Read Medumba Neto'te 9 Bible Online

Neto'te 9 - Medumba bible

Neto'te 9

¹Nsi yab kàn Noa boa bon tse tse bandum, ntshob bo ndù: Bin bwe bon, njàme, kà ndun num nsitsha'a.

²Njoṅ nyàm fa num nsitsha'a, njoṅ nsaṅ fa mfe kamànyam, boa njoṅ tshu fa tse bo be nzinte num nsitsha' là nsi ke bwôg zine. Me fà njoṅ ngontse fa tse bo be mum dibantse là bin.

³Njoṅ tshu fa ts'a be nkumte, nke njôg là nsi be jujù zine, me fà bin ndaṅndaṅ mba nenà là. Me fà njoṅ yen nà fa bin.

⁴Nda' ndù bin ke nsi fèt mbàb bo lem, nummbe yôg num ntùm lem.

⁵Mbe se' mba lem tsin nà, me nsi bètt'é ndaṅndaṅ mba zwiag sin nà; me nsi bètt'é njoṅ nyàm fa, me nsi bètte zwiag mènntùn mènntùn, bètte zwiag mba we lo mfèl i.

⁶Mèn z'a fètte lem mènntùn nà, mba mènntùn nsi fètte tse ze, nummbe Nsi lo nabte mènntùn à num mfuni Nsi.

⁷Mba bin nà, bin bwe, njàme, nsa mum njù, nke ntô i.

⁸Nsi tshob Noa boa bon tse tse bandum ndù:

⁹Tshù, me wat kàn bag à bin mba nzwit zin z'a nsi tum mànjam nà,

¹⁰boa njoṅ tshu fa tse bin à bo be ndù bo ghù zwiag là: Nsaṅe, nyàm nke'nke'e, nyàm tshwèt fa tse bin à bo be là. Nekebte, me tshob à njoṅ tshu fa tse bo tum ntùm sitima là, njoṅ nyàm fa num nsitsha'a.

¹¹Me wat kàn bag à bin. Dibambaṅ ke nsi bèn bagte benntùn, dibambaṅ ke nsi bèn be, biagte tsha'a.

¹²Nsi tshob ndù: Tshù keki kàn ze me yab netèl àm bag à bin mba njoṅ nyàm fa bin à bo be li. Yen nu là nsi be ngu'ngu':

¹³Me yab kôngamnyu sàm mfe kamànyam. A nsi be keki kàn netèl àm mba njù.

¹⁴Ngelaṅ me nsi kùmte ba ndot num nsitsha'a, kôngamnyu tum mfe kamànyam nà,

¹⁵me nsi kwimte kàn s'a netèt be, njoṅ tshu fa tse bo ghù zwiag mba njoṅ benntùn fa là. Yen ngelaṅ nà ntse ke nsi bèn tù' dibambaṅ biagte benntùn.

¹⁶Ngelaṅ ze kôngamnyu nsi be mfe kamànyam, me yen i là, me nsi yen i, kwimte kàn matmat s'a be netèl àm bag à njoṅ tshu fa tse bo ghù zwiag mba njoṅ benntùn fa num nsitsha' là.

¹⁷Nsi tshob Noa ndù: Tshù keki kàn ze me yab netèl àm bag à benntùn fa tse bo be num nsitsha' là.

¹⁸Bon Noa tse bandum tse bo tum ntùm sitima là na' mb'a Sém, Kam, Yafét; Kam b'a tà Kanaan.

¹⁹Tshen ben tat li b'a bon Noa tse bandum; a nzwit yub bèn ndo' njù nsitsha' fa.

²⁰Noa to' nedù' nà, mbwe nkùa.

²¹A nu ndu' mbume, mfin nzwe ngwù mum ntàb i.

²²Kam tà Kanaan yen tàab tunntôg, nsoṅ fèt tse tse bàa tse bo be ntshundà là.

²³Là Sém mba Yafét lo' kummbaṅ ma' num nkembe' yub ntu bàa, mbènte tuntun ndo' nkabte tàa yub z'a be ntôgtun nà yi, nkaṅ se yub njam ke yen tàa yub ntôgtun.

²⁴Noa bam num miaglo ndu' nju' ju ze kebatnjab ghù num i là.

²⁵Ndùlala ntshob ndù: Ndon tsho tu Kanaan. A bwô ndù a be miagte nkuan netèt fèt tse.

²⁶Mbèn ntshob mba ndù: Ghamte be Tshùaben, Nsi Sém, a bwô ndù Kanaan be nkuan Sém.

²⁷A bwô ndù tunndà Yafét ke ntswe netèt tunndà Sém, Kanaan be nkuan Yafét.

²⁸Dibambaṅ lo tôg Noa bèn ntswe mum njù ngu'njù bon tàn nkù tat.

²⁹Noa lo tswe ngu'njù bon tàn nkù bwe'e, nkwù.