Read Medumba Neto'te 29 Bible Online

Neto'te 29 - Medumba bible

Neto'te 29

¹Yakob tam manze, nèn ntùm ngô bon bag ntumnyam.

²Tshù, a yen mo' tôntse mà tshwèt, ndù bwoṅ mbwe tat nôte mbaṅ bwe. A b'a mum sen tôntse ze mbwe ke nu ntse là. Loṅ se bo kabte ntshu i yi là lo ghu' neshu.

³A lo ke mbe ndùse njoṅ bwoṅ nyàm fa tse'te bwe là, ghabéb mbwe bwoṅte loṅ ntshu tôntse nyàm nu ntse, bo bèn mbwoṅte loṅ mbèn yi dù' i, ntshu tôntse.

⁴Yakob bètte ghabéb mbwe ndù: Fèt tshàm, bin b'a bon yà? Bo tshob ndù: Bag b'a bon Karan.

⁵A bètte yub ndù: Bin lèn Laban, nshum Nakor ké? Bo tshob ndù: Ṅ,

⁶a b'a ndùke? A tswe mebwô, tshù mba kua' ngon i Rashél là z'a tshwèt nse' boa mbwe là.

⁷Yakob tshob ndù: A ke' à kua' mbwôgtshù, a ke' b'a ngelaṅ ze nyàm be mbumte li. Bin ghù mbwe nu ntse, bin lo' yub nèn yi kônga bo fèt nenà.

⁸Bo tshob ndù: Be bag ke ghù ndùlala ke be ndù njoṅ bwoṅ nyàm fa bumte, ke be ndù bo bù' loṅ ntshu tôntse, kà bag njôg mfà nze nyàm nu ntse.

⁹Ndùse bo ke nke' ntshobte là, Rashél ṅwag boa mbwe tàab, nummb'a na' mb'a ngabéb mbwe.

¹⁰Ndùse Yakob yen Rashél ngon Laban, mfèt màab mba mbwe Laban mfèt màab là, Yakob kù' nèn mbwoṅte loṅ ntshu tôntse, ngù mbwe Laban mfèt màab nu ntse.

¹¹Yen nà be tôge, Yakob tate Rashél, ntshag nz'é tù, ṅwate.

¹²Yakob soṅ Rashél ndù a b'a mfèt tàab, mbe nshum Rébéka. Rashél kù nde nèn ntshob tàab.

¹³Ngelaṅ Laban ju' yen tshô là, ndù a b'a Yakob nshum mfèl i ze mènnzwi là, a kù nde nèn mbumte bo yi, ntsiag i, ntat'é, ngù a tsho ndà i. Yakob soṅ Laban njoṅ yen nu là fa.

¹⁴Laban tshob yi ndù: Kua' nenùn o b'a lem tshàm! Yakob tswe la' i ta' ṅwù ndaṅndaṅ.

¹⁵Laban tshob Yakob ndù: Mb'o be mfèl àm nà, o nsi fa' m'a banban ké? Tshob njoṅ z'a bwô ndù me ke mbé o là.

¹⁶Laban lo ghù bonngon bàa: Lén ze mbwe be Léa, lén ntù'njam be Rashél.

¹⁷Miag Léa ziag neshu, là Rashél lo bwô num mbaṅ wut mba num se i.

¹⁸Yakob lo ke nkô Rashél, ntshob ndù: Me nsi fa' wù num tu Rashél ngon ze njam ngu'njù sammbàa.

¹⁹Laban tshob ndù: A be mebwô ndù me fà i wù ntshùa nefà i mo' mandum ze ghua. Bag wù tswe.

²⁰Ndùlala Yakob fa' num ngu'njù sammbàa num tu Rashél, a nke ntswe yi à mba bon lé'njù là, nummb'a lo ke nkô i neshu.

²¹Yakob tshob Laban mo' lé'njù ndù: Fà nzwi àm me, nummbe lé'njù tse be tshob là bumte, me kô nelo' i ndonni.

²²Laban tse'te njoṅ benntùn fa tse bo be yen dù' là là, ngù jùa ndùb bo.

²³A be mfetnjù, a lo' ngon i Léa, nèn mfà Yakob, a lo' i.

²⁴Laban fà kua' ze ngafa' ze mènnzwi lén se Zilpa ngon i Léa, ndù a ke mfa' yi.

²⁵Njù be làne, Yakob yen ndù a lo mba Léa, a tshob Laban ndù: Ke z'o ghù m'à? Me lo ke ke fa' wù à num tu Rashél ké? Numk'o ntatt'àm à?

²⁶Laban tshob ndù: A ke' be matnu nsen ni nebwôg na ntù'njam ntshùambwe!

²⁷Miagte ze ngabnjù yen mén ni, me nsi fà mba yen nà wù num fa' ngu'njù sammbàa s'o nsi bèn fa' là.

²⁸Yakob ghù ndùlala, miagte ze ngabnjù Léa, Laban fà ngon i Rashél yi, a tù' nzwi i.

²⁹Laban fà kua' ngafa' i ze mènnzwi lén se Bila ngon i Rashél ndù a ke mfa' yi.

³⁰Yakob lo' Rashél, nkô i ntshùa mba kua' Léa. Ndùlala Yakob bèn mfa' ju Laban ngu'njù sammbàa.

³¹Tshùaben be yen mba bo me'te Léa là, ngù a lét; là Rashél be kebwe.

³²Léa jùm, mbwe mén mandum. Léa tswi lén se Rubèn, nummb'a lo tshob ndù: Tshùaben yen mba bo me't'àm nà, ndonni ndu àm nsi kô àm.

³³Léa bèn njùme, mbwe mén mandum, ntshob ndù: A b'a ndù Tshùaben yen ndù bo ke' be kô àm, mbèn mfà mba yen mén ni me. A tswi lén se ndù Siméon.

³⁴A bèn njùm mbwe mén mandum, ntshob ndù: Ndu àm nsi so wul i num àm yen yoṅ i li, nummbe me bwe bon bandum yi tat. A ndùlala bo nsi tsiaṅ mén ndù Lévi.

³⁵Léa bèn njùme, mbwe mén mandum, ntshob ndù: Me nsi nyàmte Tshùaben yen yoṅ i li. Ndùlala, a tswi lén se Yuda. A keb bwe, ke bèn nebwe.