Read Medumba 2 Samuél 7 Bible Online

2 Samuél 7 - Medumba bible

2 Samuél 7

¹Mfen David lo tswe kua' ntùm ndà i, ndùse Tshùaben fà fite yi, ntshu' i bu ghakeban tse fa tse bo diaṅ i mbum nà,

²ndùlala, a tshob ngatshob ntshob Nsi Natan ndù: Tshù, me tshwèt ntswe ntùm ba' ze bo lo' sédra nkut yi là, nda' ndù Koṅ Nsi nke ntswe bam ta' ntàb.

³Natan bùnte mfen ndù: Nène, ghù mba ke lo z'a ko' ntù o là, nummbe bin Tshùaben bèn mbe.

⁴A be mo' tèttswe' Tshùaben tshob Natan ntùm ntshob mi ndù:

⁵Nèn ntshob ngafa' àm David ndù: Tshù ju ze Tshùaben tshob li: A b'a wù nsi bèn kut ta' ba' me, ze me ghù dù'ntswe àm yi là ké?

⁶Là me ke' to' tswe ntùm ta' ba' fe lé'njù se me ghù bon Israél ko' Egipto là tà nkum sen lé'njù li; me lo ke nzin à bam ntàb ntùm ta' dù'ntswe.

⁷Njoṅ dù' fa ze bag bon Israél zin nèn nà, me lo to' tshob sàm nu mo' ta' nzwit Israél ze me tshob yi ndù a tshagte yàm nzwit mèn Israél là ké? Me lo to' bètte yub ndù bo be ke kut ta' ba' sédra me numke di ké?

⁸Ndonni tshob ngafa' àm David ndù: Tshù ju ze Tshùaben tàndà ntsho tshob li: Me lo lo' o tshwèt, njam ba mbwe, ndù o be mfen yàm nzwit mèn Israél;

⁹me lo ke mbe bag wù njoṅ dù' fa o ke nèn nà; me lo biagte ghakeban tsho fa num miag mu, ngù lén so ju'ni, mfute se ben ndùbndùb tse bo num nsitsha' là;

¹⁰me lo fà ta' dù'ntswe yàm nzwit mèn Israél, njag i nsi ndù a ghô bwe ke bèn nyi'te, mba ndù kà ghatshùagntù bèn ma'ni i mba mbwembwe là;

¹¹mba ngelaṅ ze me na' njab ghasa'kam num yàm nzwit mèn Israél là. Me lo fà fite wù, ntshu' o mbu ghakeban tsho fa. Ndonni Tshùaben tshwèt nsoṅ o mb'a nsi kut ta' tunndà wù.

¹²Ngelaṅ tsho lé'njù nsi ku' o nèn ntèt tà tsho là, me nsi tù' bù'te nzwil o, mo' ta' nshum o z'a tum zwe' o là, ghù fen se ghume.

¹³A yen mèn nà bèn kut ta' ba' num lén sàm, me ghù diaṅkwa nufen se ghum matmat.

¹⁴Me nsi be tàab, tu wul i be nshum; a be z'a ghù nukebwô là mba m'a' lo' shua' benntùn tshèl i yi, lo' nto' bon benntùn tsham i yi;

¹⁵Là kondèn ke nsi lo num i mba me na' nsô i num Saulo ze me na' ngua' i mbwe o là.

¹⁶Tunndà o bo fen so nsi ghô matmat, diaṅkwa so bèn ngum nsi matmat.

¹⁷Natan tshob njoṅ men ntshob là fa bo yen njem nà David.

¹⁸Mfen David nèn ntsin mbwe Tshùaben ntshob ndù: Tshùaben Nsi, me b'a we, yàm tunndà b'a zit k'o ngù me nse' tà nkum nsen ni dù' me be à?

¹⁹Tshùaben Nsi, a tswe à mba yen njoṅ i là ke' yoṅ nku' num miag mu là. O tshwèt mbèn nka' tunndà ngafa' o mb'o nsi fà fu' yi. Tshùaben Nsi, ndù o bam netswite mènntùn tshen tshu là ké?

²⁰Be David bèn nku'ni netshob wù à kua' ndùke? Tshùaben Nsi, o lèn ngafa' o.

²¹A tshùa num ntshob mu bo mb'a ko' ntù o là, k'o ngù tshen tshu ndùbndùb là, mbèn nda'te tshen tshu là ngafa' o.

²²Tshùaben Nsi, mi' o zi neshu! Tshù, sàm mèn ke bwe z'a fut'o là, mo' Nsi ke bwe mba wù là. Bag yé't'a num tshu tse ntoṅ mag ju' là kà mbame.

²³Mo' ta' ngô num bwe nsitsha' mba yu nzwit mèn Israél ké? Wù Nsi lo se' ntshu' i nelo' ngù yu nzwit mèn yi, ntshùa num i nte lén so. O lo ghù ba nsa boa nu netshàme, ndo' nta' ngôngô boa nsi tshob yi mbwe yu nzwit mèn z'o tshu' i bu ba Egipto là.

²⁴O lo ghù yu nzwit mèn Israél taṅ nga, ngum nsi, ndùlala ndù a be yu nzwit mèn matmat; wù Tshùaben lo tù' ze Nsi.

²⁵Tshùaben Nsi, ndonni a bwô ndù ntshob mi o tshob num ngafa' o mba num tunndà i là be ndùlala matmat. Zwiagte ntshob mu kua' mb'o na' ntshob là.

²⁶Lén so be neghamte, bo ke ntshob ndù: Tshùaben tàndà ntsho b'a Nsi Israél! Mba ndù tunndà ngafa' o David ghum num miag mu.

²⁷Nummbe tu wut Tshùaben tàndà ntsho, Nsi Israél, o lo la'te ngafa' o ntshob ndù: Me nsi te ta' tunndà wù. A ndùlala ze ngafa' o me kagtùn netsin mbwe o nde't'o là.

²⁸Tshùaben Nsi, ndonni o b'a Nsi, ntshob mu b'a nenùne. O lo bù yen kondèn sen fu' là ngafa' o me.

²⁹Tam ntse tunndà ngafa' o, ndùlala ndù a ghô mbwe o matmat. Nummb'a b'a wù Tshùaben Nsi bèn ntshobe. A nsi tshùa njam ntse mi o nsi tam tunndà ngafa' o là, a tswe matmat.