Read Medumba 1 Fenfen 1 Bible Online

1 Fenfen 1 - Medumba bible

1 Fenfen 1

¹Mfen David lo ywène, ngu'njù tse nèn mbwe neshu. Bo kabt'é nzwe mfùag mba ndùke lo, wul i ke dumte.

²Tshe' tse tshob yi ndù: A bwô nediag ménngon ze bo ke' yoṅ ntabt'é là mfen, a se' nke mfa' mbwe mfen, nke ntshwinte mfen mbèn nke nô ntù mfen; mo' ndù be wut mfen dumte.

³Bo diag mbwô ménngon ntùm njoṅ ngô Israél fa, mfon Abishag ngon Sunam. Bo lo' Abishag nèn yi mbwe mfen.

⁴Ménngon nà lo bwô neshu. Abishag tshwinte mfen, mfa' yi, là mfen ke to' be bo yi.

⁵Adoniya, nshum Hagit kag wul i bu ko'tewut kà ntshob ndù: A b'a me zi be mfen. Ndùlal'a lo' ta' kalig boa ba nyàmdiaṅe, benntùn ntu ṅam ntàn bo nke nkù nde mbwe i.

⁶Ngelaṅ tàab ke' ntùn nà, a ke to' tshobt'é ntshob ndù: numk'o nke ngù ndùlal'à? Adoniya lo bwô neshu. A na' mb'a ntù'njam Absalom.

⁷A tshobte bo Yoab nshum Tseruya, mba Abiatar ngale'te Nsi. Ndùlala bo yab njam i.

⁸Là Tsadok ngale'te Nsi, Benaya nshum Yéhoyada, Natan ngatshob ntshob Nsi, Shimei, Rei boa tse neta benntùn David ke be ntshu ntshù' boa Adoniya.

⁹A be mo' lé'njù Adoniya zwite ba mbwe, ba nyàmna' boa ba mfô tse bo tshote là mbaṅ loṅ s'a be Zohélét, mbaṅ En-Roguel là. A tsiaṅ njoṅ fèt tse bon mfen tse bandum fa boa njoṅ benntùn tse bo be Yuda, nke mfa' mfen nà.

¹⁰Là, a ke tsiaṅ Natan ngatshob ntshob Nsi, ke Benaya, ke neta benntùn, ke Salomon mfèl i lo.

¹¹Ndùlala Natan tshob Bat-Shéba, mà Salomon ndù: O ke' ju' ndù Adoniya nshum Hagit tù' b'a mfen, ke be ndù mfen be David lèn ké?

¹²Ndonni se', me nsi fà ntag wù, a tshùa bwe o yôg tu wul o, mbèn njôg nshum o Salomon.

¹³Nèn ntsho ndà mfen David, ntshob yi ndù: Mfen àm, o lo ke kàn mfe nkuan o me ntshob ndù nshum o Salomon bèn jù fen ndùs'o nsi kwù là, a tswe num diaṅkwa so tô ké? A b'a ndùke kà Adoniya bèn ntù' be mfen à?

¹⁴Tshù, a nsi be ndùs'o tshobte bin mfen nà, me tsho ndà yàm tu, ntù' so memo' ntshob ndo' nkwi'te mu yi.

¹⁵Bat-Shéba nèn ntùm to'ndà mfen. Mfen lo ywèn neshu; Abishag ngon Sunam lo ke mfa' yi.

¹⁶Bat-Shéba kwim ntunkekwi' mi mbwe mfen. Mfen bètte ndù: a nu ke?

¹⁷A bùnte ndù: Mfen àm, o lo lo' Tshùaben Nsi o nsaṅlaṅ yi ntshob me ndù nshum o Salomon bèn jù fen ndùs'o nsi kwù là, tswe num diaṅkwa so ke tô.

¹⁸Ndonni Adoniya bèn ntù' be mfen, wù mfen, o ke' lèn sàm ju bwe!

