Read Medumba Neto'te 41 Bible Online

Neto'te 41 - Medumba bible

Neto'te 41

¹A lo be kum ngu'njù bàa ndaṅndaṅ, Faraon yen njem. A yen ntùm njem mb'a tsin kaṅntse Nil là;

²a yen mfô sammbàa tum ntùm Nil, ndù bo bwô, ndune, nto' nefèt nenà kaṅntse.

³A bèn mbe yen tsemo' mfô sammbàa bèn ntum ntùm Nil njam tse mbwe. Ntshù mub bag neshu, ndù bo jum kua' neshu. Bo tsinte mbaṅ mfô nedune, num kaṅ Nil.

⁴Tshen mfô nebage, jumte là mfèt mfô sammbàa ts'a bwô, ts'a dunte là. Miaglo keb tu Faraon.

⁵Faraon bèn nzi, njen mbatte njem bàa. A yen tsha nsa sammbàa tum num tun nsa ntshù'. Tshen tsha nsa là dun, mbwô, ntswe.

⁶A bèn njen tsemo' tsha nsa sammbàa tse nejume, tse fetmbaṅ bag mbinyam lab i là tum njam tse mbwe.

⁷Là tsha nsa sammbàa tse nejumte mi tsha nsa sammbàa ts'a dunte, ngu' là. Yen ngelaṅ nà, miaglo keb tu Faraon, a yen ndù a lo mb'a njem.

⁸Njù làn, zenu Faraon tshu', a ghù bo tsiaṅ njoṅ tse ghangàm fa boa njoṅ tse ghazenu fa. Faraon soṅ njem ts'a lo njen nà, sàm mèn ke ku'ni netote ntun mi yi.

⁹Ndùlala mfen ghama' ndu' tshob Faraon ndù: A bwô me bam mfànnu màm sènni.

¹⁰Faraon lo ya ntù num ghafa' tse, ngù bo ma' àm ndàtsha, ntùm ndà mfen ghabéb ntshwèt bag mfen ghana bàn.

¹¹A lo be mo' tèttswe', bag yen njem, mba we lo yen ze njem, mi mbagte ntun njem be tù' i.

¹²Bag à mo' ménnshum lo be bwe, ze Héber, ngafa' mfen ghabéb ntshwèt. Bag lo soṅ i njem tse bag yen nà, a tote mba ze njem we lo yi.

¹³A lo tum num bag be ndaṅndaṅ mb'a tshob là: Tu wul àm, o lo bèn njab àm num yàm dù' fa', ntaṅ mfen ghana bàn tù.

¹⁴Faraon tum bo nèn ntsiaṅ Yosèf. Bo sô i ndàtsha ndende; Yosèf kom tu i. Mbate nzwe tse, nèn mbwe Faraon.

¹⁵Faraon tshob Yosèf ndù: Me yen mo' njem, mèn z'a tote ntun mi me là ke be. Là, me ju' bo tshob ndù a be z'o ju' ta' njem nà, mb'a b'o tote ntun mi.

¹⁶Yosèf bùnte Faraon ntshob ndù: A ke b'a me, a b'a Nsi nsi bèn bùnte tshob ju z'a bwô num Faraon nà yi.

¹⁷Faraon tshob Yosèf ndù: Me lo tsin kaṅntse Nil ntùm njem,

¹⁸mbe yen mfô sammbàa ts'a dunte, ts'a bwô là tum ntùm Nil, nto' nefèt nenà kaṅntse.

¹⁹Tsemo' mfô sammbàa tum njam tshen tse mbwe là, ndù bo li, mbag neyene, njum neshu. Me ke' to' yen lèn tshen bagkèt tse là sàm dù' mum ngô Egipto.

²⁰Tshen jumte mfô mba bagkèt tse là fèt mbwe mfô sammbàa ts'a dunte là,

²¹nso yub bam bo, sàm mèn ke lèn ndù bo tsho bam bo, ntshù mub bèn mbe be nebag mb'a lo mbe mbwe là. Miaglo keb tu àm.

²²Me bèn njen njem, njen tsha nsa sammbàa ndù a dun, mbwô, tum num tun nsa ntshù'.

²³Me bèn njen tsha nsa sammbàa ts'a bi to'o, njumte, ndù fetmbaṅ bag mbinyam lab i fa là tum njam tse mbwe.

²⁴Tsha nsa nejumte sammbàa mi mbwe tse ts'a bwô là. Me tshob tshàm ghangàme, là sàm mèn ke' tote ntun mi mfà me.

²⁵Yosèf tshob Faraon ndù: Njem tse Faraon yen nà b'a ta' ju ntshù'; Nsi diag à neghù Faraon lèn ju z'a nsi ghù là.

²⁶Mfô mebwô sammbàa b'a ngu'njù mebwô tse sammbàa, tsha nsa sammbàa b'a ngu'njù sammbàa. A b'a ta' njem ntshù'.

²⁷Mfô sammbàa ts'a tum njam tse mbwe ndù bo jum, mbag là b'a ngu'njù sammbàa, tsha nsa sammbàa tse nebi to'o, tse fetmbaṅ bag mbinyam lab i là, nsi b'a ngu'njù nziku' sammbàa.

²⁸Ndaṅndaṅ mba me lo netshob Faraon nà, Nsi diag neghù Faraon lèn à ju z'a nsi ghù là.

²⁹Tshù, ngu'njù jujù nsi be ntùm njoṅ ngô Egipto fafa sammbàa.

³⁰Tshen nà nsi be tôge, ngu'njù nziku' sammbàa be. Bo nsi lag ngu'njù jujù ts'a be mum ngô Egipto là, nummbe nziku' nsi biagte ngô.

