Read Medumba Neto'te 30 Bible Online

Neto'te 30 - Medumba bible

Neto'te 30

¹Rashél yen mba bo Yakob ke' bwe mén nà, nto' nete miag lànghe' num mfèl i Léa, ntshob Yakob ndù: Ghù me bwe bon bandum, ntag ndùlala mba m'a' kwù.

²Ntù Yakob ya num Rashél, a tshob ndù: Me ke' b'a Nsi z'a gha neghù o bwe là.

³Rashél tshob ndù: Tshù ngafa' àm ze mènnzwi Bila là, lo' i, a bwe bon me te num nku màm, me tshùa njam i ngù yàm bon bandum.

⁴Ndùlala, a fà ngafa' i ze mènnzwi Bila Yakob mba nzwi i là. Yakob lo' i.

⁵Bila jùm, mbwe mén mandum Yakob.

⁶Rashél tshob ndù: Nsi ghù nunetsin me, mbèn nju' nz'àm, a fà mén mandum me. Ndùlala, a tswi lén se Dan.

⁷Bila ngafa' Rashél ze mènnzwi bèn njùme, mbwe mo' mbatte mén mandum Yakob.

⁸Rashél tshob ndù: Me ma' mfèl àm ze mènnzwi ntsho z'a tôgte ze neyen mèn nyiaṅtu là, ndonni me tshùa ntsho. Ndùlala, a tswi lén se ndù Néftali.

⁹Léa yen mb'a keb bwe là, ndo' ngafa' i ze mènnzwi Zilpa mfà Yakob mba nzwi i là.

¹⁰Zilpa ngafa' Léa ze mènnzwi bwe mén mandum Yakob.

¹¹Léa tshob ndù: Ke lèn fu' li à? Léa tswi lén se Gad.

¹²Zilpa ngafa' Léa ze mènnzwi bwe mbatte mén mandum bàa Yakob.

¹³Léa tshob ndù: Me b'a ngafen, nummbe ngonngon nsi tsiaṅ àm ngafen ndonni. A tswi lén se ndù Aser.

¹⁴A be ngelaṅ netsho' ngefele, Rubèn nèn mà tshwèt, ntsho mfon ntàm tù nkôni bwe. A lo' njoṅ i fa nse' mfà màab Léa. Rashél tshob Léa ndù: Fà màm ntàm tù nkôni mi nshum o se' yi là.

¹⁵Léa tshob yi ndù: Mb'o lo' ndu àm nà ke' ku' k'o bèn nke ndiag nekwé mba ntàm tù nkôni nshum àm ké? Ndùlala Rashél tshob ndù: A mbe ndùlala bin yi zi sènni, yen tèttswe' li, ndo' mbate ntàm tù nkôni nshum o yi.

¹⁶Yakob be fe tshwèt mfetnjù, Léa tum mbumte bo yi, ntshob ndù: O nsi tsho àm ndà sènni, nummbe m'a lo' kua' ntàm tù nkôni nshum àm njab tshwèt yi. Yakob nèn nzi bo yi yen tèttswe' là.

¹⁷Nsi ju' nze Léa ngù a jùm, mbwe mbatte mén mandum tàn Yakob.

¹⁸Léa tshob ndù: Nsi fà nkàbfa' me, nummbe me lo fà ngafa' àm ze mènnzwi ndu àm. Léa yab lén se Isakar.

¹⁹Léa jùm, mbwe mbatte mén mandum ntôg Yakob.

²⁰Léa tshob ndù: Nsi fà kua' nda'ntum me: Ndu àm nsi ke tsho àm ndà yen yoṅ i li, nummbe me bwe bon bandum yi ntôge. A yab lén mén Zabulon.

²¹Yen nà lo be tôge, a bwe mén mènnzwi ntswi lén se Dina.

²²Tshù, Nsi kwimte Rashél, Nsi ju' nz'é, nga' bam se.

²³A jùm, mbwe mén mandum, ntshob ndù: Nsi sô tuswe tu àm.

²⁴A yab lén mén Yosèf ntshob ndù: A bwô ndù Tshùaben bèn mfà mo' mén mandum me.

