Read Medumba 2 Samuél 11 Bible Online

2 Samuél 11 - Medumba bible

2 Samuél 11

¹A be ngumo', num ngelaṅ ze fenfen ke nèn tshwèt ntsho là, David tum Yoab boa ghafa' tse mba njoṅ ba Israél fa, num nesate tse nshum Ammon mba num nekab mbu num Rabba. Là David tù' ts'a Yérusalém.

²A be mo' mfetnjù, David lo num kunndà se; ndùs'a ke nkatte num tuba' fen nà, a tsin njen mo' mènnzwi a nke nsôg wul i, ndù a bwô num se i neshu.

³David bètte mèn ze yen mènnzwi là be ze là, bo tshob yi ndù: A ke b'a Bat-Shéba ngon Eliam, nzwi Uria mén Hit ké?

⁴David tum bo nèn ndo' i. A se' mbaṅ David bo yi nô. Ndùse mènnzwi là sôgte wul i mb'a sagte wul i là, a bèn njam ndà i.

⁵Mènnzwi là be jùm, ntum bo tshob David ndù: Me num jùm.

⁶Ndùlala David tshag yen nkùn ni Yoab ndù: Tum Uria mén Hit là me. Yoab tum Uria David.

⁷Uria nèn mbaṅ David, a bètt'é mba Yoab boa soyé lo' ntswe yi là, mba mba ntsho tshwèt ndo' nzin yi là.

⁸Yen nà be tôg David tshob Uria ndù: Swe' nèn mà ndà o nsôg nku mu mfite. Uria tum ndà mfen, mfen tum nda' bo nèn mfà yi.

⁹Là Uria nô nzendà ndà mfen boa ghafa' tàfa' i, ke swe' nèn tse ndà i.

¹⁰Bo soṅ David ntshob yi ndù: Uria ke' swe' nèn ndà i. David tshob Uria ndù: O ke' fe à nkatte ké? Numk'o ke swe' nèn ndà o à?

¹¹Uria bùnte David ndù: Koṅ Kàn bo Israél mba Yuda ke ntswe à bam ba ntàb, tshùaben àm Yoab boa ghafa' tshùaben àm b'a mbàn tà mà tshwèt, yàm tu wut nke ntsho ndà àm jù, nu, zi bag nzwi àm ké? Me ke nsi ghù lèn yen nu là ngelaṅ z'o ke' ntùn, zwiag so ke' ntùm bwe là.

¹²David tshob Uria ndù: Bèn ntswe nsen ni sènni kà ndamnjù me ba' o njam. Uria tswe Yérusalém sen lé'njù là mba lé'njù s'a tum njam bwe là.

¹³David tsiaṅ i ndù bo yi jù jujù mbèn nu num téblé ntshù'. David ghù a nu kà mbume. A be mfetnjù Uria tum nô num kunndà se boa ghafa' tàfa' i, là ke swe' nèn ntùm ndà i.

¹⁴Njù làn nkebnjù David kite ta' ṅwa'ni Yoab, mfà mum mbu Uria, a lo' nèn yi.

¹⁵A kite ntùm ṅwa'ni là ndù: Yab Uria num ndoṅ ntsho mi a ta ntshùate là, nsô wut njam i, mfaṅ bo lab i nzwi i a kwù.

¹⁶Yoab be kab mbu num tusô, njab Uria num dù' z'a lèn ndù bo tshwèt mbéb kua' mebwô, ndù ba neta soyé bèn mbe bwe là.

¹⁷Ben tse bo be tusô là to dù' ntum ngwù njam Yoab; benntùn yàm netèt ngô, ghafa' David kwùte, Uria mén Hit be netèt tshen ben nà tse bo kwùte là.

¹⁸Yoab tum mènntùn, a nèn nsoṅ David tshô, mb'a lo' ntum yi num ba soyé là.

¹⁹Yoab tshob mèn z'a tum nà ndù: Be mo' ndù o be miagte nesoṅ mfen kua' mba ntsho tôg yi là,

²⁰a ya ntù ntshob wù ndù: Numke bin lo nkù'te ngebte num tusô kà nke ma' ntsho à? Bin ke' lèn ndù bo num ntswe tù kàbngô nke ma' nkô ké?

²¹We z'a na' nzwi Abimélék nshum Yerubbéshet à? A ke ta' mènnzwi na' ntsin tù kàbngô ma' kam ngo' bàn num i k'a nkwù Tébets ké? Numke bin lo nkù'te ngebte num kàbngô à? Yen ngelaṅ nà o nsi tshob ndù: Mba ngafa' o mén Hit Uria kwù bwe.

²²Ngantum nèn; ndùs'a kum nà, a soṅ David tshu fa tse Yoab tshob yi là.

²³Ngantum tshob David ndù: Tshen ben nà ta ntshùa be, kà nte ku tu be; bo lo ntum num bag à mà tshwèt, bag ta' yub tà nkum ntshu nsém;

²⁴ghama' nkét lo ntsin tù kàbngô kà ntam ghafa' tsho, tse yàm netèt bo kwùte, mba Uria mén Hit kwù netèt bo.

²⁵David tshob ngantum ndù: Tshù mb'o nsi tshob Yoab li: Kà lab wul o num yen nu là, nummbe ṅwi be ngwat yen mèn ni mo' yoṅ, ngwat yen mèn nà mo' yoṅ. Kam tusô ntsho kua' neta kà nsat'é. A bwô tu wul o ke mfà fènntù yi.

²⁶Nzwi Uria ju' mbe ndu i kwù, ndàn i.

²⁷Ndùse vù tôg là, David tum bo nèn ndo' mènnzwi là nse' yi ntshwèt, a tù' nzwi i, mbwe ta' nshum yi. Là Tshùaben ya ntù neshu num ju ze David ghù là.