Read Medumba 1 Fenfen 13 Bible Online

1 Fenfen 13 - Medumba bible

1 Fenfen 13

¹Mo' mèn Nsi fe num ze tu Tshùaben Yuda nse' Bétél, ndùse Yéroboam tsin mbaṅ tômbwôg nke nton tshu nelamte là,

²ntshob nu num ze ntshu Tshùaben num tômbwôge, ntshob ndù: Tômbwôg, tômbwôg, tshù nu ze Tshùaben tshob li: Bo nsi bwe mo' mén mandum ntùm tunndà David tswi lén se Yosias. Yen mén nà nsi se' tô ghale'te Nsi tse bo be mfa' ntùm ba mbwe' là num wù tômbwôge, ton mvôg benntùn num o.

³Mèn Nsi là yoṅ mfà ta' keki. Tshù keki z'a tshwèt nda'te ndù Tshùaben bèn ntshob li: Tômbwôg nsi bèle, bwembwôg z'a be num bwe là sate.

⁴Ngelaṅ ze mfen ju' ntshob mi mèn Nsi tshob mfà num tômbwôg s'a Bétél là, a nyit bu i num tômbwôg ntshob ndù; Bin ghom i. Là bu i z'a nyit num mandum nà là kwù, nsaṅe, a ke bèn nku'ni nelo' i mbèn yi njam.

⁵Be ndùse tômbwôg bèt, bwembwôg z'a be bwe là sate mba mèn Nsi na' ntshob num ze ntshu Tshùaben nà.

⁶Ndùlala mfen tshob Mèn Nsi là ndù: Netsho'o, ma' fenkaṅ Tshùaben Nsi o, nde'te num yàm tu, ndùlala ndù bu àm bèn mbèn me. Ndùlala mèn Nsi yab kam Tshùaben, bu mfen bèn mbèn mbe mb'a na' mbe là, k'a lo' bu i mbèn yi num i.

⁷Mfen tshob mèn Nsi ndù: Se' bag wù nèn ndà, o jù ju, me nsi bèn fà mba nda' wù.

⁸Là, mèn Nsi bùnte mfen ndù: A be z'o fà mba ta' bag ndà o me là, mb'a be me ke nèn bag wù. Me ke nsi jù, ke bèn nu sàm ju ntùm yen ngô li.

⁹Nummbe Tshùaben lo tshob me ntùm ntshob mi ndù: O ke nsi jù, ke nu, ke bèn mbèn à num manze z'o na' nèn yi là.

¹⁰Ndùlal'a lo Bétél nène, ke bèn ntshùa num manze z'a be se' ntshùa bwe là.

¹¹Mo' njwèn ngatshob ntshob Nsi lo be bwe, nke ntswe Bétél. Nshumnshum tse se' nsoṅ i njoṅ tshu tse mèn Nsi na' ngù Bétél sen lé'njù là là boa ntshob mi a na' ntshob mfen nà. Ndùse bo soṅ tà yub yen tshô là là,

¹²a bètte yub ndù: A tshùa à zit manze kà nèn à? Bon tse lo yen manze ze mèn Nsi z'a fe Yuda tshùa bwe là.

¹³Ngatshob ntshob Nsi tshob bon tse ndù: bin nabte kekwèn nà me. Bo nabte kekwèn yi, a ko' num bwe.

¹⁴A bwe njam mèn Nsi, nkot'é ndù a tswe nsi tun tù térébintô, a bètt'é ndù: O b'a mèn Nsi z'a fe Yuda là ké? A bùnte ndù: Me b'a yi.

¹⁵Ngatshob ntshob Nsi tshob mèn Nsi ndù: Se' be nèn ndà o jù meju.

¹⁶Là mèn Nsi bùnte ndù: Be me ke nèn bag wù, ke jù sàm ju, ke nu sàm ju ntùm yen ngô li,

¹⁷nummbe me lo kwé kàn Tshùaben a tshob me ndù: O ke nsi jù ke nu sàm ju ntùm yen ngô là, ke be fe ntshùa num manze z'o tshùa bwe ndù nenèn nà.