¹⁹A zwite ba nyàmna', ba mfô tse bo tshote là boa mbwe yàme; a tsiaṅ njoṅ bon mfen tse bandum fa, Abiatar ngale'te Nsi bo Yoab tàndà ntsho. Là, a ke tsiaṅ nkuan o Salomon.

²⁰Mfen àm, njoṅ ngô Israél fa te miag num o, nke nzwi'te ndù o soṅ yub mèn z'a nsi jù fen, tswe diaṅkwa ke tô ndùse mfen àm nsi kwù là.

²¹Me bag nshum o Salomon nsi tù' à ben kebwô ndùse mfen àm nsi nèn tèt tà tse là.

²²Ndùs'a ke nke' ntshobte bo mfen nà, Natan, ngatshob ntshob Nsi ṅwag.

²³Bo bù nz'é mfen ntshob ndù: Tshù Natan ngatshob ntshob Nsi li. A tsho ndà, ngwù nsi kabkab mbwe mfen,

²⁴ntshob ndù: Mfen àm a b'a kua' wù bèn ntshob ndù: Adoniya nsi jù fen ndùse me nsi kwù là, a nsi tswe num diaṅkwa sàm à?

²⁵Ndonni a swe' nèn nzwite ba nyàmna', ba mfô, tse bo tshote là boa mbwe yàme; a tsiaṅ njoṅ bon mfen tse bandum fa, tàndà ntsho bo Abiatar ngale'te Nsi. Bo tshwèt njù mbèn nke nu, nke ntshu'te ntshob ndù: Mfen Adoniya te ku i num nenàfi.

²⁶Là, mbe se' mba me nkuan o là, ke Tsadok ngale'te Nsi, ke Benaya Yéhoyada, ke nkuan o Salomon no, bo ke' tsiaṅ yage.

²⁷Kua' tshen nu li ke ntôg à mba mfen àm kô l'à? Me tshob a nummbe mfen àm ke' yoṅ nsoṅ kuan tse mèn z'a nsi tswe diaṅkwa se ndùs'a nsi kwù là.

²⁸Mfen David bùnte ndù: Tsiaṅ Bat-Shéba là me. A tsho ndà, ntsin mbwe mfen.

²⁹Mfen kàn mfe ntshob ndù: Tshùaben z'a na' ntshu' àm num njoṅ nge' fa là b'a ntùn!

³⁰Me lo kàn mfe num lén Tshùaben Nsi ba Israél ntshob ndù nshum o Salomon zi jù fen ndùse me nsi kwù là; a yi zi lo' yàm dù', tswe num diaṅkwa sàm. Me nsi bèn zwiagte yen nu là sènni.

³¹Bat-Shéba vù nsi kabkab mbwe mfen, ntshob ndù: A bwô ndù mfen àm David te ku i num nenàfi matmat.

³²Mfen David tshob ndù: Tsiaṅ Tsadok ngale'te Nsi, Natan ngatshob ntshob Nsi bo Benaya nshum Yéhoyada là me. Bo tsho ndà, nse' mbwe mfen.

³³Mfen tshob bo ndù: Bin lo' ghabéb ntshwèt, ngù nshum àm Salomon ko' num ko' yàm nyàm, bin lo' i nswe' nèn yi mà Guihon.

³⁴Tsadok ngale'te Nsi bo Natan ngatshob ntshob Nsi nsi yo' i fen bwe num ngô Israél. Bin nsi tô nta tshob ndù: Mfen Salomon te ku i num nenàfi!

³⁵Bin nsi tam njam i, bin à bo ko'o. A nsi tswe num diaṅkwa sàm, be mfen num yàm dù', nummbe me yab à yi mfen Israél bo Yuda.

³⁶Benaya nshum Yéhoyada bùnte mfen ndù: Amén! Mba Tshùaben Nsi mfen àm bèn ntshob ze be ndaṅndaṅ.

