaben tshob yi ndù: Bèn njam ntèt màfa' o, nkab tu o nsi mbwe i.

¹⁰Angél Tshùaben tshob yi ndù: Me nsi ghù nzwil o yàme, njàm tà mèn ke ku'ni nesiaṅ i.

¹¹Angél Tshùaben tshob Agar ndù: Tshù wù là z'o be jùm nà, o nsi bwe mén mandum, yab lén se ndù Ismaél, nummbe Tshùaben ju' nz'o ntùm ngùtni o.

¹²Yen mén nà nsi b'a mba kekwèn tshwèt là. A nsi bù' bu i nsi num njoṅ benntùn fa, bu njoṅ benntùn fa lo nsi num i. Ze dù'ntswe ke nsi tamte boa ze fèt tse.

¹³Agar yab lén Tshùaben z'a na' ntshob nu yi là ndù: O b'a Nsi z'a be njen nà. Nummb'a lo tshob ndù: A b'a kua' nsen ni ze me yen ntshùa mèn z'a ke njen àm nà ké?

¹⁴A ndùlala, bo be ntsiaṅ sen tôntse là Lakaï-Roi, yen nà bagt'a ndù: Mén z'a be ntùn, mén z'a be njen àm nà. Sen tôntse là b'a netèt Kadèsh bo Béréd.

¹⁵Agar bwe mén mandum Abram. Abram tswi lén mén ndù Ismaél.

¹⁶Agar lo be bwe Ismaél ndù Abram tswe ngu'njù ṅam bwe'e.