Read Medumba Neto'te 50 Bible Online

Neto'te 50 - Medumba bible

Neto'te 50

¹Yosèf tum ngwù num se tàab, ndo' ntsenyà njo' i yi, ntat'é.

²Yosèf tshob ghatshwinte tse bo ke mfa' yi là ndù bo se' fe tàab ndù k'a bi, bo se' fe tàab Israél.

³Yen nu là tswe lé'njù ṅam nkuà, nummb'a njoṅ ze nese' fe mèn be ntswe là. Ba Egipto làn i lé'njù ṅam sammbàa.

⁴Ngelaṅ ze ndé'njù tse bo làn i tôg là, Yosèf tswi nkùn ndà Faraon ntshob ndù: A be ze bin tshàm ndèn màm nà, bin tshob ju ze me nsi tshob bin nà Faraon, me le'te zin neshu. Bin tshob yi ndù:

⁵Tàa lo ghù me kàn mfe ntshob ndù me bam mb'a bètte là ndù me nsi tshoṅ i ntùm fi s'a na' ntswe' ntùm ngô Kanaan nà, ngelaṅ z'a nsi kwù là. Bin bètt'é ndù me ghù nenèn ntshoṅ tàa ntùm fi ndonni, kà mbèn njam ke di!

⁶Faraon tshob ndù: Ko' nèn ntshoṅ tàan, ndaṅndaṅ mb'a na' ngù o kàn mfe là.

⁷Yosèf ko' nèn tshoṅ tàab, njoṅ ghafa' Faraon fa, ben ndùbndùb ntùm ndà i boa ben ndùbndùb ntùm ngô Egipto tam njam i nèn ntshag i,

⁸njoṅ tunndà Yosèf fa, fèt tse mba tunndà tàab. Bo faṅ nda' bontsit bônke', mbwe tshob boa nyàm tshob mà Gosen.

⁹Nkalig mba ghako' nyàm tam njam i. A na' mb'a bwoṅ benntùn ndù a yàm neshu.

¹⁰Bo zin nkum Athad z'a be yoṅ Yordan nà, bo kua' vù bwe, ndàn vù bwe tata; Yosèf làn vù tàab lé'njù sammbàa.

¹¹Bon la', ba Kanaan lo yen sen vù là se bon làn Athad là ntshob ndù: Tshù kua' mà vù ndùb là netèt ba Egipto! A num ndùlala, bo tswi lén dù' là ndù Abél-Mitoraim. Yen dù' là b'a yoṅ Yordan.

¹²Bon Yakob tse bandum ghù ju ze tà yub na' ntshob là.

¹³Bo kel i nèn yi mum ngô Kanaan ntshoṅ i mum ngabloṅ ntùm fèn mà Makpéla, fèn ze Abraham na' njun Efron ze Hétia, num nelo' ngù dù' tufi sob yi là. Yen dù' b'a mbwe Mamré.

¹⁴Yosèf be miagte netshoṅ tàab, mbèn njam Egipto boa fèt tse mba njoṅ benntùn fa tse bo à bo ko' nèn tshoṅ tàab là.

¹⁵Fèt Yosèf be yen mba tà yub kwù là ntshob ndù: A be Yosèf lo' be mba tse ghakeban mba' nukebwô tse be na' ngù yi là be l'o?

¹⁶Ndùlala bo tum bo nèn ntshob Yosèf ndù: Tàan lo tshob yen nu li ndù kà nkwù,

¹⁷ndù bag tshob wù Yosèf ndù o lagte nukebwô fèt tsho boa mfànnu mube! Nummbe bo lo ghù nukebwô num o! Ndonni lagte nukebwô ghafa' Nsi tàan! Yosèf be ju' men ntshob là nkua'a.

¹⁸Kua' fèt tse se' yub tu ngwù nsi mbwe i ntshob ndù: Bag b'a ghafa' tsho.

¹⁹Là Yosèf tshob bo ndù: Kà bin bwôg! Nummbe me ke lo' ze dù' Nsi.

²⁰Bin lo kwate neghù nukebwô num àm, là Nsi kaṅ a tù' ze mebwô num neghù ndù nu ze bin tshwèt njen sènni là bumte, yen nà b'a ndù neyôg ta' ngô z'a ghù benntùn yàm nà.

²¹Kà bin bwôg; me nsi lôte zine, bin mba bon tsine. A fite ntù yube, ntshob nu ts'a b'a kwag ntù yub là.

²²Yosèf tswe mà Egipto, boa tunndà tàab. A tswe num ngu'njù mén bùm nkù.

²³Yosèf yen bon Efraim tà nèn nkum num zwiaṅ benntùn tat; a yen bon Makir tse bandum, bon Manasé tse bandum, tse bo bwe yub mum mbu mi là.

²⁴Yosèf tshob fèt tse ndù: Me nsi kwù! Là Nsi a' lôte zine, ghù bin tum mà ntùm yen ngô li nko' nèn ntùm ngô z'a na' nsaṅlaṅ bwe fà Abraham, Isak mba Yakob là.

²⁵Yosèf ghù bon Israél kàn mfe ndù bo nsi lo' mvôg mi tum yi Egipto ndùse Nsi a' se' lôte yub là.

²⁶Yosèf be kwù ndù a tswe ngu'njù mén bùm nkù. Bo se' fe i ndù k'a bi, njab mum koṅ mà Egipto.