Read Medumba 2 Samuél 21 Bible Online

2 Samuél 21 - Medumba bible

2 Samuél 21

¹Mo' nziku' be num ngelaṅ David be mfen nà, ntswe ngu'njù tat. David bètte Tshùaben nu, a tshob yi ndù: Yen nu li b'a num nu Saulo bo tunndà i z'a be mfètte lem nà, nummb'a lo biagte ba Gabaon.

²Mfen tsiaṅ ba Gabaon, num netshob nu bo. Ba Gabaon lo ke b'a ba Israél, là bo na' mb'a tshé' ba Amor; ba Israél lo so wut num bo, nu ngu bo; mba tà ndùlala Saulo diag be nebiagte yube, nummb'a lo ghù nkôni num bon Israél boa bon Yuda neshu.

³David tshob ba Gabaon ndù: Ke ze be me ghù bin à? Be lo' à ke ntamte fa yi, ndù bin nyàmte ntsi' Tshùaben à?

⁴Ba Gabaon bùnte yi ndù: A ke tse nu silba ke gol lo netèt bag bag à Saulo bo tunndà i. A ke bèn mb'a yag nu nezwi sàm mèn ntùm ngô Israél. Mfen bètte ndù: Kà ke ze bin kô ndù me ghù bin à?

⁵Bo bùnte ndù: Mba Saulo na' ndiag nebiagte yag fa, kà ke kô nefaṅ lèn yag mèn ntùm ngô Israél là,

⁶nèn netèt tse nshum mfà tse ntu sammbàa bag, bag nsi taṅ yub tù mbwe Tshùaben Guibéa ntùm tusô Saulo, ze Tshùaben na' ntsho' i là. Mfen tshob ndù: M'a' fà yub bin.

⁷Mfen kabte Mefiboshet nshum Yonatan, nshum Saulo, nummbe David bo Yonatan nshum Saulo lo nu ngu netèt bo mbwe Tshùaben.

⁸Là mfen lo' tse nshum Ritspa ngon Ayya bàa, ts'a na' mbwe Saulo là, Armoni bo Mefiboshet mba tse nshum Mérab ngon Saulo tàn, ts'a na' mbwe Adriel ze Mehola, nshum Barzillai là;

⁹mfen fà yub num mbu ba Gabaon, bo taṅ yub tù mbwe Tshùaben num mbale. Njoṅ yub sammbàa kwù yoṅ ntshù'. Bo zwi yub à num mbwe ntswe'njù num ngelaṅ netsho' ntshu, ndùse ngelaṅ nekeb nsa ke nto'te là.

¹⁰Ritspa ngon Ayya lo' bàm njab num gholoṅ, neto' num ngelaṅ nekeb nsa tà nkum ndùse njwèt mbaṅ lo num bo ndù a swe' à mfe kamànyam nà. A ke bam nsaṅ mi à mfe kamànyam nà ghebte num bo mbwôgtshù, ke bam nyàm tshwèt ghebte num bo tèttswe'.

¹¹Bo soṅ David ju ze Ritspa ngon Ayya, màndà Saulo ghù là.

¹²David nèn ndo' mvôg Saulo boa mvôg Yonatan nshum i la' ba Yabès Galad. Bo na' mbèn ndo' yub num dù' i Bét-Shan, dù' ze ba Filistia taṅ yub tù ndùse bo tshùa Saulo ntsho Guilboa là.

¹³Bo lo' mvôg Saulo boa mvôg Yonatan nshum i ntum yi bwe. Bo lo' mba mvôg ben tse bo na' ntaṅ yub yub tù là.

¹⁴Bo tshoṅ mvôg Saulo boa mvôg Yonatan nshum i ntùm ngô Benjamin Tséla, ntùm fi Kis tà Saulo. Bo ghù ju ze mfen na' ntshob là. Yen nà be tôg ntù Nsi fite mum ngô.

¹⁵Ba Filistia bèn ma' ba Israél ntsho. David swe' boa ghafa' tse ma' ba Filistia ntsho. David lo bole.

¹⁶Yishbi-Benob, mo' mèn Rafa kwate nezwi David. A lo ghù ta' kô tùn meba ndù à lèt kilô tàn, ngù ta' ṅwi nswe ndù à taṅ tun i.

¹⁷Abishai nshum Tseruya se' njwimte David, nkam ze Filistia, ndab i nzwi. Ndùlala ben David nu ngu ntshob yi ndù: Be bag bin ke bèn ntum nèn tshwèt ntsho, nummb'a ke' bwô ndù o biag nka' Israél, z'a b'a kua' yu tu wut là.

¹⁸Yen nà be tôg ntsho bèn mbe netèt Israél boa ba Filistia Gob. Ndùlala Sibbekai ze Hushat zwi Saf z'a na' mb'a mo' mèn Rafa là.

¹⁹Mo' ntsho bèn mbe netèt ba Israél boa ba Filistia mo' yoṅ i Gob. Elkanan nshum Yaaré-Oreguim ze Bétléhém, zwi Goliat ze Gat z'a na' ngù ta' kô s'a na' ndèt mba ṅwi bàm ngaba' bàm nà.

²⁰Mo' ntsho lo bèn mbe Gat. Mo' nesà mèn be bwe ndù a ghù ntu mbu ntôg num ta' bu i boa ntu nku ntôg num ta' ku i, njoṅ i fa tamte mbe ntu ntshob kùa ṅam mbàa. Mèn nà na' mb'a Rafa.

²¹A to' ba Israél ntsho; Yonatan nshum Shimei, mfèt David zwi i.

²²Tshen ben kuà là na' mb'a bon Rafa ze Gat. Bo kwùte yub fa num mbu David mba mum mbu ghafa' tse.