²⁵A lo be ngelaṅ Rashél bwe Yosèf là, Yakob tshob Laban ndù: Faṅ me nène, ndù me nèn la' bag, ntùm yàm ngô.

²⁶Fà zwi tshàm boa bon tshàm tse me fa' wù num tu bo là me, me nène, kua' tu wul o lèn mba me fa' wù là.

²⁷Laban tshob yi ndù: Bam me ndù me tshob nu wù. Me tshaṅ ngàm njen ndù Tshùaben tshùa à njam o kà ntam ntse me.

²⁸A bèn ntshob ndù: Soṅ àm njoṅ me nsi fà nkàbfa' wù là, me fà wù.

²⁹Yakob tshob ndù: o lèn mba me na' mfa' wù, nyàm tshùa njam àm mbe là.

³⁰Tshu ts'o na' ngù kà me nse' là lo ke be sàm ju, là fe ngelaṅ me se' là, tshu tsho yàm neshu, Tshùaben bèn ntam ntse wù. Ndonni me nsi fa' num ko' yàm tunndà à ndùke?

³¹Laban tshob ndù: Ke ze me nsi fà wù à? Yakob tshob ndù: Me ke' bètte nkàbfa', m'a' ke nke' mbéb nyàm tsho, a be z'o ghù ju ze me nsi bètt'o yi là.

³²Ndonni, m'a' tôg netèt njoṅ bon nyàm tsho fa. M'a' sô njoṅ bon njùmbwe fa tse nto' be num bo là, nsô njoṅ njùmbwe meba fa netèt njùmbwe, nsô njoṅ mbwe fa ts'a ghù nto'nto' netèt bwe là; mb'a b'a yàm nkàbfa'.

³³Yàm nenùn nsi be yàm nkwénta ndamnjù. A be z'o tèt mbwe z'a ke' ghù nto'o, njùmbwe z'a ke' ba nto'nto' là netèt tshàm nyàm nà, mba yen nà b'a tshô.

³⁴Laban tshob ndù: A bwô. A bwô ndù be ghù mb'o tshob là.

³⁵Num sen lé'njù là, Laban sô njoṅ mfot mbwe fa mi bo ghù nto'o, mbe ntshobntshob là, njoṅ mbwe fa tse bo ghù nto' là, njoṅ tse nefôg fa boa tse meba fa netèt njùmbwe, mfà mum mbu nshumnshum tse.

³⁶Ndùlala Laban lo nèn ntswe mo' dù' ghua, ze be mèn zin nguan lé'njù tat kà nkum bwe là. Yakob nke mbéb tshé' nyàm Laban.

³⁷Yakob lo' nkaṅ fènngab, nkaṅ tô boa ṅam mi fi, mfétte njoṅ i fa nto'nto'o, mfaṅ dù' ts'a tsho' ngub bwe a nke mfôg là nge.

³⁸Ndùlala njabte nkaṅtù mi a fétte nto'nto' là mbaṅ let ntse mi mbwe se' nu là, ndù bo be nu mfot ke nko' yube.

³⁹Mbwe tse mfot ko' yub mbaṅ men nkaṅtù là là bwe, bon tshob be mbàbmbàbe, nto'nto'o, bo ntshobntshob.

⁴⁰Mbe se' mba njùmbwe là, Yakob sô yub njab tù' bo, njab ts'a be nto'nto'o, ts'a be nesèn netèt njùmbwe Laban nà num ze bag. A nabte ze bwoṅ mbwe, ke bèn ntamte yub num tse Laban.

⁴¹Njoṅ ngelaṅ fa ze mfot ke nko' mbwe ntùn ts'a dun nà, Yakob yab nkaṅtù ntùm let ntse num miag mbwe, ndù fot ko' yub mbaṅ nkaṅtù.

⁴²Ndùs'a yen ndù mbwe b'a nyu'nyu' tse là, a ke yab ju; ndùlala nyu'nyu' mbwe be tse Laban, mbwe ntùn ts'a dun nà be tse Yakob.

⁴³Ndùlala mandum nà tù' kua' ngafu' ze ndùb, ngù mbwe yàm neshu, ngù ghafa' tse bènnzwi boa tse bandum, ngù ba Kamél bo nkekwène.