Read Medumba 2 Samuél 13 Bible Online

2 Samuél 13 - Medumba bible

2 Samuél 13

¹Absalom nshum David lo ghù mfèl i ze mènnzwi lén se Tamar. Tamar lo bwô neshu. Mo' nshum David lo be bwe lén se Ammon. Ammon kô Tamar kua' neshu.

²Ammon lo kô Tamar neshu kà yen nà bagte tu i, k'a tù' ngangokèt num nu tse. Ammon lo ke ku'ni neghù sàm ju nummbe bo lo ke yoṅ ntabte Tamar.

³Ammon lo ghù mo' nshun i lén se Yonadab. A na' mb'a nshum Shiméa mfèt David. Yonadab na' mb'a ngazete neshu.

⁴A tshob Ammon ndù: Numke wù nshum mfen nke njum be nejum mba zit nkebnjù lo ndù à? Be o ke tshob me ké? Ammon bùnte yi ndù: Me kô Tamar ngonmà mfèl àm Absalom.

⁵Yonadab tshob yi ndù: Nô kunndà, ntam ngokèt yu tu. Ndùse tàan se' lôt'o là, o tshob yi ndù: Bam Tamar mfèl àm ze mènnzwi se' mfà jujù me; a bwô ndù a nabte jujù ntùn num miag màm, me ke njene, tu wul i bèn ndo' kua' mbu mi mfà me.

⁶Ammon nô kunndà, ntam ngokèt ze tu wut. Mfen se' lôt'é, ndùlala a tshob mfen ndù: Netsho'o, bam mfèl àm ze mènnzwi Tamar ndù a se' nkate nke' makela' mbàa num miag màm, me kwé à kua' mum mbu mi kà mfèle.

⁷David tum bo nèn ntshwèt ntsiaṅ Tamar bwe. Mfen tshob yi ndù: Nèn ndà mfèl o Ammon, nabte jujù ntùn yi.

⁸Tamar nèn ndà mfèl i Ammon ndù a nô num kunndà. A lo' mbab bàn, ntébte, nabte makela' yi, nkate mbwe i;

⁹Tamar lo' ka njab ntùm bwe mbwe i. Là Ammon gha nefèle. Ammon tshob ndù: Ghù benntùn tume. Benntùn fa tum ndà i.

¹⁰Ndùlala Ammon tshob Tamar ndù: Lo' jujù nse' yi to'ndà, me jù i à kua' mum mbu mu. Tamar lo' makela' ts'a ka là nèn yi mbwe mfèl i Ammon ntùm to'ndà.

¹¹Ndùs'a ke mfà jujù Ammon nà, a ghom i ntshob yi ndù: Mfèl àm ze mènnzwi, se' bag wù be, nô.

¹²Tamar bùnte yi ndù: Nga me mfèl àm, kà bagt'àm, nummbe bo ke' be ghù ndùlala ntùm ngô Israél; kà ghù lèn ntswe'ntswe' nu là.

¹³O ghù ndùlala mba m'a' nèn à yà bag tuswe à? Mba mba kua' tu wul o nsi b'a kua' mo' ntswe'ntswe' mèn ntùm ngô Israél. Ndonni a bwô o tshob mfen, nummbe b'a ke gha nefà àm wù, me lèn kua' ndùlala.

¹⁴Là, a ke kô neju' mb'a tshob là. A ghom i neta, mbagt'é, mbe bo yi, nô i.

¹⁵Yen nà be tôg nu Tamar bèn mbag Ammon ntshùa nkôni z'a ghù num i là. A tshob yi ndù: Lo nsi ntum nène!

¹⁶Tamar bùnte yi ndù: Kà kwi'te kebwô z'o ghù num àm nà, nta' àm neta'a.

¹⁷Ammon ke kô neju' mb'a tshob là, ntsiaṅ mén mandum z'a na' nke mfa' yi là ntshob yi ndù: Bo ta' mènnzwi li mbaṅ àm ntshag i njù. Bo tam nzendà tu njam nku mi.

¹⁸A lo ghù mo' nesà kum num i ndù ntshù mi b'a nzenze; a na' mb'a lèn nzwe ze ngonngon mfen ke ma' njoṅ ngelaṅ fa bo ke' ntabte yub là. Ngafa' Ammon tshag i njù, ntam nzendà tu njam nku mi.

