Read Medumba 2 Samuél 9 Bible Online

2 Samuél 9 - Medumba bible

2 Samuél 9

¹David bètte ndù: Be ta' mènntùn bèn nke' ntùm tunndà Saulo me ghù mebwô yi num lén Yonatan ké?

²Mo' ngafa' tunndà Saulo lo ke'e, lén se Tsiba. Bo lo' i nse' yi mbwe David. Mfen bètte ndù: O b'a Tsiba ké? A bùnte ndù: Tshù ngafa' o me li!

³Mfen bètt'é ndù: Ndù sàm mènntùn ke' bèn nke' ntùm tunndà Saulo z'a be me ghù bwôntù num i mba me na' nka' Nsi ndù m'a' ghù là ké? Tsiba bùnte mfen ndù: Ta' nshum Yonatan ke' bwe, mb'a nke'kèt num nku mi.

⁴Mfen bètte ndù: A b'a yà? Tsiba bùnte mfen ndù: A b'a ntùm ndà Makir nshum Ammiél Lodebar.

⁵Mfen David tum bo nèn ndiag i ntùm ndà Makir nshum Ammiél Lodebar.

⁶Mefiboshet nshum Yonatan, nshum Saulo, se' mbaṅ David, ngwù nsi kabkab mbwe i. David tshob ndù: Mefiboshet! A bùnte ndù: Tshù me ngafa' o li.

⁷David tshob yi ndù: Kà bwôg, nummbe me kô neghù mebwô wù num lén Yonatan tàan. Me nsi ba' njoṅ tsha' tàan Saulo wù fa, o bèn nke njù à num téblé sàm.

⁸A vù nsi mbwe i ntshob ndù: Ngafa' o me b'a kua' ke k'o nke ndôt'àm ze me b'a fe mbù là ndù à?

⁹Mfen tsiaṅ Tsiba ngafa' Saulo ntshob yi ndù: Me fà mba ke lo z'a na' mb'a ze Saulo bo tunndà i fa là nshum tàfa' o.

¹⁰O nsi ke dù' tsha' tse yi, wù, tsho nshum, tsho ghafa'. O nsi tsho' tshu ndùlala ndù kà nshum tàfa' o bwoṅ jujù; Mefiboshet nshum tàfa' o nsi ke jù num téblé sàm njoṅ ndù fa. Tsiba lo ghù tse nshum ntshob tàn gham, ngù ghafa' ṅam mbàa.

¹¹A tshob mfen ndù: Me ngafa' o nsi ghù tshu fa tse mfen, tshùaben àm tshob me là. Mefiboshet nke njù téblé David mba kua' mo' nshum mfen nà.

¹²Mefiboshet lo ghù ta' nshum i lén se Mika. Njoṅ benntùn fa tse bo ke ntswe ndà Tsiba là na' mb'a ghafa' Mefiboshet.

¹³Mefiboshet na' nke ntswe à Yérusalém, nummb'a ke njù a téblé mfen njoṅ ndù fa. A na' mb'a nke'kèt num nku mi mbàa fa.