Read Medumba Neto'te 28 Bible Online

Neto'te 28 - Medumba bible

Neto'te 28

¹Isak Tsiaṅ Yakob, njab kàn yi, mfà ntag yi ntshob ndù: A ke' bwô ndù o so mènnzwi netèt ngonngon Kanaan.

²Lo nsi nèn Padan-Aram, tunndà Bétuél tà màan, ndiag yu mènnzwi netèt ngonngon Laban, mfèt màan.

³A bwô ndù El-Shaddaï yab kàn wù ngù o bwe nzwil o yàme, ntù' mbumte ngôngô.

⁴A bwô ndù a yab kàn wù bin nzwil o ndaṅndaṅ mb'a na' njab kàn Abraham nà, nedù ngô z'o be ngùn ntùm bwe ndù a lo fà Abraham nà tù' yu.

⁵Isak tum Yakob Padan-Aram a nèn la' Laban, mén Bétuél ze Aram. Laban b'a mfèt Rébéka, màa Yakob bo Esau.

⁶Esau yen ndù Isak lo yab kàn Yakob ntum i ndù a lo nèn Padan-Aram diag ze mènnzwi bwe, mba ndù a fà ntag yi ntshob ndù k'a so mènnzwi netèt ngonngon Kanaan.

⁷A yen ndù Yakob lo ju'ni tàab bo màab nèn Padan-Aram.

⁸Esau lèn ndù nu ngonngon Kanaan lo ke mbag tàab Isak.

⁹Esau lo nèn mbaṅ Ismaél. A so Mahalat ngon Ismaél, nshum Abraham, mba mfèt Nebajot ze mènnzwi. A so yen mènnzwi li nkwi'te mbaṅ ts'a ghù là.

¹⁰Yakob lo Ber-Shéba nèn Karan.

¹¹A kum mo' dù' nzi bwe, nummbe lagnyam lo bi. A lo' mo' loṅ bwe, ngù tomte tu yi, nô nsi num yen dù' là.

¹²A zi mo' njem, njen ndù mo' tuko' te num nsitsha'a, tu i nèn nkum mfe kamànyam. A yen Angél Nsi, tse bo tshwèt nko' num yen tuko' là mbèn nke nswe' là.

¹³Tshùaben lo tsin mfe tu tuko' ntshob ndù: Me b'a Tshùaben Nsi tàan Abraham bo Nsi Isak. Dù' tsha' z'o nô num bwe là, me nsi fà i wù mba nzwil o.

¹⁴Nzwil o nsi b'a mba mbab mi a num nsitsha' là. O nsi sa neto' fe bag ntumnyam nèn nkum bag mbinyam, sa fe tu nèn kum mà ntèn. Njoṅ tunndà fa nsitsha' nsi tshùa njam o bo njam nzwil o kà kwé kàn.

¹⁵Tshù, bag wù bèn mbe, me nsi béb o num njoṅ dù' fa ts'o nsi nèn nà, bèn lo' o se' yi mum yen ngô li, nummbe me ke nsi ghua' o ke be ndù me ghù ju ze me tshob wù là bumte.

¹⁶Yakob bam num miaglo, ntshob ndù: Kua' nenùne, Tshùaben num num yen dù' li, là tu wul àm, me lo ke lèn tshàm.

¹⁷A bwôg, ntshob ndù: Mi' yen dù' li kuni neshu! Ndà Nsi num nsen ni, nzendà kamànyam num nsen ni!

¹⁸Yakob lo nsi mà nkebnjù, ndo' loṅ s'a lo ngù tomte tu yi là, nte tù mba loṅla' là, naṅ mfèt num tu bwe.

¹⁹A yab lén dù' là ndù Bétél; là lén ngô na' be mbwembwe mb'a ndù Luz.

²⁰Yakob ghù nka'ni Nsi ntshob ndù: A be z'o béb àm, bag wù nke mbe num njoṅ yàm nkatte fa ze me tshwèt nène, a be z'o fà bàn bo nzwe me,

²¹me bèn njam ntùm ndà tàa ntùm fite là, mba wù Tshùaben nsi be Nsi àm.

²²Tshù, mba sen loṅ ni ze me te mba loṅla' là, nsi be ndà o, me bèn ngabte njoṅ tshu ts'o nsi fà me là nze gham, mfà bag i ze ntshù' wù.