Read Medumba 2 Samuél 3 Bible Online

2 Samuél 3 - Medumba bible

2 Samuél 3

¹Ntsho lo tswe netèt tunndà Saulo bo ze David ngelaṅ yàme. Là ndùse ze mba' David ke ngum nsi là, ze Saulo nke njub à be neyube.

²David lo bwe nshumnshum Hébron: Mbwe i na' mb'a Ammon, ze màab be Akinoam ze Yizréel là;

³mbatte bàa b'a Kileab ze màab be Abigail ze Karmél là. A b'a nzwi Nabal; mbatte tat 'a Absalom ze màab be Maaka là. A b'a ngon Talmai mfen Gueshur;

⁴mbatte kuà b'a Adoniya ze màab be Hagit là; mbatte tàn b'a Shefatia ze màab be Abital là;

⁵mbatte ntôg b'a Yitream ze màab be Egla, mbe nzwi David là. Tshen ben ni b'a nshumnshum tse David bwe Hébron nà.

⁶A lo be ndùse ntsho be netèt tunndà Saulo bo ze David là, Abner be z'a be kua' njam tunndà Saulo.

⁷Saulo lo ghù mo' màndà i lén se Ritspa, mbe ngon Ayya. Ish-Boshet tshob Abner mo' lé'njù ndù: Numk'o ndo' nzwi tàa à?

⁸Abner ya ntù num ntshob Ish-Boshet neshu, ntshob ndù: O kwate mbe me b'a nga ze ntsham mèn ké? O kwate mbe me ke mfa' à Yuda ké? Fe neto'te me be yàm à be nenùn num nu tàan Saulo, fèt tse boa shun tse; me num nkabt'o ndù k'o vù ntùm mbu David; sènni a bwô ndù o yab nu tu àm bag yen mènnzwi là.

⁹A bwô Nsi yab nge' num àm, Abner, a be ze me ke' ghù ju ze Tshùaben nu ngu David num bwe bumte num i là.

¹⁰A lo bù yi ndù a' kwé nufen tunndà Saulo, mfà diaṅkwa David num Israél bo Yuda, nelo Dan nèn nkum Ber-Shéba.

¹¹Ish-Boshet ke ghù fènntù nebùnte lèn ntshob Abner, nummb'a lo ke mbwôg i.

¹²Abner tum benntùn bo nèn ntshob David num ze tu ndù: Ngô b'a ze we? Bag wù wat kàn, bu àm nsi ywimt'o, me bèn nkaṅ ba Israél fa nso njam o.

¹³David bùnte ndù: A bwô, bag wù a' wat kàn; nda' ndù me tshwèt mbètt'o ta' ju, a b'a ndù k'o se' mbwe àm, ke be ndù o bwôgmbwe nse' mfà Mikal ngon Saulo me. Yen ngelaṅ nà o ghù neyôg nse' mbwe àm.

¹⁴David tum benntùn Ish-Boshet nshum Saulo, bo tshob yi ndù: Fà nzwi àm Mikal me. Me na' ndo' a ba ntshoṅ ket ba Filistia ngù i yi.

¹⁵Ish-Boshet ghù bo nèn ndo' i ju ndu i Paltiel, nshum Laish.

¹⁶Ndu i yab njam i nke nkua' tà nèn nkum Bakurim. Ndùlala Abner tshob yi ndù: Bène, bèn njam la' o. A bèn njam la' i.

¹⁷Abner tshobte boa ghakwé mbwe netèt ba Israél, ntshob bo ndù: Bin lo ke nkô mo' ngelaṅ neghom David fen;

¹⁸bin te i bwe num ndonni, nummbe Tshùaben tshob num i ndù: Me nsi tshùa njam ngafa' àm David kà tshu' yàm nzwit mèn Israél num mbu ba Filistia mba num mbu ghakeban tse fa.

¹⁹Abner tshob yen nu là mba nzwit Benjamin, a nèn ma' yen nu là toṅ David Hébron, nsoṅ i mba ba Israél boa nzwit benjamin fa jù' neghù là.

²⁰Abner nèn mbaṅ David Hébron boa benntùn ṅam mbàa; David ghù jùa num lén Abner mba num se ben bo be njam i là.

