Read Medumba Neto'te 46 Bible Online

Neto'te 46 - Medumba bible

Neto'te 46

¹Israél lo' njoṅ tshu fa ts'a ghù là nène, nzin nkum Ber-Shéba mfà jule'te Nsi tàab Isak bwe.

²Nsi tshob Israél mum njem tèttswe' ndù: Yakob! Yakob! A bùnte ndù: Tshù me li!

³A tshob ndù: Me b'a Nsi, Nsi tàan. Kà bwôg neswe' nèn mà Egipto, nummbe me nsi te o mà bwe mba ngô ndùb là.

⁴Tu wul àm bag wù nsi swe' nèn mà Egipto, tu wul àm, me nsi lo' o ko' yi mà bwe. A b'a kua' Yosèf nsi bèn fi miag mu.

⁵Yakob lo Ber-Shéba; bon Israél yab tà yub Yakob boa bon mba zwi tshob mum nkalig mi Faraon na' ntum nelo' nket yub yi là.

⁶Bo lo' nyàm tshob boa tshu tse bo ghù ntùm ngô Kanaan nà; tshù mba Yakob tsho mà Egipto mba njoṅ ze nzwit fa là.

⁷A tsho Egipto boa bon tse tse bandum mba bon bon tse tse bandum, bon tse tse bènnzwi, ngonngon bon tse tse bandum boa njoṅ ze nzwit fa.

⁸Tshù ndèn nshumnshum Israél tse bo tsho Egipto, yen nà b'a ndù nshumnshum Yakob li: Tuswe Yakob b'a Rubèn.

⁹Bon Rubèn tse bandum: Hénok, Palu, Hétsron, Karmi.

¹⁰Bon Siméon tse bandum: Jemuel, Jamin, Ohad, Jakin bo Tsokar: ngù Saul, nshum ngon Kanaan.

¹¹Bon Lévi tse bandum: Guershom, Kehat bo Mérari.

¹²Bon Yuda tse bandum: Er, Onan, Shéla, Péréts bo Zarak, là, Er bo Onan lo kwù mà ngô Kanaan. Tse bon Péréts tse bandum: Hétsron bo Hamul.

¹³Bon Isakar tse bandum: Tola, Puba, Yob bo Shimron.

¹⁴Bon Zabulon tse bandum: Seréd, Elon bo Jahleel.

¹⁵Tshù bon bandum tse Léa bwe Yakob Padan-Aram, bo Dina mfèt yub ze mènnzwi là. Bon tse tse bandum boa tse bènnzwi lo tamte mbe benntùn ntshob tat ṅam ntat.

¹⁶Bon Gad tse bandum: Tsifjon, Haggi, Shuni, Etsbon, Eri, Arodi bo Areéli.

¹⁷Bon Aser tse bandum: Jimna, Jishva, Jishvi bo Béria mba Sérak mfèt yub ze mènnzwi. Tse bon Béria: Héber bo Malkiél.

¹⁸Tshù bon bandum tse Zilpa ze Laban na' mfà ngon i Léa na' mbwe Yakob là. Bo tamte mba benntùn ntshob ntôg gham.

¹⁹Tse bon Rashél, nzwi Yakob, tse bandum: Yosèf bo Benjamin.

²⁰Asnat ngon Potiféra ngale'te Nsi z'a ke ntswe tusô On nà lo bwe Manasé bo Efraim Yosèf mà Egipto.

²¹Bon Benjamin tse bandum: Béla, Beker, Ashbél, Guéra, Naaman, Ehi, Rosh, Muppim bo Ard.

²²Tshù bon bandum tse Rashél bwe Yakob là. Bo tamte mba benntùn ntshob kuà gham.

²³Nshum Dan: Hushim.

²⁴Bon Néftali tse bandum: Yattseel, Guni, Yetser bo Shilém.

²⁵Tshù bon bandum tse Bila ze Laban na' mfà ngon i Rashél na' mbwe Yakob là. Bo tamte mba benntùn sammbàa.

²⁶Benntùn tse boa Yakob swe' nèn mà Egipto ndù bo b'a lem tse là lo b'a benntùn ntshob ntôg ṅam ntôge, ke tùn zwi bon Yakob. Yakob lo ghù bon bandum bàa, ndù bo bwe yub à Egipto.

²⁷Njoṅ ze tunndà Yakob fa z'a nèn mà Egipto là tamte ngù benntùn ṅam sammbàa.

²⁸Yakob tum Yuda mbwe i, ndù a nèn ntshob Yosèf ndù a tshwèt nèn Gosen.

²⁹Yosèf nabte kalig se, nko' bwe nèn Gosen nebumte bo tàab Israél. Ndùs'a yoṅ njen i là, a tsho' ngwù num tô i, ṅwate be kua' num tô i ngelaṅ yàme, ndù bo tat'é.

³⁰Israél tshob Yosèf ndù: A be me kwù ndonni, nummbe me tam lag num o, o ke' à ntùn.

³¹Yosèf tshob fèt tse boa tunndà tàab ndù: M'a' nèn nsoṅ Faraon ntshob yi ndù: Fèt tshàm mba tunndà tàa z'a be ngô Kanaan nà se' nkum mbaṅ àm nsen ni.

³²Tshen ben nà b'a ghabéb mbwe, nummbe bo be nkwiagte nyàm, bo lo' mbwe tshob boa nyàmna' tshobe, boa njoṅ tshu fa tse bo ghù là nse' yi.

³³Ndùlala, ndùse Faraon nsi tsiaṅ zine,

³⁴bètte ju ze bin ke mfa' là, bin bùnte yi ndù: Ghafa' tsho b'a ghakwiagte nyàm, fe ngelaṅ mônke' tà nkum sènni, ke b'a nda' bag, mba tà tshage. A nsi tshùa ndùlala bin tswe Gosen, nummbe njoṅ ba Egipto fa ke' be kô ghabéb mbwe.