¹⁹Tamar naṅ bwembwôg tu i, mfagte nesà kum se se ntshù mi be nzenze là; a yab mbu tu i, mbe nèn nke nkua' kua' neta.

²⁰Mfèl i Absalom bètt'é ndù: Mfèl o lo' o kua' nenùn ké? Mfèl àm, ndonni mi ntswe, lèn mb'a mfèl o; kà yab yen nu là ntù o yàme. Tamar tswe ntùm ndà mfèl i Absalom, kua' ntùm nenywine.

²¹Mfen David ju' tshen tshu là, nu tse bag i kua' neshu.

²²Absalom ke tshob sàm nu bo Ammon, ke nu ntùn ke ze kebwô lo; nda' ndù a lem Ammon ntù i nummb'a lo bagte Tamar mfèl i ze mènnzwi.

²³A lo be tshùa ngu'njù bàa Absalom ghù tse ghakeb nyiaṅ njùmbwe Baal-Hatsor, mbaṅ tusô Efraim; a tsiaṅ njoṅ tse nshum mfen fa.

²⁴Absalom nèn mbwe mfen David ntshob yi ndù: ngafa' o me ghù ghakeb nyiaṅ njùmbwe; a bwô ndù mfen boa ghafa' tse se' la' ngafa' o me.

²⁵Mfen tshob Absalom ndù: Nga me nshum àm, be bag ke se' njoṅ yag fa, mbwôg ndù k'a be lèt tu o. Absalom tènte mfen, là mfen ke kô nenène, ndé't'é.

²⁶Absalom tshob ndù: O bam mba nda' Ammon mfèl àm se', bag bo nèn. Mfen bùnte yi ndù: Numk'o ndiag a se' la' o à?

²⁷Absalom saṅlaṅ kà mfen faṅ Ammon boa tsemo' nshum mfen nèn boa bo.

²⁸Absalom tshob ghafa' tse ndù: Bin bam nà ndùse ndu' nsi lo' tu Ammon me tshob ndù bin lab i là; yen ngelaṅ nà, a bwô ndù bin zwi i; kà bin bwôg sàm ju nummb'a b'a me bèn ntshob bin! Bin ghù nda' tànntù, nda'te fènntù zine.

²⁹Ghafa' Absalom ghù num Ammon kua' mba Absalom tshob bo là. Njoṅ tse nshum mfen fa lo nsi, mba we lo ko' num ze nyàm nkù nène, yen nyàm nà b'a ze kekwèn bo nyàmdiaṅ bèn mbwe i là.

³⁰Ndùse bo be num manze là, tshô tam toṅ David mbe Absalom zwite njoṅ tse nshum mfen fa kà mba ze ntshù' ke bèn ntù'ù.

³¹Mfen lo nsi, mfag nzwe tse, nô num tsha'a; njoṅ ghafa' tse fa be nsi ndù nzwe tshob fagte.

³²Yonadab nshum Shiméa, mfèt David, tshob ndù: Kà Tshùaben àm kwate mbe njoṅ tshen nshumnshum nà, tse nshum mfen kwùte fa, nummb'a nda' Ammon bèn nkwù tù' i. A b'a ju ndù Absalom lo jù' ntù i fe lé'njù se Ammon bagte Tamar mfèt Absalom ze mènnzwi là.

³³Ndùlala a ke' bwô tshùaben mfen àm ghù sobni ntù i nkwate mb'a njoṅ tse nshum mfen fa bèn nkwùte. A b'a nda' Ammon bèn nkwù tù' i ndùlala.

³⁴Absalom kù nène. Ménnshum ze bo yab i ntom nà bù' miag ndôte, njen mo' mà bwoṅ benntùn nke nse'e, num manze z'a be njam i là, nze bag mbale.

³⁵Yonadab tshob mfen ndù: Tshù tse nshum mfen ni tse bo tshwèt nse' là.

³⁶Ndùs'a ke miagte ntshob là, tse nshum mfen ṅwag. Bo tshag là sob tù ndàne. Mba mfen boa ghafa' tse fètte ntsenyà yàme.

³⁷Absalom lo kù tse, nèn la' Talmai nshum Ammihur, mfen Gueshur. David nke ndàn nshum i Ammon njoṅ lé'njù fa.

³⁸Absalom tswe Gueshur dù' z'a nèn nà ngu'njù tat.

³⁹Mfen David tsin ke bèn neyab njam Absalom, nummb'a lo ghù fitentù num nu nshum i Ammon.