Read Medumba 2 Samuél 20 Bible Online

2 Samuél 20 - Medumba bible

2 Samuél 20

¹Mo' ngatshùagntù lo be bwe lén se Shéba, nshum Bikri mèn Benjamin. A tô nta ntshob ndù: Bag bin David ke mbu bàn, bag bin nshum Isaï ke ntùm sàm nu ntam. Mba we lo bèn ndà i me ba Israél.

²Ndùlala ba Israél lo njam David ngwù njam Shéba nshum Bikri. Là ba Yuda ghô njam mfen yub, mbe ben nenùne, ndo' i fe Yordan nèn ntshag i tà Yérusalém.

³David bèn njam ndà i Yérusalém. Mfen lo' màndà tse gham ts'a na' mfaṅ ndù bo ke mbéb ndà là, njab yub mo' dù' bo nke mbéb yube. A ghù bo nke nabte yube, nda' ndù a ke nèn mbaṅ bo. Bo fùn yub ndùlala tà nkum sob lé'njù vùkob, bo nke njôg à mba ba mfôg là.

⁴Mfen tshob Amasa ndù: Neto' sènni nkum lé'njù tat, a bwô ndù o tsiaṅ ba Yuda me. A bwô ndù tu wul o be nsi.

⁵Amasa nèn tsiaṅ ba Yuda. Là, a be se' nsèn num ngelaṅ ze mfen yab yi là.

⁶Ndùlala David tshob Abishai ndù: Shéba nshum Bikri nsi ghù kebwô be ndonni tshùa Absalom. Lo' ben tshàm yu tu wut njab njam, mbwôg ndù k'a fon ndàlem ntùm ntusô mi bo kut ntsham ntsiag là, nde' num miag be.

⁷Abishai nèn boa ben Yoab, ben Kérét boa tse Pélét, mba njoṅ ba neta nduku fa; bo tum Yérusalém kà njab njam Shéba nshum Bikri.

⁸Ndùse bo zin nkum mbaṅ loṅ ndùb s'a be Gabaon nà, Amasa ṅwag mbwe bo. Yoab lo ghù ṅwi num nzwe ts'a ma' num i là; a taṅ ṅwi là ntaṅ kob i ntùm mbàn i. Ṅwi tum ngwù nsi ndùse Yoab ke nèn nà.

⁹Yoab bètte Amasa ndù: Mfèl àm, o tswe mebwô ké? A lo' bu i ze zwim ntshùb nyiaṅ ntshu Amasa yi, ntat'é.

¹⁰Amasa ke zete num ṅwi ze Yoab tshùb bu i là. Yoab so ṅwi là bam i, nto mi tum naṅ num tsha'a, ke be ndù a bwôgte ṅwi bam i. Amasa kwù be kua' ndùse. Yoab bo mfèl i Abishai te njam Shéba nshum Bikri.

¹¹Mo' mèn Yoab ghô mbaṅ fe Amasa nke ntshob ndù: Ben tse bo kô Yoab bo David là tam njam Yoab.

¹²Amasa nke njaṅte wul i nsi ntùm lem netèt manze. Yen mèn nà be yen mba ngô tsin nà, ntènte Amasa ndo yi num manze ma' ntùm ta' nà, ma' ta' nzwe num i, ndùs'a yen mbe njoṅ benntùn fa tshwèt nkù' ntsin mbaṅ i là.

¹³Ndùse bo lo' i ndo yi num manze là, mba we lo tam njam Yoab, ndùlala ndù bo te njam Shéba nshum Bikri.

¹⁴Yoab dul à netèt njoṅ tse nzwit Israél fa, nèn nze Abél-Bét-Maaka, njoṅ neta benntùn fa tse'te ntam njam i.

¹⁵Bo nèn nkab mbu num Shéba Abél-Bét-Maaka, nkut mo' kum kàb num tusô a nèn nkum num kàbngô. Ngô z'a be njam Yoab là nke ntswe' tun kàbngô ndù a vù.

¹⁶Ndùlala mo' nkum mènnzwi to' nekua' tusô nke ntshob ndù: Bin ju'u, bin tshob Yoab, me le'te zine, ndù a ghebte, nse' tà nkum nsen ni, nummbe me kô netshob nu yi.

¹⁷Yoab ghebte num mènnzwi là, a tshob yi ndù: O b'a Yoab ké? A bùnte ndù: Me b'a Yoab. Mènnzwi tshob yi ndù: A bwô o ju' ntshob ngafa' o me ze mènnzwi. Yoab bùnte ndù: Tshobe, me tshwèt nju'u.

¹⁸A tshob ndù: A lo be mbwembwe mbe matnu neke ntshob ndù: A bwô nebètte Abél nu. A tôg à mba bo tshob là.

¹⁹Sag tusô b'a se ndùb, mbe s'a tswe ntùm mbétni ntùm ngô Israél là. O ke ndiag nesat'é à numke? Numk'o nke mbagte ju z'a be ze Tshùaben n'à?

²⁰Ndùlala Yoab bùnte ndù: Nga àm, nga àm tshàm! Me ke' ghù tshàm nkwate nesate ke nebagte lo.

²¹Nu ke tse nsi ndùlala. Nda' ndù mo' mèn lén se Shéba, nshum Bikri fe num mbale, mbù' bu i nsi num mfen David; bin fà i me nda' yi tù' i, me tum ntùm tusô nèn tshàm ngùanesà. Mènnzwi là tshob Yoab ndù: Tshù, bo nsi tsin njam kàbngô ma' tu i wù njam njù.

²²Mènnzwi là lo' ze zenu nèn yi mbaṅ ngô; bo keb tu Shéba nshum Bikri, ntshag ma' Yoab. Yoab tô nta; ben tse sate, nèn ngùanesà mbaṅ tusô, mba we lo bèn ntùm ze ntàb. Yoab bèn njam mbaṅ mfen Yérusalém.

²³Yoab na' mbèn nke nsa' njoṅ ntshu ntsho ba Israél fa; Benaya nshum Yéhoyada na' mb'a tu netèt ben Kérét boa tse Pélét;

²⁴Adoram na' mbèn mbe tu num neghù bo nke mfa' neta mfa', Yosafat nshum Akilud be ngatshob ntshob mfen;

²⁵Shéya na' mb'a ngakite; Tsadok bo Abiatar be ghafà tshule'te;

²⁶Ira ze Yair na' mb'a ze nkam ndùb David.