¹⁸Là, a tshob yi ndù: Mba me yàm b'a ngatshob ntshob Nsi mba wù là. A b'a ta' Angél bèn ntshob me num ze ntshu Tshùaben ndù me lo' o be nèn ndà àm o jù bàn mbèn nu ntse. A na' nke ntshob à tatte yi.

¹⁹Mèn Nsi bèn njam bo ngatshob ntshob Nsi, njù bàn, nu ntse ndà i.

²⁰Ndùse bo be téblé là, Tshùaben tshob nu ngatshob ntshob Nsi z'a lo' i mbèn yi njam nà.

²¹A kua' neta, ntshob mèn Nsi z'a fe Yuda là ndù: Tshù nu ze Tshùaben tshob li: Mb'o ta tu num ntshù' Tshùaben, ke ze kàn Tshùaben Nsi o s'a na' mfà wù là,

²²mb'o bèn njam njù bàn, nu ntse ntùm ngô ze bo na' ntshù' o nejù ke nenu bwe lo là, bo ke nsi tshoṅ fe o mbaṅ fi tà tsho.

²³Ndùs'a miagte nejù bàn bo nenu ntse là, ngatshob ntshob Nsi z'a lo' i mbèn yi njam nà nabte kekwèn yi.

²⁴Mèn Nsi lo nène, ntsho num manze mbumte bo ngwayit, ngwayit zwi i. Fe i nyit num manze; kekwèn tsin mbaṅ i, ngwayit bèn ntsin ze mbaṅ fe i.

²⁵Benntùn be tshùa njen fe i ndù a nyit num manze, ngwayit tsin mbaṅ bwe. Bo zin nkum tusô nsoṅ njwèn ngatshob ntshob Nsi z'a ke ntswe bwe là.

²⁶Ndùse ngatshob ntshob Nsi z'a lo' mèn Nsi num manze mbèn yi njam ju' yen nu là là, a tshob ndù: A mèn Nsi z'a na' nta tu num ntshù' Tshùaben nà. Tshùaben swèn i ngwayit k'a mfagt'é ngù a nkwù, ndaṅndaṅ mb'a be ntùm ntshob mi Tshùaben tshob yi là.

²⁷Ndùlala tshob bon tse ndù bo nabte kekwèn yi. Bo nabte kekwèn a lo nène.

²⁸A tèt fe mèn Nsi ndù a nyit num manze, kekwèn bo ngwayit tsinte mbaṅ bwe. Ngwayit lo ke fèt fe mèn Nsi, ke fagte kekwène.

²⁹Ngatshob ntshob Nsi bù' fe mèn Nsi nsi, njab num kekwèn ndo' mbèn yi. Ngatshob ntshob Nsi nèn tusô ndàn i bwe mbèn ntshoṅ i.

³⁰A yab fe i ntùm ko' se fi, bo làn i, nke ntshob ndù: Wé! Mfèl àm!

³¹Ndùs'a tshoṅ i là, a tshob nshumnshum tse ndù: A bwô ndù bin tshoṅ àm ntùm fi se me tshoṅ mèn Nsi bwe là ndùse me nsi kwù là. Bin yab mvôg màm mbaṅ mi.

³²Nummbe ntshob mi a na' nkua' ntshob num ze tu Tshùaben nà nsi bumte num tômbwôg Bétél mba num njoṅ mba' fa, mi mbwe' ts'a ntùm ntusô Samaria là.

³³Mba yen nu li lo tôg Yéroboam ke kag manze kebwô z'a tshùb là. A bèn nabte tsemo' ghale'te Nsi ts'a tswitte yub ntùm ngô là; mba we lo z'a kô là mb'a lo' i ngù ngale'te Nsi yi ntùm ba mbwe'.

³⁴Yen nà na' mb'a nkù nukebwô mum tunndà Yéroboam. A ju z'a ghù bo biagte tunndà i, mbiagt'é num nsitsha' là.