Read Medumba 1 Fenfen 11 Bible Online

1 Fenfen 11 - Medumba bible

1 Fenfen 11

¹Mfen Salomon lo kô zwi tum neshu njab mbaṅ ngon Faraon: Ngonngon Moab, Ammon, Edom, Sidon, Hit,

²ngô tshen nà netèt tse Tshùaben na' ntshob bon Israél ndù kà bo nèn mbaṅ bo, ke bèn bam ndù bo se' mum ngô Israél là. Nummbe be bo kaṅ ntù bon Israél nso num tshob nsi. Là nkôni tènte Salomon, a tam njam tshen ngô là.

³A so ngonngon mfen ntu nkù sammbàa, ngù màndà tse ntu nkù tat. Ndùlala zwi tse kaṅ ntù i.

⁴Ngelaṅ ze Salomon ywèn nà, zwi tse kaṅ ntù i nso num tsemo' nsi ghua; ntù i ke bèn mbe num Tshùaben Nsi i fafa, mba ntù tàab David na' mbe num Nsi là.

⁵Salomon tam njam Astarté, nsi ba Sidon, Milkom neto ba Amor.

⁶Salomon ghù ju z'a ke' bwô là num miag Tshùaben, ke tam njam Tshùaben koṅkoṅ mba tàab David là.

⁷Ndùlala Salomon te mbwe' num mbat z'a be mbwe Yérusalém nà num lén Kemosh neto ba Moab, bo Molok neto bon Ammon.

⁸A ghù ndùlala njoṅ zwi tum fa ts'a ghù là, bo nke nton labinda boa tshule'te nsi tshobe.

⁹Tshùaben ya ntù num Salomon, nummb'a lo tsho' ntù i num Tshùaben Nsi ba Israél z'a na' ṅwag yi mum njem yoṅ bàa là.

¹⁰Tshùaben lo to' i ndù k'a nèn mbaṅ tsemo' nsi; là Salomon ke ze men ntshù' Tshùaben nà.

¹¹Ndùlala Tshùaben tshob Salomon ndù: Mb'o ghù ndùlili ke ze kàn sàm boa ntshù' màm mi me na' nkite wù là, me nsi kwé nufen o fà ngafa' o.

¹²Nda' ndù a tshùa njam lén tàan David, me ke nsi ghù ndùlal'a ndùs'o ke' ntùn nà. Me nsi kwé à ntùm mbu nshum o.

¹³Mba ndùlala me ke nsi kwé à njoṅ nufen fa. Me nsi faṅ ta' nzwit ntshù' mén o, mb'a num lén ngafa' àm David bo lén Yérusalém ze me na' ntsho' là.

¹⁴Tshùaben kamte ta' ngakeban, a lo nsi num Salomon. A na' mb'a Hadad ze Edom, ndù a b'a nzwit fen ntùm ngô Edom.

¹⁵A lo be ngelaṅ ze David le' Edom ntsho, ndo' i là, Yoab tàndà ntsho ko' nèn tshoṅ fe ben, ndùlal'a tsho nzwite njoṅ bon bandum tse bo be Edom nà.

¹⁶Nummbe Yoab boa njoṅ ba Israél fa lo tswe bwe maṅwù ntôge, tà nkum ndùse bo biagte njoṅ bon bandum fa Edom nà.

¹⁷A yen ngelaṅ nà ze Hadad boa ba Edom, ghafa' tàab na' nkù nèn mà Egipto là. Hadad lo be kù nèn Egipto ndù a ke' à ménnshum.

¹⁸Bo lo Madian nèn Paran, ndo' ben bo be Paran nà boa bo nèn Egipto mbaṅ Faraon, mfen Egipto. Faraon fà ba' Hadad, mfà jujù yi, mfà mba tsha' yi.

¹⁹Hadad be mènfen num miag Faraon, kà Faraon fà ntù'njam ko' ze mènnzwi Hadad ndù a be nzwi i. A na' mb'a ntù'njam Tashpenès z'a be màbwengub Faraon nà.

²⁰Ngon mà Tashpenès bwe mén mandum, lén se Guenubat, Tashpenès kwiagt'é ntùm ndà Faraon. Guenubat ku' à ntùm ndà Faraon, netèt bon Faraon.

²¹Ndùse Hadad tsin Egipto nju' ndù David nèn ntèt tà tse, nô mbaṅ bo, mba ndù Yoab tàndà ntsho lo kwù là, a tshob Faraon ndù: Faṅ me nèn ntùm yàm ngô.

²²Là Faraon tshob yi ndù: Z'a bwoṅ wù nsen ni b'a ke k'o nke ndiag nebèn ntùm yu ngô à? A bùnte ndù: Sàm ju ke' bwoṅ me, nda' ndù a bwô o faṅ me nène!

