Read Medumba 2 Samuél 12 Bible Online

2 Samuél 12 - Medumba bible

2 Samuél 12

¹Tshùaben tum Natan mbaṅ David. Natan nèn mbaṅ i ntshob yi ndù: Tsemo' benntùn bàa lo ke ntswe ntùm ta' tusô, mo' be ngaju, mo' be mbwoṅ.

²Ngaju lo ghù mbwe boa nyàmna' kua' yàme.

³Mbwoṅ lo ke ghù sàm ju k'a ke nda' ta' metsit mbwe, z'a na' njun nà; a lo ke nkém i, a nke nku' ntùm ndà i boa bon tse; a nke njù jujù bo yi, nu ntu' ntshù' bo yi, nke nzi kunndà ntshù' bo yi, nke ndo' i mba kua' ngon i là.

⁴A be mo' lé'njù mèn nke nkatte ntsin ndà ngaju. Ngaju ke kô nekwag mbwe tse ke nyàmna' tse lo, ndo' ta' i bwe nabte jujù nganèn nkatte z'a tsin la' i là yi, a lo' à nda' mbwe mbwoṅ, nabte jujù mèn nà z'a ke nèn nkatte ntsin la' i là yi.

⁵David ya ntù neshu num yen mèn nà, ntshob Natan ndù: Num lén Tshùaben z'a be ntùn nà, yen mèn nà ku'ni nekwù.

⁶A bwô ndù a ba' mbwe njam à kuà mb'a ghù lèn yen nu là, ke ghù kondèn ntù i là.

⁷Natan tshob David ndù: O bèn mbe yen mèn nà! Tshù mba Tshùaben Nsi Israél tshob li: Me lo yo' o ndo' o ngù mfen yi num Israél, ntshu' o mum mbu Saulo;

⁸me lo ghù tunndà tàfa' o tù' ju o, ngù zwi tse tù' tsho, mfà tunndà Israél bo ze Yuda, bo tù' tsho tunndà. A lo mbe ndù yen nà kag be nekag mb'a be me kwi'te ntshùa ndùlala.

⁹Ndùlala, o wag ntshob Tshùaben, ngù nu z'a ke' bwô là num miag mi à numke? O lo' ṅwi ndab Uria mén Hit yi kà nzwi i; o lo' nzwi i ngù nzwi o yi, ngù ṅwi tse nshum Ammon zwi i.

¹⁰Ndonni ṅwi ke nsi be ngùanesà mbaṅ tunndà o, nummb'o wag àm, bo mb'o lo' nzwi Uria mén Hit ngù yu yi là.

¹¹Tshù mba Tshùaben tshob li: Tshù, m'a' ghù nge' tum ntùm tunndà o ntsho num o. Me nsi bèn lo' zwi tsho yàm tu wut fà mo' mèn num miag mu, a nô boa bo mbwôgtshù.

¹²Nummb'o lo ghù yu à njam tsham, tu wul àm, me nsi ghù yen n'a mbwe ba Israél fa, ngù à kua' mbwôgtshù.

¹³David tshob Natan ndù: Me ghù nukebwô num Tshùaben! Natan tshob David ndù: Tshùaben lagte nukebwô o, o ke nsi kwù.

¹⁴Là, mb'o ghù ghakeban Tshùaben tshabte, o ghù lèn yen nu li là, ménnshum ze mènnzwi là bwe wù là nsi kwù.

¹⁵Natan bèn tse njam ntùm ndà i. Tshùaben lab mén ze nzwi Uria bwe David là, a vù ngokèt kua' kebwô neshu.

¹⁶David le'te Nsi num mén, ntswe nziku'u; ndùs'a bèn njam nà, a nô à num tsha' kà nzi à bwe.

¹⁷Ghakwé mbwe ntùm ze ndà nànt'é ndù a lo num tsha'a; là, a ke kô, ke bèn njù sàm ju boa bo.

¹⁸A be nkum mbatte lé'njù sammbàa mén kwù. Ghafa' David nke mbwôg nesoṅ i ndù mén kwù. Nummbe bo lo ke ntshob bo bo ndù: ndùse mén ke' ntùn nà be tshob yi a ke kô neju' be; be tàn ntù à ndùke ntshob yi ndù mén kwù à? A nsi sobni neshu.

¹⁹David yen mba ghafa' tse tshwèt ntshobte netèt bo, là sob nke nèn be nsi là, ndèn ndù mén yà kwù. A bètte ghafa' tse ndù: Mén yà kwù ké? Bo bùnte ndù: A kwù.

²⁰Ndùlala David lo num tsha'a. A sôg wul i, mbé'te mfèt, mbate nzwe tse; ndo nèn ndà Tshùaben ngwù nsi kabkab. Ndùs'a bèn njam ndà i là, a bètte bo fà jujù yi, a jù.

²¹Ghafa' tse tshob yi ndù: O ghù ndù à ndùke? Ndùse mén be ntùn nà o nke ntswe nziku' mbèn nke ndàne; ndonni ze mén kwù là o lo nsi nke njù jujù!

²²A bùnte ndù: Ndùse mén be ntùn nà, me nke ntswe nziku' mbèn nke ndàne, nummbe me lo ke ntshob ntù àm ndù: Be Tshùaben ko ndèn màm, mén ke kwù.

²³Ndonni z'a kwù là, a bèn njwimt'àm ke netswe nziku' à? Be me bèn ngù à be ntùn ké? Me nsi bèn nèn tèl i, be a ke bèn mbèn nse' mbaṅ àm.

²⁴David fite ntù nzwi i Bat-Shéba. David nèn mbaṅ i, ndo' i. A bwe ta' nshum David, a tswi lén se Salomon. Tshùaben kô Salomon.

²⁵David fà i ntùm mbu ngatshob ntshob Nsi Natan, Natan fà lén Yedidja yi nummbe Tshùaben lo kô i.

²⁶Yoab z'a kab mbu num Rabba tse nshum Ammon, ṅwag num tusô fen,

²⁷ntum benntùn bo bèn ntshob David ndù: Me yà kam Rabba ntsho, tà njà ṅwag num tusô ba ntse be bwe là;

²⁸ndonni tse'te tshé' benntùn nte mbàn njam se tusô, ndo' i, mbwôg ndù kà tu wul àm lo' i, ghamte tù' b'a yàm.

²⁹David tse'te benntùn fa, ndo nèn num Rabba, nkam i ntsho, ntù' ngatô ngô.

³⁰Neto yub Milkom lo ghù ta' kétmbùm gol ndù a lèt nguan kilô ntshob tàn ṅam ntàn, ndù bo lo' ndoṅ tanjoṅ nkàn i yi. Bo te i num tu David. A lo' ntsha' yàm ntum yi tusô.

³¹Mbe se' mba benntùn tse bo be ntùm ngô là, a lo' yub nèn yi num mfa' nebag tshu, netswe ntoṅ tùn boa njàm, ngù bo nke mbom tsha' ntone. A ghù be ndaṅndaṅ num memo' ntusô tse nshum Ammon. Yen nà be tôg David bèn njam Yérusalém bo ze ntshu ntsho.