³⁷A bwô ndù Tshùaben ke mbe bo Salomon mb'a na' mbe bo mfen àm David là, mbù'te diaṅkwa se, a nèn tù ntshùa se mfen àm David.

³⁸Tsadok ngale'te Nsi, Natan ngatshob ntshob Nsi, Benaya nshum Yéhoyada, ba Kérét boa ba Pélétia swe' nène. Bo ghù Salomon ko' num nyàm David, a kel i nèn yi mà Guihon.

³⁹Tsadok ngale'te Nsi lo' ndô mfèt mum ntàb njo' Salomon yi. Bo tô nta, njoṅ ngô fa tshob ndù: A bwô ndù mfen Salomon te ku i num nenàfi.

⁴⁰Njoṅ ngô fa tam njam i, nke ntô medub, mbèn nke ntsiaṅte neshu, kà tshu'te yub ghù tsha' nke nyi'te.

⁴¹Adoniya boa ben ts'a tsiaṅ yub là ju' yen tshu'te là ndùse bo miagte nejù jujù là. Yoab ju' nze nta ntshob ndù: Yen tshu'te li z'a tshwèt nyi'te tusô là b'a ndùke?

⁴²Yonatan nshum Abiatar ngale'te Nsi ṅwag ndùs'a ke nke' ntshob nu là. Adoniya tshob ndù: Kù'te nse'e, o b'a neta mèn, o lo' tshô ntùn nse' yi.

⁴³Yonatan bùnte Adoniya ndù: Tshù tshùaben be David lo' Salomon ngù mfen yi.

⁴⁴Mfen lo tum i boa Tsadok ngale'te Nsi, Natan ngatshob ntshob Nsi, Benaya nshum Yéhoyada, ba Kérét boa ba Pélétia, bo lo ghù a ko' num nyàm mfen.

⁴⁵Tsadok ngale'te Nsi bo Natan ngatshob ntshob Nsi yo' i fen mà Guihon. Bo lo bwe mbe bèn njam kà nke ntsiaṅte; tusô tshwèt nyi'te, a tshu't'é là ze bin tshwèt nju' là.

⁴⁶Salomon yà tswe mba num diaṅkwa fen.

⁴⁷Mba tshe' mfen yà se' nelab mfen David, nke ntshob ndù: A bwô ndù Nsi o ghù lén Salomon ju'ni ntshùa so, a bèn mbù'te diaṅkwa se tù a tshùa so. Mba mfen kwim ntunkekwi' mi num kunndà se.

⁴⁸Mfen bèn ntshob mba ndù: Ghamte be Tshùaben, Nsi Israél z'a fà njùndà àm me sènni num diaṅkwa sàm, mbèn mbam me ndù me yen i yàm nà.

⁴⁹Bwôg ghom njoṅ ben Adoniya fa ts'a tsiaṅ yub là; bo lote nsi, mba we lo nèn ze bag.

⁵⁰Adoniya bwôg Salomon; mba yi ze lo nsi, nèn ntshùb ndô tômbwôg le'te Nsi.

⁵¹Bo nèn nsoṅ Salomon yen nu là ntshob ndù: Tshù ù, Adoniya bwôg mfen Salomon, nèn ntshùb ndô tômbwôg le'te Nsi, nke ntshob ndù: A bwô ndù mfen Salomon kàn mfe sènni ndù a ke nsi lo' à ṅwi zwi nkuan i yi!

⁵²Salomon tshob ndù: A be z'a b'a mèn nenùn nà, mba ntàn nyiaṅtu i ke nsi vù nsi; là, a be z'a lem metsit tshùagntù ntù i là, mb'a kwù.

⁵³Mfen Salomon tum bo nèn mfiag i num tômbwôg le'te Nsi. A se' ngwù nsi mbwe mfen Salomon, mfen tshob yi ndù: Nèn ntùm yu ndà.