Read Medumba Neto'te 22 Bible Online

Neto'te 22 - Medumba bible

Neto'te 22

¹Tshen nu là lo be tôge, Nsi ghù lo' nzenu num Abraham, ntshob yi ndù: Abraham, Abraham bùnte ndù: Tshù me li.

²Nsi tshob yi ndù: Lo' nshum o, z'a be wù ntshù', z'o be nkô i là, Isak, nèn yi mum ngô Morija, num mbat ze me nsi la'te wù là, nton i bwe fafa ngamt'àm yi.

³Abraham lo nsi mà nkebnjù, nabte kekwèn i, ndo' ghafa' tse bàa, mba nshum i Isak. A bag ntshwèn jule'te Nsi z'a nsi ton nà, ntam nze nenèn dù' ze Nsi na' ntshob yi là.

⁴A be kum lé'njù tat Abraham bù' miag mi njen dù' là tà ngùanesà.

⁵Abraham tshob ghafa' tse ndù: Bin tswe nsen ni bin à kekwène. Bag mén àm nèn nsen din ngamte Nsi bwe kà nse'e.

⁶Abraham lo' ntshwèn jule'te Nsi z'a ton nà, njab tu nshum i Isak, ntshùb mbwôg bo bi bu i, bo yi nèn ntu tshob bàa ku ntshù'.

⁷Isak bétte tàab Abraham ndù: Tàa, a bùnte ndù: Ṅ nshum àm. Isak bèn ntshob ndù: Tshù mbwôg bo ntshwèn nà, là, njùmbwe ze be nsi ton nà yà?

⁸Abraham bùnte ndù: Nshum àm, a b'a Nsi nsi bèn fà njùmbwe ze be nsi ton yi là be; bo yi nèn ntu tshob bàa ku ntshù'.

⁹Ndùse bo zin nkum dù' ze Nsi la'te là, Abraham bom tômbwôg bwe, njab ntshwèn mbwôge, ngom nshum i Isak nkule, njab i num tômbwôge, num ntshwèn.

¹⁰Abraham tshag bu ndo' bi nese tô nshum i yi.

¹¹Là Angél Tshùaben tsin mfe kamànyam ntsiaṅ i, ntshob ndù: Abraham! Abraham! Abraham bùnte ndù: Tshù me li,

¹²Angél tshob ndù: Kà yab bu num mén nà! Kà ghù sàm kebwô num i. Me lèn ndonni ndù o be mbwôg Nsi, nummb'o ke' gha me nelo' nshum o ngamt'àm yi, yi z'a be nkwimén nà.

¹³Abraham bù' miag mi njen mo' komnjù ndù ndù' lamte num ndô mi num tswe'tù. Abraham nèn nkiagte komnjù là, nton Nsi num ze dù' nshum i.

¹⁴Abraham tswi lén dù' là ndù: Tshùaben bèn fà. Ndùlala bo be ntshob ndonni ndù: Tshùaben nsi fà ju z'a tsi là mfe num mbal i.

¹⁵Angél bèn ntsin mfe kamànyam ntsiaṅ Abraham mbatte yoṅ bàa,

¹⁶ntshob yi ndù: Tshùaben tshob ndù: Mb'o ghù ndùlala, ke gha me nelo' nshum o ngamt'àm yi, yi z'a be nkwimén nà,

¹⁷me nsi yab kàn wù, ghù nzwil o yàm mba nsa mi a mfe kamànyam nà, njàm mba nkwango' mbaṅ dibantse là, ghù ndùlala kà nzwil o lo' ngô ghakeban tse.

¹⁸Me nsi tshùa njam nzwil o kà yab kàn ngôngô ts'a nsitsha' là, nummb'o ju' ntshu àm.

¹⁹Ndùlala Abraham bèn njam mbaṅ ghafa' tse, boa bo lo ku ntshù' nèn Ber-Shéba dù' ze Abraham ke ntswe là.

²⁰Tshen nu li lo be tôge, Abraham ju' ndù Milka bwe bon bandum mfèl i Nakor.

²¹Uts tuswe i bo Buz mfèl i, Kemuel, tà Aram,

²²Késed, Hazo, Jidlaf bo Bétuél.

²³Bétuél bwe Rébéka. Tshen benntùn fom ni b'a tse Milka na' mbwe Nakor, mfèt Abraham nà.

²⁴Màndà i ze lén se be Réuma là bwe ze Tébak, Gaham, Tabash bo Maaka.