²¹Abner tshob David ndù: M'a' lo nsi nèn ntse'te njoṅ ba Israél fa ndo' yub nse' yi mbaṅ tshùaben, mfen àm; bin à bo wat kàn, o tô yub mb'o bèn nkô là. David lé'te Abner, a bèn njam ntùm fite.

²²Yoab boa tsemo' ben David fe mo' ntsho ndù bo lo' ntsha' bwe yàme. Abner lo ke bèn mb'a mbaṅ David Hébron, nummb'a lo be be ndù David lé't'é a nèn fite.

²³Ndùse Yoab boa bwoṅ soyé tse kum nà, bo soṅ Yoab ndù: Abner nshum Ner se' mbaṅ mfen, a lé't'é a nèn fite.

²⁴Yoab nèn mbaṅ ndà mfen ntshob ndù: Ke z'o ghù ndù à? Abner se' mbaṅ o, o ndé't'é mfaṅ i a nèn a numke?

²⁵O lèn Abner nshum Ner! A nese' fùt'o, yen mb'o lo' ntswe yi là bo mb'o tshwèt ngù là.

²⁶Ndùse Yoab tum mbwe David là, a tshag benntùn njam Abner, bo ghom i tà kaṅ tôntse Sira ndo' i mbèn yi njam. David lo ke lèn tse nu num bwe.

²⁷Ndùse Abner bèn njam Hébron nà, Yoab na' nsoṅ i nsém ntum yi njam, mb'a nedù bo yi tshobte njam tsham nà, ntsho bwe ndab i num bam i nzwi i, num neyagte mba' Asaél mfèl i yi.

²⁸David tum njam nju' yen nu là, ntshob ndù: Me be tshàm à mbu' mbwe Tshùaben num lem Abner nshum Ner, mba kua' yàm nufen.

²⁹A bwô ndù tshen lem nà nèn tu Yoab bo tunndà tàab fa! Mènntùn a' ke ntum tunndà Yoab ngù a' nswe kebwô ke nkin no, nke nzin boa nkôg, nke ngwù num ntshùag ṅwi, ke neke ndon ze jujù lo, njoṅ ngelaṅ fa.

³⁰Tshù mba Yoab bo Abishai zwi Abner mb'a na' nzwi mfèt yub Asaél tshwèt ntsho Gabaon nà.

³¹David tshob Yoab boa benntùn bo be njam i là ndù: Bin fagte nzwe tsin ntôg nke'mbàn, ndàn mbwe fe Abner. Mfen David zin njam koṅ fe Abner.

³²Bo tshoṅ Abner Hébron. Mfen fà nz'é tù ndàn num tufi Abner, ngô fafa làn.

³³Mfen nabte kwi nsivù num Abner ntshob ndù: A lo mbwô ndù Abner kwù a mba ta' ngazwi mèn nà ké?

³⁴Mvèt lo ke be num mbu mu, tshan ke be num nku mu! O vù nsi à kua' mba mèn be ngwù mbwe ghatshùagntù là.

³⁵Ngô fa bèn ndàn num Abner mo' yoṅ i. Ngô ghebte mbaṅ David num netshob yi ndù a jù jujù mb'a ke' à mbwôgtshù là; là David nu ngu ntshob ndù: A bwô Nsi yab nge' num àm a be ze me yab bàn ntshu àm ke mo' jujù ghua lo ke be ndù lagnyam bi là.

³⁶Ngô ju' ndùlala, bame, njen mbe njoṅ i fa ze mfen ghù là bwô.

³⁷Ngô fa mba ba Israél lèn sen lé'njù là ndù à ke mfen na' ntshob ndù bo zwi Abner nshum Ner.

³⁸Mfen tshob ghafa' tse ndù: Bin ke' lèn ndù ta' mfen, ta' mèn ndùb vù nsi sènni ntùm ngô Israél ké?

³⁹Me ke' tshàm à mèn nebole, mba mba Tshùaben yo' àm nà. Tshen ben nà, nshumnshum Tseruya b'a ben neta ntshùa àm. A bwô ndù Tshùaben ba' tshùagntù mba we lo be kua' njoṅ z'a ghù kebwô yi là.