Read Medumba Neto'te 39 Bible Online

Neto'te 39 - Medumba bible

Neto'te 39

¹Bo lo' Yosèf nswe' nèn yi mà Egipto; Potifar, tàndà ntsho Faraon, z'a be mfen ghabéb ntshwèt, mbe ze Egipto là, jun Yosèf ba Ismaél tse bo lo' i nèn yi mà Egipto là.

²Tshùaben nke mbe bo Yosèf, nke ngù a njôg ntùm fen; a nke ntswe mum ndà tàfa' i ze Egipto.

³Tàfa' yen ndù Tshùaben lo ke mbe bo Yosèf, mba ndù tshu tse ts'a be ntùm mbu mi là lo ke nèn mbwe, mba ndùke lo z'a kô nefa' ju là.

⁴Yosèf tum ngafen num miag tàfa' i, a yab i mum fa' se, njab i ngalôte ndà i, ndem njoṅ tshu fa ts'a ghù là yi.

⁵Ndùse Potifar yab Yosèf ngalôte ndà i boa njoṅ tshu tse fa là, Tshùaben tshùa num tu Yosèf naṅ mbotni mum ndà ze Egipto mba num njoṅ tshu tse fa ts'a ghù là; mbotni Tshùaben be num tshu fa ts'a ghù là, ts'a be mum ndà là mba ts'a be mà tshwèt là.

⁶Potifar faṅ njoṅ tshu fa ts'a ghù là mum mbu Yosèf, ke bèn nke ngùtni num sàm ju k'a ke nda' nebètte ze jujù. Yosèf lo ghù ntsewut mebwô mba se z'a bwô là.

⁷Tshen nu li lo be tôge, nzwi tàfa' Yosèf te lag num i, ntshob ndù: Be be!

⁸A gha, ntshob nzwi tàfa' i ndù: Yen ndù bag tàfa' àm ke' be soṅte sàm ju num tshu ts'a tshwèt ntôg mum ndà là; a bèn ndem tshu ts'a ghù là ntùm mbu màm!

⁹A ke' tshùa àm ntùm yen ndà li, ke bèn nke nga sàm ju me, kà ntag nda' tu wul o, nummb'o b'a nzwi i. Be me ghù tshàm yen lèn nukebwô ndùb li, mfàn nu num miag Nsi à ndùke?

¹⁰Mba mb'a ke ntshob yi njoṅ lé'njù fa là, Yosèf gha nenô mbaṅ i, mbe bo yi.

¹¹A lo be mo' lé'njù, Yosèf tsho ndà num se fa', sàm mèn netèt ghandà ke be nsi,

¹²nzwi tàfa' i tshùb i num nzwe i, ntshob ndù: Be be! Yosèf kag nzwe i bu i, nkù ntum nèn njù.

¹³Ndùs'a yen ndù a kag nzwe i yi nkù ntum nèn njù là,

¹⁴a tsiaṅ ba ndà, ntshob bo ndù: Tshù là, ndu àm lo nèn ndo' meze Héber ndù a se' nke nyiaṅte njam nku be. Mandum nà se' mbaṅ àm ndù bag yi be; là me tshag nz'àm tù.

¹⁵Mb'a lo nju' me tshag nz'àm tù, nkua' là, a kag nzwe i mbaṅ àm nkù nèn njù.

¹⁶A yab nzwe Yosèf mbaṅ i tà nkum ndùse tàndà bèn njam ndà là.

¹⁷Ndùlala, a tshob Potifar ndù: Nkuan, mén Héber z'o lo' nse' yi bag là, lo nse' mbaṅ àm, nenyiaṅte njam nku màm.

¹⁸Mba me lo ntshag nz'àm tù nkua' là, a kag nzwe i mbaṅ àm nkù nèn njù.

¹⁹Mènnzwi là tshob ndu i ndù: Tshù tshu tse nkuan o ghù me là. Ndùlala tàfa' Yosèf be miagte neju' ntshob mi nzwi i tshob yi là, ngù mà yantù ndùb num Yosèf.

²⁰Ndùlala Potifar lo' Yosèf ma' ndàtsha dù' ze tse ghandàtsha mfen ke mbe là. A tsho tsha yen dù' là.

²¹Tshùaben nke mbe bo Yosèf, ngù bwôntù ze ndùb num i. Tshùaben ghù a ghù fen mbwe ngabéb ndàtsha.

²²Ngabéb ndàtsha ghù Yosèf nke ndôte njoṅ ghandàtsha fa tse bo be tsha là; sàm ju ke be tôg ke be ndù Yosèf bèn ntshobe.

²³Ngabéb ndàtsha lo ke be te lag num se fa', nummbe Tshùaben lo ke mbe bo yi, nke ngù mba ke lo z'a to' là vù lag.