Read Medumba Neto'te 2 Bible Online

Neto'te 2 - Medumba bible

Neto'te 2

¹Tshù mba Nsi miagte nenabte kamànyam, tsha'a, boa tshu ts'a mfe kamànyam nà.

²Nsi miagte fa' se num mbatte lé'njù sammbàa; ndùlala mfite wul i num mbatte lé'njù sammbàa num njoṅ fa' fa s'a fa' là.

³Nsi naṅ mbotni num mbatte lé'njù sammbàa, ndo' sen lé'njù là, nummb'a lo fite wul i num sen lé'njù là num njoṅ mfa' mi fa.

⁴Tshù neto'te kamànyam bo tsha' ngelaṅ ze Nsi nabte yub là. Num lé'njù se Tshùaben nabte tsha' bo kamànyam nà,

⁵sàm tù lo ke yoṅ mbe num tsha'a, sàm nenà ke yoṅ mbile, nummbe Tshùaben Nsi lo ke yoṅ ngù mbaṅ lo num tsha'a, mènntùn ke yoṅ mbe bwe num nedù' nà.

⁶Là, mo' ntse lo ke ntum nsi, nke nzwi' num njoṅ nà fa.

⁷Tshùaben lo' tsha' mbom mèn yi, mfùag ywèt yôg ntùm mfaṅ ntselag mi, mèn tù' mènntùn.

⁸Tshùaben Nsi bwe mo' nka' mà Edèn, nze bag ntumnyam, njab mènntùn z'a bom nà ntùm bwe.

⁹Tshùaben Nsi ghù mba sit tù lo s'a bwô neyene, mba nejù ntàm mi là bit mum nà. Mba tù yôg bit netèt nka', mba tù nelèn mebwô bo kebwô.

¹⁰Mo' ta'ntse nke ntum Edèn, nke nzwi' nka', ndo bwe mfagte mbu mi nkuà.

¹¹Lén mbwe ta'ntse b'a Pishon. A yi bèn nke ndiaṅ njoṅ ngô Havila fa dù' ze gol be là mbume,

¹²gol yen ngô là bwô neshu. Bedelium bo loṅ onyx b'a bwe.

¹³Lén mbatte ta'ntse bàa b'a Gihon. A yi bèn nke ndiaṅ njoṅ ngô Kush fa mbume.

¹⁴Lén mbatte ta'ntse tat b'a Tigre, nke nswe' mà Assur, nze bag i z'a be bag ntumnyam nà. Mbatte ta'ntse kuà b'a Efrat.

¹⁵Tshùaben Nsi lo' mènntùn, nte i ntùm nka' Edèn ndù a ke ndù' mbèn nke mbébe.

¹⁶Ndùlala Tshùaben Nsi fà ntshù' mènntùn ntshob ndù: O ghù nejù ntàm ntù fa mi a ntùm nka' là,

¹⁷là, kà jù tàm tù nelèn mebwô bo kebwô, nummb'o nsi kwù lé'njù s'o nsi jù là.

¹⁸Tshùaben Nsi tshob ndù: A ke' bwô ndù mandum tswe tù' i. M'a' nabte ngaywimt'é z'a fut'é là mfà yi.

¹⁹Tshùaben Nsi lo' tsha' nabte njoṅ nyàm tshwèt fa yi, boa njoṅ nsaṅ fa mfe kamànyam, ngù bo se' mbaṅ mandum num neyen mba b'a tsiaṅ yub là, mba ndù njoṅ tshu nezinte fa lo' lén se mandum fà yi là.

²⁰Ndùlala mandum tsiaṅ nyàm nke'nke' ndèn mube, ntsiaṅ nsaṅ mfe kamànyam ndèn mube, ntsiaṅ nyàm tshwèt ndèn mube. Là, mbe se' mba mandum nà, a ke yen sàm ngaywimt'é z'a fut'é là.

²¹Tshùaben Nsi ghù mo' neta miaglo ghom mandum, a zi; a lo' mo' kitnsa se, nkabte mbàb num dù' i.

²²Tshùaben Nsi lo' kitnsa s'a lo' num mandum nà, nabte mènnzwi yi, ndo' i nèn yi mbaṅ mandum.

²³Mandum tshob ndù: Yen yoṅ i li, tshù vôg s'a lo num mvôg màm ni, mbàb z'a lo num mbàb àm nà. Bo nsi tsiaṅ yen mèn ni ndù mènnzwi, nummbe bo sô i à num mandum.

²⁴A ndùlala mandum nsi faṅ tàab bo màab lat num nzwi i, bo tamte ntù' ta' wut ntshù'.

²⁵Mandum bo nzwi i na' mb'a tunntôg, là tuswe ke ke nko yube.