Read Medumba 1 Fenfen 14 Bible Online

1 Fenfen 14 - Medumba bible

1 Fenfen 14

¹A lo be num yen ngelaṅ nà Abija nshum Yéroboam tam ngokèt.

²Yéroboam tshob nzwi i ndù: Netsho'o, lo nsi nkaṅte wul o, ke ghù ndù sàm mèn lèn ndù o b'a nzwi àm. Swe' nèn Silo. Ngatshob ntshob Nsi Ashija b'a bwe. A yi na' mbèn ntshob me ndù me nsi be mfen yen nzwit mèn ni.

³Lo' bàn ntu' gham, ndo' ba tage, bo ta' ntu' ṅwa'a, nèn ntsho ndà i. A nsi soṅ o mb'a be num mén nà.

⁴Nzwi Yéroboam ghù mb'a tshob là, ndo nèn Silo, ntsho ndà Ashija. Ashija lo ke bèn nku'ni neyene. Nummbe ywèn lo à kaṅ miag mi.

⁵Tshùaben lo bwôgmbwe ntshob Ashija ndù: Nzwi Yéroboam a' se' bètt'o nu num nshum i, nummb'a tshwèt ngone. O nsi tshob yi ndù bo ndù. Ngelaṅ z'a nsi se' là, a nsi lo' wul i ghù à mo' mènnzwi ghua yi.

⁶Ndùse Ashija ju' nku mi, ndùs'a ke ndut nkù'ndà là, a tshob ndù: Nzwi Yéroboam, tsho ndà. Numk'o nke ndiag nelo' wul o ngù mo' mènnzwi ghua yi à? Me ghù ntum nesoṅ nu ts'a ta neshu là.

⁷Tshù nkùn z'o nèn tswi Yéroboam ni: Tshùaben Nsi Israél tshob ndù: Me lo bù' o tù netèt ngô, ndo' o ngù mfen ngô Israél yi;

⁸me lo kwé nufen tunndà David mfà wù. Là, o ke' be mba ngafa' àm David z'a na' nke nze nkàn màm, nke nzin njam àm njoṅ ntù i fa, mbèn nke ngù à be nu ndaṅndaṅ num miag màm nà.

⁹O ghù nukebwô ntshùa njoṅ benntùn fa tse bo be mbwe o là. O nabte tsemo' nsi boa neto ntùn num nelo' nkamte yantù àm yi. O tù' ma' àm tsho à tà njam mvèn o.

¹⁰Tshù ju z'a ghù me lo' nge' nse' yi mum tunndà Yéroboam nà. Me nsi biagte mba we lo z'a b'a ze mèn Yéroboam nà, kuan boa bonla' tse bandum ntùm ngô Israél. Me nsi bé'te tunndà Yéroboam mba bo be mbé'te nenà nsindà là, k'a miagte mbi ze.

¹¹Mèn z'a nsi tum ntùm tunndà Yéroboam kwù tusô là mba ba mbù nsi fèl i, mèn a kwù mà tshwèt là bon nsaṅ fèl i, nummbe Tshùaben tshob ndùlala.

¹²Mbe se' mba wù là, lo nsi mbèn ndà o. Mén nsi kwù ndùs'o yoṅ te ku ntùm tusô là.

¹³Njoṅ ngô Israél fa nsi làn i, tshoṅ i. Ntùm ze tunndà Yéroboam fa, bo nsi tshoṅ à nda' yi. Ntùm tunndà Yéroboam a b'a yi bèn ntum mènfen mbwe Tshùaben Nsi ba Israél.

¹⁴Tshùaben nsi yab mo' mfen ntùm ngô Israél, z'a nsi biagte tunndà Yéroboam sen lé'njù là là. A ke' b'a ju z'a yà bumte là ké?

¹⁵Tshùaben nsi shùm Israél, mba nka'nesoṅ ze ntse be nshùm i ntùm ntse là. A nsi tsho' Israél ntùm mbwô ngô z'a na' mfà tà tse là, sat'é, a dut nèn mo' yoṅ ta'ntse, nummbe Israél lo nabte ba neto ndo' nkamte yantù Tshùaben yi.

¹⁶Tshùaben nsi ghua' Israél num nu nukebwô tse Yéroboam ghù, mbèn ntènte Israél a ghù là.

¹⁷Nzwi Yéroboam lo nsi nène. A zin nkum Tirtsa. Ndùs'a ke ndut là mén yoṅ nkwù.

¹⁸Bo tshoṅ i, ngô Israél fa làn i ndaṅndaṅ mba Tshùaben tshùa num ntshu ngafa' i Ashija, ngatshob ntshob Nsi ntshob là.

¹⁹Tshé' mfa' Yéroboam, mb'a na' nde' ntsho là, bo mb'a na' ntô là, bo kite fa ntùm ṅwa'ni Kronika fenfen Israél.

²⁰Yéroboam lo tô ngu'njù ntshob bàa ṅam mbàa, nèn ntèt tà tse. Nshum i Nadab tô num ze dù'.

²¹Roboam nshum Salomon lo tô Yuda. A lo be jù fen ndù a ghù ngu'njù ntshob ntshù' ṅam nkuà. A tswe Yérusalém, tusô se Tshùaben na' ntsho' netèt njoṅ nzwit Israél fa nete lén se bwe là ngu'njù ntshob sammbàa gham, nke ntô. Lén màab ngon Ammon na' mb'a Naama.

²²Yuda ghù ju z'a ke' bwô là num miag Tshùaben; bo tshùa njam nukebwô tse bo ghù là, nkamte lànghe' Tshùaben. Nummbe bo lo ghù ntshùa mba njoṅ ze tà tshob na' mbe ke ghù là.

²³Mba bo yub kut ba mbwe', nte ba ndoṅla' boa ba neto num njoṅ ntshùa nkônga neṅate fa mba bam ntù fi.

²⁴Mba ba kattù lo be ntùm fa' neghamte. Bo fi'te tshùaya'nu tse ngôngô tse Tshùaben na' nta' yub mbwe bon Israél ke ngù là.

²⁵A lo be kum ngu'njù tàn mba Roboam be mfen nà, Shishak, mfen Egipto lo nsi num Yérusalém.

²⁶A lo' tshunkàb ndà Tshùaben boa tshunkàb ndà mfen, a lo' njoṅ i fa. A lo' njoṅ ntshètntsho gol fa mi Salomon na' nabte là.

²⁷Mfen Roboam nabte ntshètntsho tùn num dù' mi gol, mfà njoṅ i fa mfen ghakùnde z'a na' nke mbéb ntshufe' ba' mfen nà.

²⁸Njoṅ ngelaṅ ze mfen ke nèn ntùm ndà Tshùaben nà, ghakùnde ket men ntshètntsho là, ndùse bo bèn mbèn njam nà bo lo' njoṅ i fa nèn njab ntùm to'ndà ghakùnde.

²⁹Tshé' mfa' Roboam, bo njoṅ tshu fa ts'a ghù là, bo kite ntùm ṅwa'ni Kronika fenfen Yuda.

³⁰Ntsho lo ke be tag netèt Roboam bo Yéroboam.

³¹Roboam nèn ntèt tà tse, bo tshoṅ i mbaṅ tà tse ntùm tusô David. Màab Naama na' mb'a ngon Ammon. Nshum Roboam Abijam tô num ze dù'.