Read Medumba Neto'te 47 Bible Online

Neto'te 47 - Medumba bible

Neto'te 47

¹Yosèf nèn mbaṅ Faraon, ntshob yi ndù: Fèt tshàm mba tàa fe ngô Kanaan nse' boa mbwe tshobe, boa nyàmna' tshobe, boa njoṅ tshu fa tse bo ghù là; tshù bo li mà ngô Gosen.

²A lo' fèt tse tàn ntswite yub Faraon.

³Faraon tshob fèt tse ndù: Bin ke mfa' à ke? Bo bùnte yi ndù: Ghafa' tsho b'a ghabéb mbwe mba ba tà tshag là.

⁴Bo bèn ntshob Faraon ndù: Bag se' netswe à mum ngô, nummbe nenà mbwe ke' bèn mbe ghafa' tsho; tshù nziku' vù mum njoṅ ngô Kanaan fa. Ndùlala bam ghafa' tsho ndù bo tswe ngô Gosen.

⁵Faraon tshob Yosèf ndù: Tàan boa fèt tsho se' mbaṅ o.

⁶Tshù ngô Egipto là num miag mu. Te tàan boa fèt tsho num dù' tsha' ntùn ntùm ngô. A bwô ndù bo tswe Gosen; a be z'o yen ben tse bo ku'ni netèt bo là, o yab yub num nebéb nyàm tshàm.

⁷Yosèf ghù bo lo' tàab nse' yi a la't'é Faraon. Yakob tsha'te Faraon.

⁸Faraon tshob Yakob ndù: Lé'njù yôg so ghù ngu'njù tse si'i?

⁹Yakob bùnte Faraon ndù: A ndonni ngu'njù bon tat nkù mba me tshwèt ntsha mum njù là. Tshàm ngu'njù yôg kag, ke be mebwô, ke bèn ngebte num tse ba tà tshàm, num njoṅ ngelaṅ fa ze bo ke ntsha mum njù num yub ngelaṅ nà.

¹⁰Yakob tsha'te Faraon, ndé't'é, ndo mbwe i nène.

¹¹Yosèf te tàab boa fèt tse, mfà yub dù'ntswe mum ngô Egipto ntùm dù' tsha' ntùn z'a be ntùm ngô là, ntùm bag ngô Ramsès, ndaṅndaṅ mba Faraon tshob là.

¹²Yosèf fà jujù tàab, fèt tse mba njoṅ tunndà tàab fa, mfà bo num njoṅ bon tse bo ghù là.

¹³Jujù lo ke bèn mbe ntùm ngô, nummbe nziku' lo b'a ze ndùb; ngô Egipto mba ngô Kanaan lo ke ṅùn num nu nziku'u.

¹⁴Yosèf lo sô njoṅ nkàb fa z'a be Egipto mba z'a be Kanaan nà, njam nsa mi a ke nswèn nà; a ghù yen nkàb là tsho ndà Faraon.

¹⁵Ndùse nkàb mi bàm benntùn Egipto mba Kanaan nà, njoṅ ba Egipto fa nèn ntèt Yosèf ntshob yi ndù: Fà jujù bag, o faṅ bag kwùte mbwe o numke? Yen yu ndù nkàb ke' bèn mbe.

¹⁶Yosèf tshob bo ndù: Bin fà nyàm tsine, me nsi fà jujù bin lo' bate nyàm tsin yi, a be ze nkàb ke' bèn mbe là.

¹⁷Bo lo' nyàm tshob nse' mfà Yosèf, Yosèf fà jujù bo ndo' mbate nyàm tshob yi: Nyàmdiaṅe, mbwe, nyàmna' boa kekwène. A fà jujù bo yen ngu'njù là ndo' mbate njoṅ nyàm tshob fa yi.

¹⁸Yen ngu'njù là lo be tshùa, bo bèn nse' ntshob Yosèf mo' ngu'njù ndù: Bag ke' ghù nelem tshùaben ndù nkàb ke' bèn mbe, mba ndù bag lo à lo' nyàm fa nse' mfà tshùaben; nda' ju z'a tù' mbwe tshùaben nà b'a wut tshag mba tsha' tshage.

¹⁹O faṅ bag kwùte mbwe o, bag à tsha' tshag numke? Lo' jujù njun yag yi mba tsha' tshage, ndù bag tù' ju tshùaben yag bag a tsha' tshage. Fà ju ze bag ywit nsi là bag, ndù bag yôge, ke kwù, mba ndù kà tsha' tshag vù fam.

²⁰Yosèf jun njoṅ tsha' Egipto fa num se lén Faraon; nummbe njoṅ ba Egipto fa, mba we lo lo swèn ze, nummbe nziku' lo lèt num bo neshu. Ngô tù' tù' à ze ju Faraon.

²¹A ghù benntùn nèn mum ntusô, nelo mo' taṅ ngô nèn nkum mum mo'o, mum ngô Egipto.

²²Nda' ndù a lo ke jun tsha' ghale'te Nsi, nummbe Faraon lo lo' mo' ntshù' num ze nu ghale'te Nsi. Bo nke ndo' ju ze Faraon ke mfà bo là njôg yi. Tshù ju z'a na' ngù bo ke swèn tshob tsha' là.

²³Yosèf tshob ngô ndù: Me jun zin sènni boa tsha' tsine, num se lén Faraon. Tshù nzwit ju là; bin ghù neywit nà.

²⁴Ndùse bin tsho' tshu là mba bin nsi ghabte nze tàn fà nze ntshù' Faraon, lo' nze kuà num nebèn njwit nà yi, mba nekém wut tsin yi boa bon tsine, mba ben tse bo be ndà bin nà.

²⁵Bo bùnte ndù: O neyôg yage! A be ze tshùaben ko ndèn mag là, mba bag nsi be kuan Faraon.

²⁶Yosèf lo' yen nu là ngù kàn yi mum ngô Egipto tà nse' nkum sènni; yen nà b'a ndù mbatte bag ju tàn num tshu ts'a tum mum tsha' là b'a ze Faraon; a nda' tsha' ghale'te Nsi là ts'a ke' be tse Faraon nà.

²⁷Ba Israél tswe ntùm ngô Egipto, bag ngô Gosen, bo ghù dù' bwe boa tshu yàme; mbwe nzwit yub bèn njàm neshu.

²⁸Yakob lo tswe ntùm ngô Egipto ngu'njù ntshob sammbàa gham; ndùlal'a tamte ngù ngu'njù ntshob sammbàa bon kuà nkù.

²⁹Ngelaṅ ze ntswe'njù vù ghebte Israél là, a tsiaṅ nshum i Yosèf ntshob yi ndù: A be z'o ko ndèn màm nà, o yab bu o bam tammbwe àm, ngù nu bwôntù mba nenùn num àm; me le't'o ndù k'o tshoṅ àm Egipto.

³⁰Ndùse me nsi nèn nô mbaṅ tà tshàm nà, mb'o nsi lo' àm tum yi Egipto nèn tshoṅ àm ntùm fi sobe. Yosèf bùnte ndù: Me nsi ghù mb'o tshob là.

³¹Yakob tshob ndù: Kàn mfe mbwe àm, Yosèf kàn mfe mbwe i, yen ngelaṅ nà Yakob labt'é nkwim ntunkekwi' mi nsi tu kun se.