Read Medumba Neto'te 3 Bible Online

Neto'te 3 - Medumba bible

Neto'te 3

¹Nyu na' mb'a ngazete netèt njoṅ nyàm tshwèt fa tse Tshùaben Nsi nabte là. A tshob mènnzwi ndù: A kua' nenùn ndù Nsi tshob bin mbe kà bin jù tàm njoṅ ntù fa mum nka' ké?

²Mènnzwi tshob nyu ndù: Bag ghù nejù tàm ntù mi a ntùm nka' là,

³là, mbe se' mba tàm tù s'a netèt nka' là, Nsi lo tshob ndù kà bag jù ke bèn nkwage, mbwôg ndù kà bag kwù.

⁴Nyu tshob mènnzwi ndù: Nga, bin ke nsi kwù,

⁵là Nsi lèn ndù lé'njù se bin nsi jù là, miag min nsi to, bin be mba Nsi là, ndèn mebwô bo kebwô.

⁶Mènnzwi yen ndù tàm tù bwô nejù mba neyene, nta njoṅ, nke nga' nze zenu. Ndùlala, a lo' tàm se njù, mbèn mfà mba se ndu i z'a be mbaṅ i là, a jù.

⁷Miag mba we lo netèt bo to, bo lèn ndù bo b'a tunntôg, ndùlala bo yoṅte tshaten ntaṅ tun bo.

⁸Bo ju' nze Tshùaben Nsi z'a ke nkatte ntùm nka' mfetnjù là. Mandum bo nzwi i lem tà ngùanesà num miag Tshùaben Nsi, netèt ntù mi a ntùm nka' là.

⁹Là Tshùaben Nsi tsiaṅ mandum ntshob yi ndù: O b'a yà?

¹⁰A bùnte ndù: Me lo nju' nz'o ntùm nka', mbwôge, nummbe me b'a tunntôg. A ju z'a ghù me lem nà.

¹¹Tshùaben Nsi bètt'é ndù: We z'a soṅ o ndù o b'a tunntôg à? O jù tàm tù se me na' nto' o nejù là kà?

¹²Mandum bùnte ndù: Mènnzwi z'o yab mbaṅ àm nà fà tàm tù me, kà me njù.

¹³Tshùaben Nsi tshob mènnzwi ndù: Numk'o ngù yen nu li à? Mènnzwi tshob ndù: Nyu fùt'àm kà me njù tàm tù.

¹⁴Tshùaben Nsi tshob nyu ndù: Mb'o ghù ndùlala là, ndon num tu o netèt njoṅ nyàm nke'nke' fa, mba netèt njoṅ nyàm tshwèt fa. O nsi ke zin à num bam so, ke jù tsha' njoṅ lé'njù yôg so fa!

¹⁵Me nsi yab nkembàn netèl o bin mènnzwi, netèt nzwil o bo ze nzwit. Nzwil i nsi ke nya' tu o, tu wul o, o ke nya' i, tshôg tun ku i.

¹⁶Tshùaben Nsi tshob mènnzwi ze ndù: M'a' kwi'te tsho nge', nkwi'te tsho nge' ndùs'o be jùm nà; o nsi bwe bon à ntùm nge' yàme; ntshàmntù nsi ke lo' o nèn yi mbaṅ ndu o, tu wul i ke ntô o.

¹⁷Tshùaben Nsi se' num mandum ntshob ndù: Mb'o ju' ntshu nzwi o, njù tàm tù se me na' ntshù' o yi là, ndon tshùa num tu o ntsho num tsha'a. O nsi ke sô yu ju neyôg yi bw'a ntùm nge' yàme, ndùlala num njoṅ lé'njù yôg so fa.

¹⁸Njô boa kwékwénàndô nsi bit num tsha'a, o ke mfèt nenà.

¹⁹O nsi ke kwiaṅ ze'ni se o kà ghù ju z'o jù là, ndùlala tà nkum ndùs'o bèn njam mum tsha' là, nummb'a dù' ze bo lo' o bwe là. Tshù, o b'a mbabe, mbe ndù o nsi bèn tù' mbabe.

²⁰Adam tsiaṅ nzwi i ndù Eva, nummb'a b'a mà njoṅ benntùn fa.

²¹Tshùaben Nsi lo' ngub nabte nzwe yi ma' num mandum bo mènnzwi.

²²Ndùlala Tshùaben Nsi tshob ndù: Tshù mènntùn n'a tù' mba be nke ndèn mebwô bo kebwô là! Ndonni a bwô nezete ndù k'a tshag bu i nkàb mba tàm tù yôg, njù, ntù' yôg tse matmat!

²³Ndùlala Tshùaben Nsi ta' i ntùm nka' Edèn, ndù a ke ndù' tsha' ze bo na' nsô i bwe là.

²⁴A ta' mènntùn, njab ba kérubim ntshu nka' Edèn boa nsansa ṅwi mbwôg tse bo ke nshùm nà, ndù bo ke mbéb manze z'a nèn nkum num tù yôg là.