²³Nsi bèn nkamte mo' ngakeban, a lo nsi num Salomon. Yen mèn nà b'a Rezon, nshum Eliada z'a na' nkù ju tàfa' i Hadadézer, mfen Tsoba là.

²⁴A na' mbèn nkùmte benntùn mbaṅ i, mbe tu num tshen ben nà ndùse David ke mbiagte tse ntshu ntsho tàfa' i là. A lo lo' bwoṅ benntùn nà boa bo kù nèn Damas, ntete bwe mbèn nsa' ngô Damas.

²⁵A na' mb'a ngakeban Israél njoṅ ngelaṅ fa ze Salomon ke' ntùn nà. A lo ke ngù nukebwô be mba Hadad là, nke ngwag Israél. A lo tô mum ngô Siria.

²⁶Mba Yéroboam ngafa' Salomon bù' bu i nsi num mfen. A na' mb'a nshum Nebat ze Efrata, ngô Tseréda. Lén màab z'a b'a mfôg mènnzwi là na' mb'a Tserua.

²⁷Tshù mb'a tshùate k'a bù' bu i nsi num mfen ni: Salomon lo ke nkut Millo, nebiag fa s'a be num tusô tàab David là.

²⁸Yéroboam na' mb'a neta mônke', ndù ngù' num yi. Ndùse Salomon yen i tshwèt fa' là, a fà njoṅ ghanjôgmasi fa tse bo tum ntùm tunndà Yosèf là yi.

²⁹Num yen ngelaṅ nà, Yéroboam tum Yérusalém. A bumte bo mo' ngatshob ntshob Nsi num manze, lén se Ashija, mbe ze Silo, ndù a ket kummbaṅ nswe. Bo na' mbe tshwèl à nda' ntu tshob bàa.

³⁰Ashija tshùb kummbaṅ nswe s'a be num i là, mfagt'é mfé ntshob bàa gham,

³¹ntshob Yéroboam ndù: Lo' tsho mfé tse bwe gham! Nummbe Tshùaben Nsi Israél tshob ndù a nsi kwé nufen mum mbu Salomon, fà nzwit benntùn gham wù.

³²Là ta' nzwit nsi tù' num lén ngafa' i David bo lén Yérusalém, tusô s'a na' ntsho' netèt njoṅ nzwit bon Israél fa là.

³³Yen nà b'a nummb'a ghua' Tshùaben, ngwù nsi mbwe Astarté, nsi ba Sidon, Kemosh, nsi Moab, Milkom, nsi bon Ammon, mba nummb'a ke' zin num tse manze, ke ghù nu ndaṅndaṅ num miag mi, ke ze ntshù' mi boa ntag mi mba David, tà Salomon na' nke ngù là.

³⁴Me ke nsi sô njoṅ nufen fa à kua' mum mbu mi, nummbe me nsi faṅ i num fen njoṅ ngelaṅ fa z'a ke' ntùn nà num lén ngafa' àm David ze me na' ntsho' i, a ze nkàn màm boa ntshù' màm nà.

³⁵Là me nsi kwé nufen bu nshum i fà nzwit benntùn gham wù;

³⁶me nsi faṅ ta' nzwit ntshù' nshum i ndùlala ndù ngafa' àm David ke mbe be kua' nka' mbwe àm mà Yérusalém, tusô se me na' ntsho' num neyab lén sàm bwe là.

³⁷Me nsi lo' o, o tô mba ke lo ze ntù o kô là. O nsi be mfen ba Israél.

³⁸A be z'o ghù nu ndaṅndaṅ num miag màm, nze ntshù' màm boa nkàn màm, mba ngafa' àm David na' ngù là, mba me nsi be bag wù, kut ta' ba' z'a tswe là wù mba me na' nkut David là, mbèn mfà Israél wù.

³⁹Me nsi tshùa ndùlala kôg nzwit David, là ke kôg i matmat.

⁴⁰Salomon diag nezwi Yéroboam. Ndùlala Yéroboam lo nkù nèn ntùm ngô Egipto mbaṅ Shishak mfen Egipto. A tswe Egipto tà nkum ndùse Salomon kwù là.

⁴¹Tshé' mfa' Salomon, njoṅ tshu fa ts'a ghù là, zenu i, bo kite njoṅ i fa ntùm ṅwa'ni mfa' Salomon.

⁴²Salomon lo tô njoṅ ngô Israél fa ngu'njù ṅam nkuà. A na' nke ntswe à Yérusalém.

⁴³Yen nà be tôg Salomon nèn ntèt tà tse. Bo tshoṅ i ntùm tusô tàab David. Roboam nshum i jù fen num ze dù'.