Read Medumba 1 Fenfen 15 Bible Online

1 Fenfen 15 - Medumba bible

1 Fenfen 15

¹A lo be kum mbatte ngu'njù ntshob fom gham mba Yéroboam nshum Nebat be mfen nà, Abijam nke ntô Yuda.

²A tswe Yérusalém ngu'njù tat, nke ntô. Lèn Màab ngon Abisalom na' b'a Maaka.

³A yab ntù i num njoṅ nukebwô fa tse tàab na' ngù mbwe i là; a ke fà ntù i Tshùaben Nsi i koṅkoṅ, mba tàab David na' mfà ntù i koṅkoṅ nà.

⁴Là, a tshùa num lén David Tshùaben Nsi fà ta' nka' yi Yérusalém, nte nshum i num fen, mbèn ngù Yérusalém ke' tù.

⁵Nummbe David lo ghù à be nu ndaṅndaṅ num miag Tshùaben, ke lo' mvèn i ntam ta' kàn se yi mba ntshù' num njoṅ yôg se fa, kà ntag nda' nu Uria ze Hit.

⁶Ntsho lo ke be tag netèt Roboam bo Yéroboam ndùse Roboam ke' ntùn nà.

⁷Tshé' mfa' Abijam boa njoṅ tshu fa ts'a ghù là, bo kite ntùm ṅwa'ni Kronika fenfen Yuda. Ntsho lo ke be tag netèt Abijam bo Yéroboam.

⁸Abijam nèn ntèt tà tse, bo tshoṅ i ntùm tusô David. Asa nshum i tô num ze dù'

⁹A lo be kum ngu'njù ṅam mbàa mba Yéroboam be mfen Israél là, Asa be mfen Yuda.

¹⁰A tswe Yérusalém ngu'njù ntshob ntshù' ṅam nkuà, nke ntô. Màab ze ndùb b'a Maaka, ngon Abisalom.

¹¹Asa ghù nu ndaṅndaṅ num miag Tshùaben mba tàab David là.

¹²A sô njoṅ ba kattù fa ntùm fa' neghamte, mbiagte njoṅ neto fa tse tà tse nabte là.

¹³A sô mba lén màbwengub màab ze ndùb Maaka, nummbe Maaka lo ghù bo kom bebun num lén Astarté. A ghù bo be'te yen bebun nà, ndo' nèn nton ntùm fub s'a Kédron nà.

¹⁴Là, ba mbwe' ke mi ntùm ngô mba mba Asa na' mfà ntù i Tshùaben koṅkoṅ num njoṅ lé'njù yôg se fa là.

¹⁵A yab ntu' silba boa ntu' gol tse tàab mba ze tu wul i na' njab njam mum fa' là ntùm ndà Tshùaben.

¹⁶Ntsho lo ke be tag netèt Asa bo Baesha mfen Israél num njoṅ tshob lé'njù yôg fa.

¹⁷Baesha, mfen Israél ko' nèn num Yuda. A kut Rama num netshètte tse ben Asa, mfen Yuda yi, ndù kà bo tum ke bèn ntsho.

¹⁸Asa lo' njoṅ silba fa bo gol ts'a tù' ntùm tshunkàb ndà Tshùaben bo tshunkàb ndà mfen nà, mfà ntùm mbu ghafa' tse, ntum yub mbaṅ Ben-Hada, nshum Tabrimmon, nshum Hezjon, mfen Siria, z'a ke ntswe Damas là.

¹⁹Mfen Asa tshob yi ndù: A bwô ndù be wat kàn netèt be, ndaṅndaṅ mba tàa na' ngwat kàn bo yu tà là. Tshù nda' là me tum wù là, a b'a silba bo gol. Nèn mbiagte kàn s'a be netèl o bin Baesha mfen Israél là, ndùlala ndù a lo njam àm.

²⁰Ben-Hadad bam nu ze mfen Asa tshob yi là; ntum tàndà ntsho tse num mi ntusô Israél. Bo lo' Ijon, Dan, Abél-Betmaaka, njoṅ ngô Kinnerot fa bo njoṅ ngô Néftali fa.

²¹Ngelaṅ Baesha ju' là, a tsin, ke bèn nekut Rama, nèn ntswe Tirtsa.

²²Mfen Asa tsiaṅ njoṅ ngô Yuda fa ke faṅ sàm mèn, bo nèn nket ndoṅ boa ntshwèn ze Baesha ke ndo' nkut Rama yi là; mfen Asa lo' tshen tshu là nkut Guéba Benjamin bo Mitspa yi.

²³Tshé' mfa' Asa, njoṅ tse netshùa ntsho fa boa njoṅ tshu fa ts'a ghù là num ntùm ṅwa'ni Kronika fenfen Yuda ndù bo kite. Nda' ndù nku mi lo ke nja ndùs'a ywèn nà.

²⁴Asa nèn ntèt tà tse, bo tshoṅ i mbaṅ tà tse ntùm tusô tàab David. Nshum i Yosafat tô num ze dù'.

²⁵Nadab nshum Yéroboam tô Israél, mbe be ndù Asa mfen Yuda ghù num fen ngu'njù bàa. Nadab tô Israél ngu'njù bàa.

²⁶Nadab ghù nukebwô num miag Tshùaben, nzin num manze tàab, nso wul i num nukebwô tse tàab na' ngù Israél vù ntùm bwe là.

²⁷Baesha nshum Ashija, ntùm tunndà Isakar ze ntsham i, nzwi i Guibbeton, z'a na' mb'a dù' ba Filistia, ndù Nadab boa njoṅ ba Israél fa na' mbèn ndo' ntsho nkwé yi là.

²⁸Baesha zwi i num mbatte ngu'njù tat mba Asa mfen Yuda be num fen nà. A tô num ze dù'.

²⁹Ndùs'a tù' mfen nà, a biagte njoṅ tunndà Yéroboam fa, ke faṅ sàm mèn; a biagte mba ke lo z'a ghù zwiag là, ndùlala ndù ntshob mi Tshùaben tshùa num ntshu ngafa' i Ashija ze Silo ntshob là zwiagte.

³⁰Yen nu là na' mb'a num nukebwô tse Yéroboam ghù, mbèn ntènte Israél a ghù là. Bo lo tshùa bwe nkamte yantù Tshùaben Nsi Israél.

³¹Tshé' mfa' Nadab bo njoṅ tshu fa ts'a ghù là, bo kite ntùm ṅwa'ni Kronika fenfen Israél.

³²Ntsho lo ke be tag netèt Asa bo Baesha num njoṅ tshob lé'njù yôg fa.

³³A lo be kum mbatte ngu'njù tat mba Asa mfen Yuda be num fen nà, Baesha nshum Ashija tô Israél fa, nke ntswe Tirtsa. A tô num ngu'njù ntshob kuà ṅam mbàa.

³⁴A ghù nukebwô num miag Tshùaben, nke nzin num manze Yéroboam, nso wul i num nukebwô tse Yéroboam na' ngù, mbèn ntènte Israél a vù ntùm bwe là.