Read Medumba 1 Fenfen 16 Bible Online

1 Fenfen 16 - Medumba bible

1 Fenfen 16

¹Tshùaben tshob ngatshob ntshob Nsi Yéhu, nshum Hanani num Baesha ndù:

²Me lo sô o ntùm mbabe, ndo' o ngù mfen yàm nzwit mèn Israél yi; là, mb'o zin num ze manze Yéroboam, ngù yàm nzwit mèn Israél vù ntùm nukebwô, ntshùa num nukebwô yub nkamte yantù àm nà,

³m'a' bé'te tunndà Baesha, ngù tunndà o tù' mba tunndà Yéroboam nshum Nebat là.

⁴Mèn z'a nsi tum tunndà Baesha kwù tusô là, mba mbù bèn fèt fe i, bon nsaṅ fèt fe z'a kwù mà tshwèt là.

⁵Tshé' mfa' Baesha, ju z'a ghù là boa ntsho ts'a le' là, bo kite ntùm ṅwa'ni Kronika fenfen Israél.

⁶Baesha nèn ntèt tà tse, bo tshoṅ i Tirtsa. Nshum i Ela tô num ze dù'.

⁷Ntshob Nsi bèn nse' ngatshob ntshob Nsi Yéhu, nshum Hanani, num Baesha bo ze tunndà num nukebwô z'a na' ngù num miag Tshùaben, nkamte yantù i njam fa' mbu mi là; a lo tù' ndaṅndaṅ à mba tunndà Yéroboam nà, nummb'a na' mbèn mbiagte tunndà Yéroboam.

⁸A lo be kum mbatte ngu'njù ntshob ntôg ṅam mbàa mba Asa be mfen Yuda là, Ela nshum Baesha tô Israél, nke ntswe Tirsta. A tô num ngu'njù bàa.

⁹Tshe' i Zimri, tàndà ntsho ta' kam nkalig ze ntsham i. Ela na' mb'a Tirsta, nke nu mbèn nke mbum ndu' ntùm ndà Artsa, tàndà ba' mfen z'a be Tirsta là.

¹⁰Zimri tsho ndà, ndab mfen nzwi i. A lo be be ndù Asa mfen Yuda tswe num fen ngu'njù ntshob sammbàa ṅam mbàa. Zimri tô num ze dù' Baesha.

¹¹Ndùs'a be mfen kà ntswe num diaṅkwa se là, a biagte ze tunndà Baesha fa, ke faṅ sàm mèn z'a kwag i là tum, ke faṅ sàm nshum i, ke mfèl i, ke nshum i lo.

¹²Zimri biagte tunndà Baesha mb'a be ntùm ntshob mi Tshùaben na' ntshùa num ntshu Yéhu ngatshob ntshob Nsi ntshob num Baesha là.

¹³Men ntshob là na' mb'a num nukebwô tse Baesha bo nshum i Ela na' ngù, mbèn ntènte Israél a ghù, ndo' nkamte yantù Tshùaben Nsi Israél yi njam neto tshob là.

¹⁴Tshé' mfa' Ela boa njoṅ tshu fa ts'a ghù là, bo kite ntùm ṅwa'ni Kronika fenfen Israél.

¹⁵A lo be kum mbatte ngu'njù ntshob sammbàa ṅam mbàa mba Asa be mfen Yuda là, Zimri tô num lé'njù sammbàa mà Tirsta. A lo be be ndù ngô nèn ntsho num Guibbeton z'a na' mb'a dù' ba Filistia là.

¹⁶Ngô z'a na' mb'a tshwèt ntsho là ju' yen tshô là, ndù Zimri ze ntsham mfen kà nzwi i. Ndùlala njoṅ ngô fa lo' Omri tàndà ntsho ngù mfen yi be sen lé'njù là.

¹⁷Omri boa ngô lo Guibbeton nèn nkab mbu num Tirsta.

¹⁸Zimri be yen mb'a yà lo' tusô là, nèn ntùm ba' mfen, nte mbwôg num ba', ngô ntùm bwe.

¹⁹Tshù mb'a kwù ze là. Yen nà na' mb'a num nukebwô ts'a na' ngù num miag Tshùaben mb'a ke nzin num manze Yéroboam, nke nso ntù i num nukebwô tse Yéroboam na' ngù, mbèn ntènte Israél a ghù là.

²⁰Tshé' mfa' Zimri bo ntsham z'a ze là, bo kite ntùm ṅwa'ni Kronika fenfen Israél.

²¹Ndùlala ngô Israél keb nkam mbàa: Mo' kam ngô nke nkô nelo' Tibni nshum Guinat ngù mfen yi, mo' kam be yub à njam Omri.

²²Tse ben Omri bèn njù tô num tse Tibni nshum Guinat. Tibni kwù, Omri tô la'.

²³A lo be kum mbatte ngu'njù ntshob ntshù' ṅam ntat mba Asa be mfen Yuda là, Omri tô ngô Israél. A tô ngô ngu'njù ntshob bàa gham. A lo be tô num ngu'njù ntôg nke ntswe à Tirtsa.

²⁴A jun mbat Samaria Shémer num talaṅto silba bàa, a kut dù' num mbale, ntswi lén tusô s'a kut là ndù Samaria, ndaṅndaṅ mba lén Shémer nga mbat be là.

²⁵Omri bèn ngù ze nukebwô yàm neshu num miag Tshùaben, ngù kà ntshùa njoṅ ben fa tse bo be mbwe i là.

²⁶A zin be kua' num ze manze Yéroboam nshum Nebat, nso ntù num nukebwô tse Yéroboam na' ngù Israél vù ntùm bwe, ntshùa njam neto tshob nkamte yantù Tshùaben Nsi Israél là.

²⁷Tshé' mfa' Omri, tshu ts'a ghù là, ntsho ts'a le' là, bo kite ntùm ṅwa'ni Kronika fenfen Israél.

²⁸Omri nèn ntèt tà tse, bo tshoṅ i Samaria. Nshum i Akab tô num ze dù'.

²⁹Akab nshum Omri lo be tô Israél ndù Asa mfen Yuda tswe num fen ngu'njù ntshob fom ṅam ntat. Akab nshum Omri tô Israél ngu'njù ntshob bàa ṅam mbàa. A ke ntswe à Samaria.

³⁰Akab nshum Omri ghù nukebwô num miag Tshùaben ntshùa njoṅ ben fa tse bo be mbwe i là.

³¹Neso wut num nukebwô Yéroboam nshum Nebat lo kag num ze tu, k'a so Yézabél ngon Etbaal, mfen Sidon. A tù' ngafa' Baal, kà nke ngwù mbwe i.

³²A bom ta' tômbwôg Baal ntùm ba' Baal z'a kut Samaria là.

³³A kom neto Astarté. Akab ghù nukebwô ntshùa njoṅ fenfen Israél fa tse bo be mbwe i là; ntshùa ndùlala nkamte yantù Tshùaben Nsi Israél.

³⁴A lo be ze ngelaṅ, Hiel ze Bétél bèn nkut Yériko. A lo' tuswe i Abirâm, ma' tun ba' yi, ndo' kebatnjab i Ségub nte nzendà tse yi, ndùlala ntshob Tshùaben mi a tshùa num ntshu Yoshua nshum Nun ntshob là zwiagte.