³¹Nebwoṅ jujù nsi be ntùm ngô, ndùse yen nziku' là nsi se' là, nummbe yen nziku' là nsi ta gha' mbu.

³²A be ze njem nà lo nse' mbwe Faraon yoṅ bàa là, mb'a b'a ndù Nsi yab ntù i ndù yen nu là nsi be. Nsi a' ghù ndù yen nu là bumte kua' ndende.

³³Yosèf tshob Faraon ndù: Ndonni, tsho' ta' mènntùn z'a zi'te, mbe ngazenu là, njab i num tu ngô Egipto.

³⁴A bwô ndù Faraon yabte ghafa' mum njoṅ Egipto fa; nànte benntùn ndù bo ke ngabte jujù nze tàn, mfà bag ntshù' bo ke ndeme, ndùlala num ngu'njù sammbàa.

³⁵Bo nsi tse'te jujù num tshen ngu'njù ntùn nà ts'a tshwèt nse' là; bo nsi lem njoṅ i fa ntùm nta, tu wut Faraon ke nte lag bwe; a bwô bo lé' njoṅ jujù fa ntùm ntusô ndùbndùb.

³⁶Njoṅ yen jujù fa là nsi ywimte ngô mum ngu'njù sammbàa tse nziku' vù, mum ngô Egipto là, ndù kà ngô kwù nziku'.

³⁷Men ntshob là bwô Faraon boa njoṅ ghafa' tse fa.

³⁸Faraon tshob ghafa' tse ndù: Be be fon mo' mènntùn ze ywèt Nsi be num i mba yen mèn ni là ké?

³⁹Ndùlala Faraon tshob Yosèf ndù: Mba Nsi ghù o lèn yen njoṅ nu li fa là, mo' mèn z'a zi'te, mbe ngazenu mba wù là ke bwe.

⁴⁰Me te à wù num tu ndà àm; mba ke lo z'o nsi tshob là, njoṅ yàm ngô fa nsi ju' bame; me nsi lo' à nda' ko'fen tshùa o yi mum ngô.

⁴¹Faraon tshob Yosèf ndù: Tshù, me yab o num tu njoṅ ngô Egipto fa.

⁴²Faraon sô mbwô bu i, ma' bu Yosèf, ma' ṅwa'ṅwa' nzwe mebwô num i, ma' ntàmtu' gol tô i.

⁴³A ghù Yosèf ko' ntswe ntùm kalig s'a na' mbe njam se num nu bwô là, bo nke nkua' mbwe i, ntshob ndù: Bin kab tu zin nsi. Tshù mba Faraon fà ngwùt njoṅ ngô Egipto fa bu Yosèf là.

⁴⁴Faraon bèn ntshob Yosèf ndù: Me b'a mfen Faraon: Nda' ndù a ke wù mba sàm mènntùn ke nsi bù' bu i ke ku i lo nsi ntùm njoṅ ngô Egipto fa.

⁴⁵Faraon yab lén Yosèf ndù Tsafnat Paenéak; a fà mènnzwi Yosèf, lén se Asnat, ngon Potiféra. A b'a ngon ngale'te Nsi z'a ke ntswe tusô On nà. Yosèf zinte ntùm njoṅ ngô Egipto fa num nelèn dù'.

⁴⁶Yosèf lo be nèn mbwe Faraon mfen Egipto ndù a ghù ngu'njù ṅam ntat; ndùs'a lo mbwe Faraon nà, a katte ntùm njoṅ ngô Egipto fa.

⁴⁷A be num ngu'njù sammbàa tse njù bwô là, tsha' fà jujù kua' yàme.

⁴⁸Yosèf tse'te jujù num tshen ngu'njù sammbàa là ntùm ngô Egipto; a kùmte tshu ntùm ntusô ndùbndùb fa, njab tshu ts'a tum ntùm nà ts'a ghebte là mba sit tusô ndùb lo.

⁴⁹Yosèf tse'te nsa, a yàm mba nkwango' dibantse là, njàm ntshùate kà bo ke bèn nesiaṅe, nummbe njoṅ i lo ke bèn nebe.

⁵⁰Ngu'njù nziku' lo be se', ndù Asnat ngon Potiféra, ngale'te Nsi z'a ke ntswe tusô On nà bwe bon bandum Yosèf bàa.

⁵¹Yosèf tswi lén tuswe i ndù Manasé, nummb'a lo tshob ndù: Nsi ghù me lag njoṅ nge' àm fa bo ndà tàa.

⁵²A tswi lén mbatte bàa ndù Efraim, nummb'a lo tshob ndù: Nsi ghù me jù bin ntùm ngô ze me yen nge' bwe là.

⁵³Ngu'njù jujù sammbàa ntùm ngô Egipto tôg.

⁵⁴Ngu'njù nziku' sammbàa to' nese' ndaṅndaṅ mba Yosèf tshob là. Nziku' be ntùm njoṅ tsemo' ngô fafa; là ntùm njoṅ ngô Egipto fa jujù ke bwoṅ bwe.

⁵⁵Ndùse njoṅ ngô Egipto fa to' neju' nziku' là, bo kua' Faraon num nu jujù. Faraon tshob njoṅ ba Egipto fa ndù: Bin nèn ntèt Yosèf, ngù ndaṅndaṅ mb'a nsi tshob bin nà.

⁵⁶Nziku' be njoṅ dù' fa mum ngô Egipto. Ndùlala Yosèf tsho' njoṅ nze nta fa, nswèn nsa ba Egipto. Nziku' nke nèn be mbwe mà Egipto.

⁵⁷Benntùn nke ndo ntùm ngôngô nèn jun nsa Yosèf mà Egipto; nummbe nziku' lo ta neshu ntùm njoṅ ngôngô fa.