Read Medumba 2 Samuél 15 Bible Online

2 Samuél 15 - Medumba bible

2 Samuél 15

¹Yen nà lo be tôg Absalom ghù ta' kalig boa nyàmdiaṅe, ngù benntùn ṅam ntàn tse bo ke nkù nde mbwe i là.

²A lo ke ntum mba zit nkebnjù lo nèn ntswe num manze z'a num nsém nà. A be ze mèn ghù ntsha nke nèn mbaṅ mfen, nebote ntsha là, mba Absalom a' tsiaṅ i mbètt'é ndù: O fe à sit tusô à? A be ze ng'é la'te se tusô, a tum à netèt mo' ta' nzwit Israél là, mba Absalom a' tshob yi ndù:

³Tshù nu o là z'a bwô, ntsin nà; là sàm mèn ke mbaṅ mfen z'a nsi ju' ju z'o tshob là.

⁴Absalom bèn ntshob ndù: We lo' àm ghù ngasa'kam yi ntùm ngô à? Mba mba we lo z'a nsi ghù ntsha, kà bote là, mba m'a' ghù nunetsin yi a be z'a se' njen àm nà.

⁵Ndùse mèn ghebte mbwe i, ngwù nsi là, mb'a' tshùb bu i, ntat'é, ntshùb i.

⁶Absalom nke ngù ndùlala njoṅ ba Israél fa tse bo ke nèn mbaṅ mfen bètte nunetsin nà. Absalom tshùa ndùlala nke ndo' ntù ba Israél.

⁷A lo be tshùa ngu'njù kuà, Absalom tshob mfen ndù: Bam me nèn Hébron nzwiagte nka'ni mi me na' ngù Tshùaben nà.

⁸Nummbe ngafa' o me lo ghù ta' nka'ni ndùse me na' nke ntswe Gueshur mà Siria là, ntshob ndù: A be ze Tshùaben lo' àm mbèn yi njam Yérusalém nà, mba m'a' fa' yi Tshùaben.

⁹Mfen tshob yi ndù: Nèn fite. Absalom lo nsi nèn Hébron.

¹⁰Absalom tshag ba nton netèt njoṅ tse nzwit Israél fa, ntshob ndù: Ndùse bin nsi ju' nze nta là, bin nsi tshob ndù: Absalom tshwèt ntô mà Hébron.

¹¹Ben ntu nkù bàa tse bo tsiaṅ yub là tum Yérusalém nèn ntshag Absalom; bo nèn yub a nge, ke lèn ju z'a nsi là.

¹²Ndùse Absalom ke mfà tshule'te là, a tum bo nèn ndiag Akitofél tusô Guilo. A na' mb'a ze ngafà ntag David. Neze ntsham mfen nke nta nèn be mbwe, ngô nke nèn njam Absalom be kua' yàm yàm neshu.

¹³Mèn nèn nte bu num David ntshob yi ndù: Ntù njoṅ ba Israél fa kaṅ njab à num Absalom.

¹⁴David tshob njoṅ ghafa' tse fa tse boa bo be Yérusalém nà ndù: Bin lo nsi be kù nène, nummbe Absalom yab mbu num be mba be ke yôg bu i. Bin nànte nène; ntag ndùlala mb'a ke ghubte kà nkum num be. A nsi ma' be ntùm nge' lo' ṅwi biagte tusô yi.

¹⁵Ghafa' mfen tshob yi ndù: Ghafa' tsho nsi ghù mba ke lo ze mfen bètte ndù bo ghù là.

¹⁶Mfen tum ndo' nku nzin yi, njoṅ ze tunndà fa yab njam i. A faṅ màndà tse gham bo nke mbéb ndà.

¹⁷Mfen tum, ngô fa yab njam i, bo zin nkum num miagte ba' ntsine.

¹⁸Njoṅ ghafa' tse fa, njoṅ ben Kérét fa boa njoṅ ben Pélét fa nèn njam mfen; njoṅ tse ben Gat fa, benntùn ntu nkù ntôg tse bo fe Gat là se' njam i, là ntshùa mbwe mfen.

