Read Medumba 1 Fenfen 10 Bible Online

1 Fenfen 10 - Medumba bible

1 Fenfen 10

¹Mfen Séba z'a na' mb'a mènnzwi là ju' bo nke nsoṅte nu mfà num Salomon, ndùlal'a se' num nelo' ba tànkùt ndaṅt'é yi.

²A se' Yérusalém bo mo' bwoṅ benntùn, mba bwoṅ kamél ndù bo ket mfèt nelamte, nket gol ndù a yàm neshu boa ndoṅ tanjoṅ. Mfen mènnzwi là tsho ndà Salomon, nsoṅ i njoṅ tshu fa ts'a ghù ntù i là.

³Ndùlala Salomon tote miag mi num njoṅ tshu fa ts'a bètte là; sàm ju mba ntshù' lo ke tshùa mfen Salomon, ke sag i netote ntun mi mfen mènnzwi.

⁴Ndùse mfen mènnzwi z'a Séba yen njoṅ zenu Salomon fa bo ba' z'a kut là,

⁵njen jujù z'a be num téblé se, dù'ntswe ghafa', fa' kamkam tse boa nzwe tshobe, ghama' ndu' tse boa tshule'te Nsi ts'a ke nton ntùm ndà Tshùaben nà, ntù i tum,

⁶a tshob mfen Salomon ndù: Njoṅ tshu fa me na' nju' bo tshob mfà num o bo zenu o là na' mb'a kua' nenùne.

⁷Me lo ke yoṅ nke mbam ntshob benntùn, mb'a ndonni ze tu wul àm se'e, ndo' kua' miag màm njen yi là. Nda' ndù nu tse bo soṅ àm nà ke' be mba nda' njoṅ kam ze miag màm yen nà. Zenu o ya' nka', lén so bèn nju'ni ntshùa mba bo ke nsoṅte là.

⁸Ghafen b'a zwi tsho, ghafa' tsho, tshen ni tse bo be mbe mbwe o njoṅ ndù fa, nke nju' zenu o là.

⁹Ghamte be Tshùaben Nsi o, yi ze nu tsho bwô i, a te o num diaṅkwa ngô Israél matmat là. A lo yo' o fen ndù o ke ngù nu ndaṅndaṅ bo nunetsine.

¹⁰Mfen mènnzwi là fà gol mfen Salomon bon bàa nkù, mfà mfèt nelamte yi kua' yàme, boa ndoṅ tanjoṅ. Bo lo ke bèn mfà mfèt nelamte mfen Salomon a yàm mba njoṅ mi mfen mènnzwi z'a Séba fà yi là.

¹¹Nsitima Hiram mi a ket gol z'a Ofir nse' yi là lo ket mba ntù bù bwe boa ndoṅ tanjoṅ nse' yi.

¹²Mfen lo' ntù bù là nabte kàb neyé'te bwe yi ntùm ndà Tshùaben mba ntùm ndà mfen. A lo' mo' nabte ndoṅ nse' yi boa mbelàbe, num ghabu' tshu. Lèn men ntù bù là ke' to' bèn nse'e; bo ke' to' bèn njen lèn i tà nse' nkum sènni.

¹³Mfen Salomon fà mba ke lo ze mfen mènnzwi z'a fe Séba kô là yi, mba ke lo z'a bètte là. A bèn mfà tshu yi yàme, njoṅ z'a ku'ni ju ze be ta' mfen mba yi Salomon fà mèn nà. Ndùlala yen mfen mènnzwi li bèn njam ntùm ngô i boa ghafa' tse.

¹⁴Gol z'a ke nse' Salomon mba zit ngu'njù lo là na' mb'a talaṅto ntshob ntôg bon ntôg nkù ntôge;

¹⁵kà njôg ngù z'a ke nsô bu ghatantàne, bo z'a ke ndo' tshuntàn njun yi là, z'a ke mfe fenfen Arabia boa ba ngomna ntùm ngô là.

¹⁶Mfen Salomon lo' gol z'a tswe là nabte tshètntsho ndùbndùb yi nkù bàa, ta' tshètntsho nke ndo' gol ndô nkàb nkù ntôge;

¹⁷mbèn ndo' gol z'a tswe là nabte memo' ntshètntsho nke'nke' yi nkù tat, ta' tshètntsho nke ndo' mina gol nkù tat. Mfen yab men ntshètntsho là ntùm ba' fèn Liban.

¹⁸Mfen lo' sô nsennyàm nabte diaṅkwa ndùb yi, ndo' gol ntùn njo' i yi.

¹⁹Diaṅkwa là lo ghù ndaṅ mi ntôge. Laṅ se s'a be mfe tù là diaṅ mbume, num njam i; diaṅ lo ghù mbu mi mba num zit bag i lo. Ngwayit mbàa lo be mbaṅ mbu diaṅ,

²⁰ngwayit ntshob bàa gham be num njoṅ ndaṅ diaṅkwa fa, ndù bo tete yub ndaṅndaṅe. Bo ke' yoṅ nto' ghù ndùlala num sàm mfen mba ntshù'.

²¹Bo lo lo' a gol nabte njoṅ tse ntu' mfen yi fa, ndo' à gol ntùn nabte njoṅ tshu téblé ba' Liban yi. Bo lo ke lo' silba nabte sàm ju yi. Silba lo ke be mo' ju num ze ngelaṅ Salomon.

²²Nummbe bo lo ghù nsitima Tarsis boa mi Hiram num dibantse. A lo ke mbe tôg ngu'njù tat mi nsitima Tarsis lo' gol bo silba, sô nsennyàm, ba nkanmaké boa paon (a b'a mo' tshaṅ saṅ se mbàb mi zi neshu, ngù nto'nto' là) nse' yi.

²³Mfen Salomon tshùa njoṅ fenfen nsitsha' fa num tshunkàb bo zenu.

²⁴Mba we lo lo ke ndiag neyen Salomon, num neju' zenu ze Nsi yab tu i là.

²⁵Mba we lo lo ke ndo' nda' nse' yi: Tshu tse bo lo' silba nabte yi là boa tse gol, ba nzwe, tshuntshùag, ba labinda, ba nyàmdiaṅe, boa nyàm tse kekwèn bo nyàmdiaṅ bèn mbwe là. Bo lo ke ngù ndùlala mba num zit ngu'njù lo.

²⁶Salomon lo ghù nkalig ntsho ntshob kuà ntsha' mbùm boa ghako' nyàm benntùn ntsha' ntshob bàa gham, njabte yub ntùm ntusô nkalig ntsho, njab tsemo' mbaṅ i Yérusalém.

²⁷Mfen ghù nkàb tù' ju banban Yérusalém ndaṅndaṅ mba ndoṅ nà; sédra bèn njàm mba ba fènngab ts'a be mbile, nke nku' ntùm tômbo' là.

²⁸Tse nyàmdiaṅ Salomon na' nke mfe à Egipto. Bwoṅ ghatantàn mfen ke nèn à bwe ndo' yub bwoṅ, num njoṅ ntshuntàn ze bo nabte là.

²⁹Ta' kalig ntsho lo ke nko'o, ntum ntùm ngô Egipto num ndô nkàb nkù ntôge, ta' nyàmdiaṅ ndô nkàb bon tàn nkù. Tshen ghatantàn nà lo ke njun tshu mba num ze tu fenfen Hit boa tse Siria.