¹⁹Mfen tshob Ittai ze Gat ndù: O tam yu njam bag à numke? Bèn njam bin mfen nswe tù'ù, nummb'o b'a ngùn, mbe ndù o na' nkù la' ntùm yu ngô kà nse'e.

²⁰O yôg nese'e, sènni a ke' bwô me lo' o nke ntsha yi, ndùse mba tu wul àm ke' lèn dù' ze me tshwèt nèn nà. Bèn njam bin à fèt tsho. A bwô ndù Tshùaben ghù bwôntù num o, mbe mèn nenùn mbwe o.

²¹Ittai bùnte mfen ndù: Me nu ngu wù tshùaben mfen àm num lén Tshùaben ndù mba me yàm a' nèn mba yà lo dù' z'a nsi nèn nà, k'a b'a num yôg ke vùkob lo.

²²Ndùlala David tshob Ittai ndù: Tshùa be nène. Ittai ze Gat tshùa boa njoṅ tse ben fa mba bon fa tse boa bo be là.

²³Ngô fa kua' kua' neta ndùse ben David ke ntôg là. Mfen dut fub Kedron, mba ben tse dut yub bwe ntshùa num manze z'a tshwèt nèn kônkwa là.

²⁴Mba Tsadok lo be bwe boa njoṅ ben Lévi fa ndù bo ket Koṅ Kàn Nsi; bo te Koṅ Kàn Nsi mbaṅ Abiatar, mbéb ndù njoṅ benntùn fa miagte netum tusô.

²⁵Ndùse njoṅ benntùn fa miagte netum nà mfen tshob Tsadok ndù: Lo' Koṅ Nsi mbèn yi tusô. A be ze me be mènfen num miag Tshùaben nà, mb'a nsi lo' àm bèn yi njam, ghù me yen Koṅ bo dù'ntswe i.

²⁶Là, a be z'a tshob ndù nu tshàm ke' bèn mbwô i là, a ghù num àm mb'a ko' ntù i là.

²⁷Mfen bèn ntshob Tsadok ngafà tshule'te ndù: O ju' ké? Bèn njam fite ntùm tusô bin nshum o Akimaats, mba Yonatan nshum Abiatar, nshumnshum tsin bàa.

²⁸Tshù, m'a' tswe ntùm ntômbo' mi a kônkwa là, tà nkum ndùse bin nsi tum tshô me là.

²⁹Ndùlala Tsadok bo Abiatar ket Koṅ Nsi mbèn yi Yérusalém, ntswe bwe.

³⁰David ko' num kônga ntene. A be ko' nke nkua'a, ndù a kabte tu i, nke nzin nku banban; mba njoṅ benntùn fa tse boa bo be là lo kabte tu yube, mbe ko' nke nkua'a.

³¹Bo se' ntshob David ndù: Netèt ben tse bo ze ntsham o là Akitofél num bwe. A b'a bo Absalom. David tshob ndù: Tshùaben, a bwô o ghù ndù mi ntag Akitofél tù' ju banban!

³²Ndùse David kum mfe ntshùa kônga dù' z'a vù nsi mbwe Nsi là, Hushai ze Ark se' mbwe i ndù kum se nesà fagte, tsha' kabte tu i fa.

³³David tshob yi ndù: A be z'o tam njam àm nà, mb'o nsi be lèt m'a banban.

³⁴Là, a be z'o bèn tusô là mb'o ghù neywimt'àm, nke mbiagte mi ntag Akitofél, ntshob Absalom ndù: Tshùaben, me tshwèt nkô nebe ngafa' o; me na' mb'a ze tàan mo' ngelaṅ, m'a' tù' b'a yu ndonni. Yen ngelaṅ nà ku'ni nezwiaṅte ntàmtenu Akitofél kua' mebwô, ndù nu bwô à yàm njam.

³⁵Bin à Tsadok mba Abiatar ghafà tshule'te nsi be ku ntshù', o ke nsoṅ yub mba ke lo z'o ju' ndà mfen nà.

³⁶Bo ghù Akimaats nshum Tsadok, Yonatan nshum Abiatar mbaṅ bo. Bin nsi ke tum tshô bin ju' là bo, bo se' ntshob me.

³⁷Ndùlala Hushai nshum David bèn njam tusô. A lo be be ndù Absalom njôg netsho Yérusalém.